ନୂଆଦିଲ୍ଲୀ: ଇରାନ ରାଷ୍ଟ୍ରପତି ମାସୁଦ ପେଜେସ୍କିଆନ ଇସ୍ରାଏଲ ତାଙ୍କୁ ହତ୍ୟା କରିବାକୁ ଚେଷ୍ଟା କରୁଥିବା ଅଭିଯୋଗ କରିଛନ୍ତି । ସେ ତାଙ୍କ ଅଭିଯୋଗ ବିଷୟରେ କୌଣସି ବିସ୍ତୃତ ସୂଚନା ଦେଇ ନାହାନ୍ତି । ଆମେରିକୀୟ ସାମ୍ବାଦିକ ଟକର କାର୍ଲସନଙ୍କ ସହିତ ଏକ ସାକ୍ଷାତକାରରେ ପେଜେସ୍କିଆନ ଏହି ଦାବି କରିଛନ୍ତି । ଇରାନ ଏବଂ ଇସ୍ରାଏଲ ମଧ୍ୟରେ ପୁରୁଣା ଶତ୍ରୁତା ରହିଛି। ଇସ୍ରାଏଲ ସବୁବେଳେ ଇରାନକୁ ନିଜ ଅସ୍ତିତ୍ୱ ପାଇଁ ବିପଦ ଭାବରେ ଦେଖିଆସୁଛି । ଏପରି ପରିସ୍ଥିତିରେ, ଇସ୍ରାଏଲ ଗତ ମାସରେ ଇରାନର ପରମାଣୁ ଘାଟି ଉପରେ ଆକ୍ରମଣ କରିଥିଲା । ଜବାବରେ ଇରାନ ମଧ୍ୟ ମିସାଇଲ ଏବଂ ଡ୍ରୋନ ସାହାଯ୍ୟରେ ଇସ୍ରାଏଲ ଉପରେ ଆକ୍ରମଣ କରିଥିଲା । ଏହି ସମୟ ମଧ୍ୟରେ ଇସ୍ରାଏଲ ଇରାନର ସର୍ବୋଚ୍ଚ ନେତା ଆୟାତୋଲ୍ଲା ଅଲି ଖାମେନିଙ୍କୁ ହତ୍ୟା କରିବାକୁ ମଧ୍ୟ ଧମକ ଦେଇଥିଲା ।

ଟକର କାର୍ଲସନ ସାକ୍ଷାତକାରରେ ରାଷ୍ଟ୍ରପତି ପେଜେସ୍କିଆନଙ୍କୁ ପଚାରିଥିଲେ ଯେ, ଇସ୍ରାଏଲ ସରକାର ତାଙ୍କୁ ହତ୍ୟା କରିବାକୁ ଚେଷ୍ଟା କରିଥିଲେ କି ? ଏହାର ଉତ୍ତରରେ ପେଜେସ୍କିଆନ କହିଥିଲେ, ‘ ହଁ, ସେମାନେ ଚେଷ୍ଟା କରିଥିଲେ । ସେମାନେ ସେହି ଅନୁସାରେ କାର୍ଯ୍ୟ କରିଥିଲେ କିନ୍ତୁ ବିଫଳ ହୋଇଥିଲେ। ମୁଁ ବିଶ୍ୱାସ କରେ ଯେ, ଜଣେ ବ୍ୟକ୍ତି କେବେ ମରିବ କିମ୍ବା ମରିବ ନାହିଁ ସେହି ନିଷ୍ପତ୍ତି  କେବଳ ସର୍ବଶକ୍ତିମାନ ପରମେଶ୍ୱରଙ୍କ ହାତରେ ରହିଛି ।

୧୨ ଦିନର ଯୁଦ୍ଧରେ ଇସ୍ରାଏଲ ଇରାନ ସେନାର ଶୀର୍ଷ ନେତୃତ୍ୱଙ୍କୁ ନିପାତ କରିଦେଇଥିଲା । ଇସ୍ରାଏଲ ଆକ୍ରମଣରେ ଇସଲାମିକ୍ ରିଭୋଲ୍ୟୁସନରୀ ଗାର୍ଡସ୍ କର୍ପସ (IRGC) କମାଣ୍ଡର-ଇନ୍-ଚିଫ୍ ହୁସେନ ସଲାମି, ଖାତାମ-ଅଲ୍ ଅନହିଆ କେନ୍ଦ୍ରୀୟ, ମୁଖ୍ୟାଳୟ କମାଣ୍ଡର ଘୋଲାମାଲି ରସିଦ, ପରମାଣୁ ବୈଜ୍ଞାନିକ ଏବଂ ଇରାନର ପରମାଣୁ ଶକ୍ତି ସଂଗଠନର ପୂର୍ବତନ ମୁଖ୍ୟ ଫେରିଦୁନ୍ ଆବାସି, ପରମାଣୁ ବୈଜ୍ଞାନିକ ମହମ୍ମଦ ମେହଦି ତେହରାନଚି, ଇରାନର ପରମାଣୁ ଅସ୍ତ୍ର କାର୍ଯ୍ୟକ୍ରମ ସହିତ ଜଡିତ ଏବଂ ଇରାନର ସଶସ୍ତ୍ର ବାହିନୀ ମୁଖ୍ୟ ମହମ୍ମଦ ବାଘେରି ପ୍ରାଣ ହରାଇଥିଲେ ।