ନୋଏଡ଼ା,୧୦/୦୭: ଭାରତରେ ଏବେ ସୀମା ହାଇଦର୍ ଏବଂ ସଚିନ୍ ମୀନାଙ୍କ ନିଆରା ପ୍ରେମକାହାଣୀକୁ ନେଇ ଜୋରଦାର ଚର୍ଚ୍ଚା । ପାକିସ୍ତାନୀ ମହିଳା ସୀମା ପ୍ରେମ ପାଇଁ ନିଜ ୪ ସନ୍ତାନଙ୍କ ସହ ଭାରତ ଚାଲିଆସିଛନ୍ତି । ଶନିବାର ତାଙ୍କୁ ନୋଏଡ଼ାର ଏକ କୋର୍ଟ ଜାମିନ ଦେବା ପରେ ସେ ପ୍ରେମିକ ସଚିନ୍ଙ୍କ ସହ ତାଙ୍କ ଗ୍ରେଟର୍ ନୋଏଡ଼ାସ୍ଥିତ ଘରକୁ ଫେରିଆସିଛନ୍ତି । ସଚିନ୍ଙ୍କ ଘରେ ଏବେ ଖୁସିର ମାହୋଲ । ଉଭୟ ନୂଆ ଜୀବନ ଆରମ୍ଭ ପାଇଁ ଏବେ ଚଳାଇଛନ୍ତି ପ୍ରସ୍ତୁତି ।
କିଛି କାଗଜ କାମ ଶେଷ ହେବା ପରେ ସେମାନେ ସବୁଦିନ ପାଇଁ ପତିପତ୍ନୀ ହୋଇଯିବେ । ସଚିନ୍ଙ୍କୁ ପାଇବା ପାଇଁ ସୀମା ଇତିମଧ୍ୟରେ ହିନ୍ଦୁଧର୍ମ ଗ୍ରହଣ କରିନେଇଛନ୍ତି । ତାଙ୍କ ଉପନାମ ‘ହାଇଦର୍’କୁ ହଟାଇ ଦେଇଛନ୍ତି । ସଚିନ୍ଙ୍କ ଉପନାମ କିମ୍ବା ନାମକୁ ନିଜ ନାମ ସହ ଯୋଡ଼ିବାକୁ ବ୍ୟଗ୍ର ଅଛନ୍ତି । ‘ସୀମା’ ସାଧାରଣତଃ ଏକ ହିନ୍ଦୁ ନାମ ହୋଇଥିବାରୁ ଏହା ବଦଳୁ ବୋଲି ସଚିନ୍ ଚାହୁଁନାହାନ୍ତି । ତେଣୁ ତାଙ୍କର ନୂଆ ନାମ ‘ସୀମା ମୀନା’ କିମ୍ବା ‘ସୀମା ସଚିନ୍’ ହୋଇପାରେ । ଏହାଛଡ଼ା ସୀମା ତାଙ୍କ ୪ ସନ୍ତାନଙ୍କ ନାମ ବଦଳାଇ ରାଜ୍, ପ୍ରିୟଙ୍କା, ପରୀ ଓ ମୁନ୍ନି ରଖିଥିବା ଗଣମାଧ୍ୟମକୁ କହିଛନ୍ତି ।
ସୀମାଙ୍କ ପ୍ରକୃତ ଘର ପାକିସ୍ତାନର ସିନ୍ଧ ପ୍ରଦେଶସ୍ଥିତ ଖଇରପୁର ଜିଲ୍ଲାରେ । ବୈଧ କାଗଜପତ୍ର ବିନା ସେ ପ୍ରଥମେ ନେପାଳ ପହଞ୍ଚିଥିଲେ । ଏହାପରେ ସେଠାରୁ ଆସି ମେ ୧୩ରେ ଭାରତରେ ପ୍ରବେଶ କରିଥିଲେ । ସଚିନ୍ଙ୍କ ପାଖକୁ ସବୁଦିନ ପାଇଁ ଚାଲିଆସିବା ଲାଗି ସୀମା ତାଙ୍କର ଏକ ଜମିକୁ ୧୨ ଲକ୍ଷ ଟଙ୍କାରେ ବିକ୍ରି କରିଦେଇଥିଲେ । ମେ ୧୩ରେ ଯମୁନା ଏକ୍ସପ୍ରେସ୍ୱେଠାରେ ଏକ ବସ୍ରୁ ଓହ୍ଲାଇଥିଲେ ସୀମା ।
