ନୂଆଦିଲ୍ଲୀ: ପାକିସ୍ତାନର ପର୍ଦ୍ଦାଫାସ କରିବା ଅଭିଯାନର ଏକ ଅଂଶ ଭାବରେ ବିଭିନ୍ନ ରାଜନୈତିକ ଦଳର ପ୍ରତିନିଧି ମାନେ ଏବେ ବିଦେଶ ଗସ୍ତରେ ଅଛନ୍ତି। ଏଥି ମଧ୍ୟରୁ ଗୋଟିଏର ନେତୃତ୍ୱ ନେଉଥିବା କଂଗ୍ରେସ ସାଂସଦ ଶଶି ଥରୁର ୨୦୨୩ ମସିହାରେ ହୋଇଥିବା ଭୂମିକମ୍ପ ସମୟରେ ତୁର୍କୀକୁ ସାହାଯ୍ୟ କରିବା ପାଇଁ କେରଳ ସରକାରଙ୍କୁ ସମାଲୋଚନା କରିଛନ୍ତି। ଦୁଇ ବର୍ଷ ପୂର୍ବେ ତୁର୍କୀକୁ ଦିଆଯାଇଥିବା ୧୦ କୋଟି ଟଙ୍କାର ସହାୟତାକୁ ସେ ଭୁଲ ବୋଲି କହିଛନ୍ତି।
କେରଳ ପକ୍ଷରୁ ତୁର୍କୀକୁ ସହାୟତାକୁ ନେଇ ଏକ ଖବର ପୋଷ୍ଟ କରି ଥରୁର କହିଛନ୍ତି ଯେ, ବାମ ଗଣତାନ୍ତ୍ରିକ ମୋର୍ଚ୍ଚା ସରକାର ଏହାର ଅଯଥା ଉଦାରତା ଉପରେ ବିଚାର କରିବା ଆବଶ୍ୟକ । ସେ ପୋଷ୍ଟରେ ଲେଖିଛନ୍ତି କି, "ଦୁଇ ବର୍ଷ ପରେ ତୁର୍କୀର ଆଚରଣ ଦେଖିବା ପରେ ମୁଁ ଆଶା କରୁଛି, କେରଳ ସରକାର ଏହାର ଅଯଥା ଉଦାରତା ଉପରେ ବିଚାର କରିବେ। ଏହା ମଧ୍ୟ କହିବା ଜରୁରୀ କି, ୱାୟାନାଡ଼ର ଲୋକମାନେ ସେହି ଦଶ କୋଟି ଟଙ୍କାକୁ ବହୁତ ଭଲ ଭାବରେ ବ୍ୟବହାର କରିପାରିଥାନ୍ତେ।"
ଏହି ପୋଷ୍ଟର ଜବାବ ଦେଇ ସିପିଏମ ନେତା ଜନ୍ ବ୍ରିଟାସ୍ କହିଛନ୍ତି ଯେ, ଯେତେବେଳେ କେନ୍ଦ୍ର ସରକାର ତୁର୍କୀକୁ ସାହାଯ୍ୟର ହାତ ବଢାଇଛନ୍ତି, ତେବେ ଶଶି ଥରୁର କେବଳ କେରଳ ଉପରେ କାହିଁକି ପ୍ରଶ୍ନ ଉଠାଉଛନ୍ତି ? ସେ କହିଛନ୍ତି କି, "ଶଶି ଥରୁରଙ୍କ ପ୍ରତି ମୋର ବହୁତ ସମ୍ମାନ ଅଛି। କିନ୍ତୁ ଏହି ମନ୍ତବ୍ୟ ଗୁଡ଼ିକ ସ୍ମୃତିହୀନତାର ଲକ୍ଷଣ।" ସେ ଆହୁରି କହିଛନ୍ତି, "ଏହା ଆଶ୍ଚର୍ଯ୍ୟଜନକ ଏବଂ ତାଙ୍କୁ କେରଳକୁ କାହିଁକି ଅପମାନିତ କରିବାକୁ ପଡିଲା, ଯେତେବେଳେ ସେ ଭଲ ଭାବରେ ଜାଣନ୍ତି ଯେ ମୋଦି ସରକାର ନିଜେ ତୁର୍କୀକୁ ସାହାଯ୍ୟ କରିବା ପାଇଁ ଅପରେସନ ଦୋସ୍ତ ଆରମ୍ଭ କରିଥିଲେ। କେରଳର ସମାଲୋଚନା ଅନୁଚିତ।"
