ନୂଆଦିଲ୍ଲୀ,୩୦/୦୩: ୨୦ ବର୍ଷ ଅପେକ୍ଷାର ଅନ୍ତ। ଆମେରିକା ସହିତ ଭାରତର ବଡ଼ ଚୁକ୍ତି । ପରମାଣୁ ରିଆକ୍ଟର ନିର୍ମାଣ ଏବଂ ଡିଜାଇନ୍ କରିବାକୁ ମିଳିଛି ଅନୁମୋଦନ । ଆମେରିକାର ଶକ୍ତି ବିଭାଗ ବା ଡି଼ଓଇ ମାର୍ଚ୍ଚ ୨୬ ତାରିଖରେ ଭାରତରେ ରିଆକ୍ଟର ନିର୍ମାଣ ପାଇଁ ହୋଲଟେକ୍ ଇଣ୍ଟରନ୍ୟାସନାଲ୍ କମ୍ପାନୀକୁ ସବୁଜ ସଙ୍କେତ ଦେଇଛି। ହୋଲଟେକ୍ ୩ଟି ପ୍ରମୁଖ ଭାରତୀୟ କମ୍ପାନୀକୁ SMR ହସ୍ତାନ୍ତର କରିବ। ଏହି କମ୍ପାନୀଗୁଡ଼ିକ ମଧ୍ୟରେ ହୋଲଟେକ୍ ଏସିଆ, ଲାର୍ସନ୍ ଆଣ୍ଡ୍ ଟୁବ୍ରୋ ଲିମିଟେଡ୍ ଏବଂ ଟାଟା କନସଲ୍ଟିଂ ଇଞ୍ଜିନିୟର୍ସ ଲିମିଟେଡ୍ ଅନ୍ତର୍ଭୁକ୍ତ। 

ଏହା ମଧ୍ୟ ପଢନ୍ତୁ- ନେହା କକ୍କଡ଼ଙ୍କ ନାଁରେ ଆସିଲା ସଙ୍ଗୀନ ଅଭିଯୋଗ, ଭିଡ଼ିଓ ଏବଂ ବିଲ୍ ଦେଖାଇଲେ ଅର୍ଗାନାଇଜର

ହୋଲଟେକ୍ ଇଣ୍ଟରନ୍ୟାସନାଲ୍ ହେଉଛି ଭାରତୀୟ-ଆମେରିକୀୟ ଶିଳ୍ପପତି କ୍ରିସ୍ ପି ସିଂହଙ୍କ ଦ୍ୱାରା ପ୍ରୋତ୍ସାହିତ ଏକ କମ୍ପାନୀ। କମ୍ପାନୀ ୨୦୧୦ ମସିହାରେ ମହାରାଷ୍ଟ୍ରର ପୁଣେରେ ଏକ ଇଞ୍ଜିନିୟରିଂ ୟୁନିଟ୍ ପ୍ରତିଷ୍ଠା କରିଥିଲା। ଏହି କମ୍ପାନୀର ଗୁଜରାଟରେ ମଧ୍ୟ ଏକ ଉତ୍ପାଦନ ୟୁନିଟ୍ ଅଛି। ତେବେ ଏହି ଅନୁମୋଦନ ପରେ, ହୋଲଟେକକୁ ଚୁକ୍ତିନାମା ସଂଶୋଧନ କରିବାର ସ୍ୱାଧୀନତା ମଧ୍ୟ ଦିଆଯାଇଛି।ବିଶ୍ୱାସ ରହିଛି ଯେ, ହୋଲଟେକ୍ ଏହି ପ୍ରକଳ୍ପରେ  NTPC, ନ୍ୟୁକ୍ଲିୟର ପାୱାର କର୍ପୋରେସନ ଅଫ୍ ଇଣ୍ଡିଆ ଲିମିଟେଡ୍ (NPCIL) ଏବଂ ଆଣବିକ ଶକ୍ତି ସମୀକ୍ଷା ବୋର୍ଡ (AERB)କୁ ମଧ୍ୟ ସାମିଲ କରିପାରେ।  ହୋଲଟେକ୍ କୌଣସି ପରମାଣୁ ଅସ୍ତ୍ର କିମ୍ବା ସାମରିକ ଉଦ୍ଦେଶ୍ୟ ପାଇଁ ଭାରତକୁ ପ୍ରଯୁକ୍ତିବିଦ୍ୟା ହସ୍ତାନ୍ତର କରିପାରିବ ନାହିଁ। କେବଳ ଶାନ୍ତିପୂର୍ଣ୍ଣ ପରମାଣୁ କାର୍ଯ୍ୟକଳାପକୁ ଅନୁମତି ଦିଆଯିବ। ତେବେ ଏହି ଚୁକ୍ତି ପରେ ଭାରତୀୟ ପରମାଣୁ ଶକ୍ତି କ୍ଷେତ୍ରରେ ବୈପ୍ଳବିକ ପରିବର୍ତ୍ତନ ଆସିପାରିବ ବୋଲି ବିଶ୍ୱାସ କରାଯାଉଛି। ଏହି ଚୁକ୍ତିନାମାରୁ ଉଭୟ ଦେଶର ପରମାଣୁ ରିଆକ୍ଟରଗୁଡ଼ିକ ଲାଭ ପାଇପାରିବେ।