ଛତ୍ରପୁର,୦୩/୧୦: ଗଞ୍ଜାମ ଏସପି ଭାବେ ଆଇପିଏସ ଶୁଭେନ୍ଦୁ ପାତ୍ର ଗୁରୁବାର ଅପରାହ୍ନରେ ଦାୟିତ୍ୱ ଗ୍ରହଣ କରିଛନ୍ତି । ସେ ୨୦୧୯ ବ୍ୟାଚ୍ର ହୋଇଥିବା ବେଳେ ପୂର୍ବରୁ କନ୍ଧମାଳ ଏସପି ଭାବେ ଦାୟିତ୍ୱ ତୁଲାଉଥିଲେ । ଗଞ୍ଜାମ ଜିଲ୍ଲାରେ ବାର୍ଷିକ ଅପରାଧ ସଂଖ୍ୟା ୧୭ ହାଜର । ଯାହାକି ରାଜ୍ୟର ଅପରାଧ ସଂଖ୍ୟାର ୮ପ୍ରତିଶତ । ତେଣୁ ଏହି ଜିଲ୍ଲାରେ ଅପରାଧ ନିୟନ୍ତ୍ରଣ ଏବଂ ଅପରାଧୀକୁ ଦୃଢ଼ ହସ୍ତରେ ଦମନ କରାଯିବା ପାଇଁ ଚେଷ୍ଟା କରିବେ ବୋଲି ଶୁଭେନ୍ଦୁ ପାତ୍ର କହିଥିଲେ । ଅପରାଧ ହେବା ପୂର୍ବରୁ ଏହାକୁ ନିୟନ୍ତ୍ରଣକୁ କିପରି ଅଣାଯିବ ସେ ସମ୍ପର୍କରେ ଗୁରୁତ୍ୱ ଦିଆଯିବ ବୋଲି ଏସପି କହିଥିଲେ ।
ଜିଲ୍ଲାରେ ଅନ୍ୟାନ୍ୟ ବେଆଇନ କାର୍ଯ୍ୟ ସମ୍ପର୍କରେ ଅଧିକାରୀମାନଙ୍କୁ ନେଇ ଆଲୋଚନା କରାଯାଇ ରଣନୀତି କରାଯିବ । ବେଆଇନ ମଦ ଓ ମାଦକଦ୍ରବ୍ୟ କଡା କଡ଼ି ଧରାଯିବ ବୋଲି କହିଥିଲେ । ତାଙ୍କୁ ଗଞ୍ଜାମ ଜିଲ୍ଲାରେ ନିଯୁକ୍ତି ପାଇଁ ରାଜ୍ୟ ସରକାର ଓ ପୋଲିସ ବିଭାଗକୁ କୃତଜ୍ଞତା ଜଣାଇଥିଲେ ଏସପି । ବର୍ତ୍ତମାନ ଗଞ୍ଜାମ ଜିଲ୍ଲା ନକ୍ସଲ ମୁକ୍ତ । ଯଦି ସେଭଳି ସମୟ ଆସେ ତେବେ ମୁକାବିଲା କରାଯିବ ବୋଲି ଏସପି ସୂଚନା ଦେଇଛନ୍ତି । ଏସପି କାର୍ଯ୍ୟାଳୟରେ ପହଞ୍ଚିବା ପରେ ବରିଷ୍ଠ ପୁଲିସ ଅଧିକାରୀ ଏବଂ କର୍ମଚାରୀ ମାନେ ଫୁଲ ତୋଡ଼ା ଦେଇ ସ୍ୱାଗତ କରିଥିବା ବେଳେ ସଶସ୍ତ୍ର ପୁଲିସ ଗାର୍ଡଅଫ ଅନର ଦେଇଥିଲେ ।
