ମୁମ୍ବାଇ,୨୫/୬:ଖୁବଶୀଘ୍ର ରିଲିଜ ହେବାକୁ ଯାଉଛି ରାଜକୁମାର ରାଓ ଓ ଶ୍ରଦ୍ଧା କପୁର ଷ୍ଟାରର ସିନେମା ‘ସ୍ତ୍ରୀ ୨’ । ଫିଲ୍ମ ରିଲିଜକୁ ନେଇ ଫ୍ୟାନ୍ସ ଉତ୍ସାହର ସହ ଅପେକ୍ଷା କରିଥିବା ବେଳେ ବର୍ତ୍ତମାନ ଫିଲ୍ମର ଟିଜର ସାମ୍ନାକୁ ଆସିଛି । ଲମ୍ବା ସମୟ ପରେ ‘ସ୍ତ୍ରୀ ୨’ ର ଟିଜର ରିଲିଜ କରାଯାଇଛି । ଯାହାକୁ ଦର୍ଶକ ବେଶ୍ ପସନ୍ଦ କରୁଛନ୍ତି । ଏହା ଅଭିନେତା ରାଜକୁମାର ରାଓ ତାଙ୍କ ସୋସିଆଲ ମିଡିଆରେ ମଧ୍ୟ ସେୟାର କରିଛନ୍ତି ।
ତେବେ ‘ସ୍ତ୍ରୀ ୨’ ର ଦମଦାର ଟିଜରର ଆରମ୍ଭରେ ଜଣେ ମହିଳା ଗୋଟିଏ ବଡ ମୂର୍ତ୍ତିରେ କ୍ଷୀର ଚଢାଉଥିବାର ଦେଖିବାକୁ ମିଳୁଛି । ଏହାର ତଳେ ଲେଖା ହୋଇଛି ‘ଓଃ ସ୍ତ୍ରୀ ରକ୍ଷା କର’ । ଏହାପରେ ରାଜକୁମାର ରାଓ, ପଙ୍କଜ ତ୍ରିପାଠୀ, ଆପାର ଶକ୍ତି ଖୁରାନା ଓ ଅଭିଷେକ ବାନାର୍ଜୀ ନଜର ଆସୁଛନ୍ତି । ସେମାନେ ଆଶ୍ଚର୍ଯ୍ୟଚକିତ ଭାବରେ କୌଣସି ଜିନିଷକୁ ଦେଖୁଛନ୍ତି । ସେମାନେ କହୁଛନ୍ତି ଏହା ତ ସତ୍ୟ ହୋଇଗଲା । ତାପରେ ଗାଁରେ ଭୟର ବାତାବରଣ ଖେଳିଯାଇଛି ଓ ଲୋକେ କହିବାକୁ ଲାଗୁଛନ୍ତି ‘ସ୍ତ୍ରୀ ପୁଣିଥରେ ଆସିଗଲା’। ତେବେ ସ୍ତ୍ରୀର ଚରିତ୍ରରେ ଶ୍ରଦ୍ଧା କପୁର ନଜର ଆସୁଛନ୍ତି । ଟିଜରରେ ତମନ୍ନା ଭାଟିଆଙ୍କୁ ବି ଦେଖିବାକୁ ମିଳିଛି । ଟିଜରକୁ ଲୋକେ ବେଶ ପସନ୍ଦ କରୁଥିବା ବେଳେ ସ୍ବତନ୍ତ୍ରତା ଦିବସରେ ଫିଲ୍ମଟି ରିଲିଜ ହେବାକୁ ଯାଉଛି।