ନୂଆଦିଲ୍ଲୀ: ୟୁକ୍ରେନ ବିରୁଦ୍ଧରେ ଯୁଦ୍ଧରେ ଉତ୍ତର କୋରିଆ ରୁଷ ରାଷ୍ଟ୍ରପତି ଭ୍ଲାଦିମିର ପୁଟିନଙ୍କୁ ସମର୍ଥନ କରିଚାଲିଛି । ଚଳିତବର୍ଷ ମଧ୍ୟ ଜାନୁଆରୀ ଏବଂ ଫେବୃଆରୀ ମାସରେ ଉତ୍ତର କୋରିଆ ପ୍ରାୟ ୩ ହଜାର ଅତିରିକ୍ତ ସୈନ୍ୟ ରୁଷକୁ ପଠାଇଛି। ଗୁରୁବାର ଦକ୍ଷିଣ କୋରିଆ ସେନା ଏହା ଖୁଲାସା କରିଛି ।
ଦକ୍ଷିଣ କୋରିଆର ଏହି ସେନା ରିପୋର୍ଟ ଏଭଳି ସମୟରେ ଆସିଛି ଯେତେବେଳେ କି, ଗତ ସପ୍ତାହରେ ପ୍ୟୋଙ୍ଗୟାଙ୍ଗରେ ଉତ୍ତର କୋରିଆର ନେତା କିମ୍ ଜୋଙ୍ଗ ଉନ୍ ରୁଷର ସୁରକ୍ଷା ଅଧିକାରୀ ସର୍ଗେଇ ଶୋଇଗୁଙ୍କୁ ଭେଟିଥିଲେ । ଗଣମାଧ୍ୟମ ରିପୋର୍ଟ ଅନୁସାରେ, କିମ୍ ୟୁକ୍ରେନରେ ରୁଷର ଯୁଦ୍ଧକୁ ତାଙ୍କର ସମର୍ଥନ ପୁନଃପ୍ରକାଶ କରିଛନ୍ତି। ଏହା ସହିତ, ରୁଷ ଉପ-ବୈଦେଶିକ ମନ୍ତ୍ରୀ ଆଣ୍ଡ୍ରେ ରୁଡେଙ୍କୋ ଗୁରୁବାର କହିଛନ୍ତି ଯେ ସରକାର ମାନେ କିମଙ୍କ ସମ୍ଭାବ୍ୟ ରୁଷ ଗସ୍ତ ବିଷୟରେ ଆଲୋଚନା କରୁଛନ୍ତି।
ଦକ୍ଷିଣ କୋରିଆର ଜଏଣ୍ଟ ଚିଫ୍ସ ଅଫ୍ ଷ୍ଟାଫ୍ ରିପୋର୍ଟ କରିଛନ୍ତି ଯେ ଉତ୍ତର କୋରିଆ ମଧ୍ୟ ରୁଷକୁ ଅଧିକ କ୍ଷେପଣାସ୍ତ୍ର, ତୋପ ଉପକରଣ ଏବଂ ଗୁଳିଗୋଳା ପଠାଉଛି। ଯୁଦ୍ଧ ସ୍ଥିତି ଉପରେ ନିର୍ଭର କରି, ଉତ୍ତର କୋରିଆ ଏହାର ଅସ୍ତ୍ରଶସ୍ତ୍ର ଯୋଗାଣ ବୃଦ୍ଧି କରିପାରେ । ସମ୍ପ୍ରତି, ରୁଷ ଏବଂ ୟୁକ୍ରେନ ସୀମିତ ଯୁଦ୍ଧବିରତି ପାଇଁ ସହମତ ହୋଇଛନ୍ତି, କିନ୍ତୁ ଉଭୟ ପକ୍ଷ ପରସ୍ପର ଉପରେ ଯୁଦ୍ଧବିରତି ଉଲ୍ଲଂଘନର ଅଭିଯୋଗ ଆଣିଛନ୍ତି।
୧୯୫୦-୫୩ କୋରିଆ ଯୁଦ୍ଧ ପରେ ପ୍ରଥମ ଥର ପାଇଁ ଏକ ବଡ଼ ଧରଣର ସଂଘର୍ଷରେ ଅଂଶଗ୍ରହଣ କରି ଉତ୍ତର କୋରିଆ ୟୁକ୍ରେନ ବିରୁଦ୍ଧରେ ପ୍ରାୟ ୧୧ ହଜାର ସୈନ୍ୟ ପଠାଇଛି। ଦକ୍ଷିଣ କୋରିଆ ସାମରିକ ଆକଳନ ଅନୁଯାୟୀ, ଏମାନଙ୍କ ମଧ୍ୟରୁ ପ୍ରାୟ ୪ ହଜାର ଲୋକ ମୃତ୍ୟୁବରଣ କରିଥିଲେ କିମ୍ବା ଆହତ ହୋଇଥିଲେ।
