ଭୁବନେଶ୍ଵର, ୧୨/୦୫ : ସାନ ସିନା ଦାନ ତା ମହାନ। କିଡନୀ ଦାନ କରି ମାତ୍ର ୬ ବର୍ଷ ବୟସରେ ୨ ଜଣଙ୍କୁ ନୂଆ ଜୀବନ ଦେଲେ ବାରିପଦାର ସୋସ୍ରି ଆୟାନ ପାତ୍ର। ଡେରିରେ କଥା କହି ଚାଲି ଶିଖିଥିବା ଆୟାନ ଅତି କମ୍ ବୟସରୁ ଆଖି ବୁଜିଛନ୍ତି। ତାଙ୍କର ଅକାଳ ବିୟୋଗରେ ପରିବାର ଲୋକେ ଦୁଃଖରେ ଭାଙ୍ଗି ପଡିଛି।
ସୂଚନାନୁଯାୟୀ, ବାରିପଦାର ସୋସ୍ରି ଆୟାନ ପାତ୍ର ଗତ ୮ ତାରିଖରେ ସାଙ୍ଗଙ୍କ ସହ ଖେଳି ଘରକୁ ଫେରୁଥିଲେ। ହଠାତ୍ ଘର ଆଗରେ ଥିବା ଅଢେଇ କ୍ଵିଣ୍ଟାଲର ସ୍ଲାଇଡ୍ ଗେଟ୍ ତାଙ୍କ ଉପରେ ଖସି ପଡିଥିଲା। ଗୁରୁତର ଅବସ୍ଥାରେ ତାଙ୍କୁ ପ୍ରଥମେ ବାରିପଦା ପରେ ସମ୍ ହସ୍ପିଟାଲ ଚିକିତ୍ସା ପାଇଁ ଅଣାଯାଇଥିଲା। ଚିକିତ୍ସା ସତ୍ତ୍ଵେ ଆୟାନର ସ୍ବାସ୍ଥ୍ୟବସ୍ଥାରେ କୌଣସି ସୁଧାର ଆସିନଥିଲା। ପୁଅର ବଞ୍ଚିବା ଆଶା କ୍ଷୀଣ ଥିବାରୁ ବ୍ରେନ୍ ଡେଡ୍ ଟେଷ୍ଟ କରାଯାଇଥିଲା। ଏହାପରେ ଆୟାନର ବାପା-ମା ସ୍ଵଇଛାରେ ତାର ଅଙ୍ଗଦାନ ପାଇଁ ନିଷ୍ପତ୍ତି ନେଇଥିଲେ। ଆଜି ପିଲାଟିର କିଡନୀ ଦୁଇଟି ଦାନ କରାଯାଇଛି। ପୁଅର ସମସ୍ତ ଅଙ୍ଗ ଦାନ କରିବାକୁ ଚାହୁଁଥିଲେ ବି ପରିସ୍ଥିତି ଅନୁଯାୟୀ କେବଳ ଦୁଇଟି କିଡନୀ ଦାନ କରାଯାଇଛି। ଏମ୍ସର ସ୍ଵତନ୍ତ୍ର ଡାକ୍ତରୀ ଟିମ୍ ଓ ସମ୍ ଅଲ୍ଟିମେଟ୍ ହସ୍ପିଟାଲର ଡାକ୍ତରଙ୍କ ସହାୟତାରେ ଦାନ କରାଯାଇଛି। ଗୋଟିଏ କିଡନୀ ଏମ୍ସକୁ ଯାଇଥିବା ବେଳେ ଅନ୍ୟଟି ଆଉ ଏକ ଘୋରୋଇ ହସ୍ପିଟାଲକୁ ଯାଇଛି। ସମ୍ ଅଲଟିମେଟ ପାଇଁ ଅଙ୍ଗ ଦାନ କ୍ଷେତ୍ରରେ ଏହା ହେଉଛି ଚତୁର୍ଥ ଘଟଣା ।
ଏହି ଖବରଟିକୁ ପଢନ୍ତୁ-ଭୁବନେଶ୍ୱର ନୂଆ ଷ୍ଟେସନ୍ରୁ ଯାତ୍ରା ଆରମ୍ଭ କଲା ୩ ଏକ୍ସପ୍ରେସ୍ ଟ୍ରେନ୍, ଉପକୃତ ହେବେ ଯାତ୍ରୀ