ଏହାପରେ ଗ୍ରେଟର୍ ନୋଏଡ଼ା ଅନ୍ତର୍ଗତ ରବୁପୁରାସ୍ଥିତ ସଚିନ୍ଙ୍କ ଭଡ଼ାଘରେ ପହଞ୍ଚିଥିଲେ । ଏଠାରୁ ୨୦୦ ମିଟର ଦୂରରେ ସଚିନ୍ଙ୍କ ପୈତୃକ ଘର।
ସୀମାଙ୍କୁ ପ୍ରଥମେ ପଡ଼ୋଶୀ ମହିଳାମାନେ ବିଭିନ୍ନ କଥା ପଚାରିଥିଲେ । ସେ ଦିଲ୍ଲୀରୁ ଆସିଛନ୍ତି ଏବଂ ସଚିନ୍ଙ୍କୁ ବିବାହ କରିଥିବା କହିଥିଲେ ସୀମା । ଧରା ନ ପଡ଼ିବା ପାଇଁ ସେ ଉର୍ଦ୍ଦୁକୁ ପାରୁପର୍ଯ୍ୟନ୍ତ ଏଡ଼ାଇ ହିନ୍ଦୀ କହିଥିଲେ । ପରେ ଜଣାପଡ଼ିଥିଲା ଯେ ସୀମା ଜଣେ ପାକିସ୍ତାନୀ ମହିଳା । ଖବର ପାଇ ପୁଲିସ ପହଞ୍ଚି ଜେରା କରିଥିଲା । ଏହାପରେ ସଚିନ୍ ଓ ସୀମା ବଲ୍ଲଭଗଡ଼ ପଳାଇଥିଲେ । କିନ୍ତୁ ଜୁଲାଇ ୪ରେ ସେମାନଙ୍କୁ ଗିରଫ କରାଯାଇଥିଲା ।
ଜାମିନ ମିଳିବା ପରେ ଉଭୟ ନିଜ ଭଡ଼ାଘରକୁ ଫେରିଆସିଛନ୍ତି । ଏଠାରେ ସେମାନେ ଆରାମରେ ରହୁଛନ୍ତି । ସଚିନ୍ କୁହନ୍ତି, ‘ଘରେ ସୀମାଙ୍କ ସହ ଥାଇ ବେଶ୍ ଖୁସି ଲାଗୁଛି । ମୋ ପରିବାର ଲୋକ ସୀମା ଏବଂ ତାଙ୍କ ୪ ସନ୍ତାନଙ୍କୁ ଗ୍ରହଣ କରିନେଇଛନ୍ତି । ସୀମାଙ୍କୁ ଭାରତୀୟ ନାଗରିକତା ପ୍ରଦାନ କରିବାକୁ ମୁଁ ୟୁପି ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ଏବଂ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ଅନୁରୋଧ କରୁଛି । ଆମେ ପାରମ୍ପରିକ ହିନ୍ଦୁ ରୀତିନୀତିରେ ବିବାହ କରିବାକୁ ଯୋଜନା କରୁଛୁ ।’ ସୀମା ଓ ସଚିନ୍ ଚଳିତବର୍ଷ ମାର୍ଚ୍ଚ ୧୩ରେ କାଠମାଣ୍ଡୁରେ ବିବାହ କରିଥିବା ଦାବି କରିଛନ୍ତି । କିନ୍ତୁ ସେମାନଙ୍କ ପାଖରେ ଏହାର ପ୍ରମାଣ ପାଇଁ କୌଣସି କାଗଜପତ୍ର ନାହିଁ ।
Powered by Froala Editor