ଖଲ୍ଲିକୋଟ : ବାଦପଲ୍ଲୀରେ ପୁଲିସର ଚଢାଉ ବେଳେ ୨୦ଜଣ ଆଦିବାସୀଙ୍କୁ ଗିରଫ କରିଛି ପୁଲିସ। ଏ ସମ୍ପର୍କରେ ଗଞ୍ଜାମ ଏସପି ଶୁଭେନ୍ଦୁ କୁମାର ପାତ୍ର ସୂଚନା ଦେଇଛନ୍ତି। ୨୦ଜଣଙ୍କ ଗିରଫଙ୍କ ମଧ୍ୟରେ ୧୨ଜଣ ମହିଳା ଥିବା ବେଳେ ୮ ଜଣ ପୁରୁଷ ଥିବା ଏସପି କହିଛନ୍ତି। ଆଜି ବାଦପଲ୍ଲୀ ମଦ ଭାଟି ଭଙ୍ଗା ଅଭିଯାନ ଭୋର ୫ଟାରେ ଆରମ୍ଭ ହୋଇଥିବା ବେଳେ ଦିନ ୧୧ଟାରେ ଶେଷ ହୋଇଥିଲା। ପ୍ରାୟ ୬ଘଣ୍ଟା ଧରି ଏହି ଅଭିଯାନ ଚାଲି ଥିଲା।
ସୂଚନା ଅନୁସାରେ, ଦୀର୍ଘ ବର୍ଷ ଧରି ଖଲ୍ଲିକୋଟ ବ୍ଲକ ଅନ୍ତର୍ଗତ ଆଦିବାସୀ ଅଧ୍ୟୁଷିତ ବାଦପଲ୍ଲୀ ଓ ଡ଼ିମିରିଆ ପଞ୍ଚାୟତରେ ବେଆଇନ ଦେଶୀ ମଦ ପ୍ରସ୍ତୁତ କରି ସାରା ରାଜ୍ୟ ତଥା ରାଜ୍ୟ ବାହାରକୁ ଚୋରା ଚାଲାଣ ହେଉଥିଲା। ଏହାକୁ ବନ୍ଦ କରିବା ପାଇଁ ସବୁବେଳେ ଦାବି ହୋଇ ଆସୁଥିଲା। ଏହା ପୂର୍ବରୁ କେତେଥର ଅବକାରୀ ବିଭାଗ ଚଢ଼ାଉ କରିଥିଲେ ମଧ୍ୟ ଆଦିବାସୀଙ୍କ ପ୍ରବଳ ବିରୋଧ ଓ ପ୍ରତି ଆକ୍ରମଣ ଯୋଗୁଁ ସଫଳ ହୋଇ ପାରୁ ନଥିଲେ। ତେବେ ଚଳିତ ଥର ଅବକାରୀ ବିଭାଗକୁ କୌଣସି ସୂଚନା ନଦେଇ ପୁଲିସ ପ୍ରଶାସନ ବ୍ଲୁ ପ୍ରିଣ୍ଟ ପ୍ରସ୍ତୁତ କରି ଥିଲେ।
ଯୋଜନା ଅନୁଯାୟୀ ଆଜି ବହୁ ମାତ୍ରାରେ ପୁଲିସ ବାଦପଲ୍ଲୀ ପଞ୍ଚାୟତରେ ପଶି ପ୍ରାୟ ୮୪ଟି ମଦ ଭାଟି ଭାଙ୍ଗିଥିଲେ, ୨ ଲକ୍ଷ ଲିଟର ମହୁଆ ପୋଚ ଓ ପୋଚ ଗଚ୍ଛିତ କରି ରଖୁଥିବା ୮୦୦ ପ୍ଳାଷ୍ଟିକ୍ ଡ୍ରମ୍ ନଷ୍ଟ କରିଥିଲେ , ୧୩୫ଟି ମଦ ରନ୍ଧା ରସ ଡେକଚି ସହ ୪୦୨ଟି ପ୍ଳାଷ୍ଟିକ୍ ଡ୍ରମ୍, ୧୩ବସ୍ତା ମହୁଲ, ୩୫୦୦ ଲିଟର ଦେଶୀ ମଦ ଓ ଦୁଇଟି ଦେଶୀ ବନ୍ଧୁକ, ଦୁଇଟି ବାଇକ, ୫ଟି ଟୁଲୁ ପମ୍ପ ଜବତ କରିଥିଲେ। ଗଞ୍ଜାମ ଏସପି ଶୁଭେନ୍ଦୁ କୁମାର ପାତ୍ର ଖଲ୍ଲିକୋଟ ଥାନାରେ ଉପସ୍ଥିତ ରହି ଏକ ସାମ୍ବାଦିକ ସମ୍ମିଳନୀରେ ସମସ୍ତ ସୂଚନା ପ୍ରଦାନ କରିଥିଲେ।
