ନୂଆଦିଲ୍ଲୀ, ୭।୧: ବାଂଲାଦେଶର ପୂର୍ବତନ ପ୍ରଧାନମନ୍ତ୍ରୀ ଶେଖ ହସିନାଙ୍କୁ ଦ୍ୱିତୀୟ ଥର ପାଇଁ ଗିରଫ ପରୱାନା ଜାରି କରିଛନ୍ତି ଢାକାର ଏକ କୋର୍ଟ । ଶେଖ୍ ହସିନାଙ୍କ ସମେତ ୧୨ଜଣଙ୍କ ବିରୋଧରେ ମଧ୍ୟ ଆରେଷ୍ଟ ୱାରେଣ୍ଟ ଜାରି କରିଛି । ଏମାନଙ୍କ ମଧ୍ୟରେ ପୂର୍ବ ପୋଲିସ ପ୍ରମୁଖ ଓ ସେନା ଜେନେରାଲ ମଧ୍ୟ ସାମିଲ । ଅନ୍ୟ ଅଭିଯୁକ୍ତମାନଙ୍କ ମଧ୍ୟରେ ଅଛନ୍ତି ଅବସରପ୍ରାପ୍ତ ମେଜର ଜେନେରାଲ ତାରିକ୍ ଅହମଦ ସିଦ୍ଦିକି, ପୂର୍ବତନ ପୁଲିସ ଆଇଜି ବେନଜିର ଅହମ୍ମଦ ଏବଂ ନ୍ୟାସନାଲ୍ ଟେଲିକମ୍ୟୁନିକେସନ ମନିଟରିଂ ସେଣ୍ଟରର ପୂର୍ବତନ ମହାନିର୍ଦ୍ଦେଶକ ଜିଆଉଲ ଅହସାନ । ବର୍ତ୍ତମାନ ଭାରତରେ ଆଶ୍ରୟ ନେଇଥିବା ହସିନାଙ୍କ ବିରୋଧରେ ଲୋକଙ୍କୁ ବଳପୂର୍ବକ ଗାଏବ କରିବା ସହ ହତ୍ୟା କରିଥିବା ଅଭିଯୋଗ ହୋଇଛି । ଏହି ଅଭିଯୋଗ ଆଧାରରେ ତାଙ୍କ ନାଁରେ ଗିରଫ ପରୱାନା ଜାରି କରିଛନ୍ତି କୋର୍ଟ ।
ଗତବର୍ଷ ଅଗଷ୍ଟ ମାସରେ ବାଂଲାଦେଶରେ ଛାତ୍ର ଆନ୍ଦୋଳନ ଦେଖିବାକୁ ମିଳିଥିଲା । ଏହା ଭୟଙ୍କର ରୂପ ନେବାରୁ ଯାହା ପରେ ହସିନା ବାଂଲାଦେଶ ଛାଡ଼ିବାକୁ ବାଧ୍ୟ ହୋଇଥିଲେ । ପୂର୍ବରୁ ତାଙ୍କ ନାଁରେ ମାନବିକତା ବିରୋଧୀ ଅପରାଧ ମାମଲା ରହିଥିଲା । ହସିନାଙ୍କ ବିରୋଧରେ ଏହା ହେଉଛି ଦ୍ୱିତୀୟ ମାମଲା । ୱାରେଣ୍ଟ ଜାରି ହେବା ପରେ ହସିନାଙ୍କୁ ଗିରଫ କରିବା ପାଇଁ ଆଇସିଟି-ବାଂଲାଦେଶ ଇଣ୍ଟରପୋଲର ସହାୟତା ଲୋଡ଼ିଥିବା ଜଣାପଡ଼ିଛି । ଏହାବ୍ୟତୀତ ବାଂଲାଦେଶ ତାଙ୍କ ପ୍ରତ୍ୟର୍ପଣ ପାଇଁ ଆନୁଷ୍ଠାନିକ ଭାବେ ଭାରତକୁ ଅନୁରୋଧ କରିଛି । ୨୦୨୪ ଅକ୍ଟୋବରରେ ପୂର୍ବତନ ପ୍ରଧାନମନ୍ତ୍ରୀ ଶେଖ୍ ହସିନା ଓ ଅନ୍ୟ ୪୫ ଜଣଙ୍କ ବିରୋଧରେ ପ୍ରଥମ ଗିରଫ ପରୱାନା ଜାରି କରାଯାଇଥିଲା । ନଭେମ୍ବର ୧୮ ସୁଦ୍ଧା ହସିନାଙ୍କ ସମେତ ୪୬ ଜଣଙ୍କୁ ଗିରଫ କରି କୋର୍ଟରେ ହାଜର କରିବାକୁ ଟ୍ରିବ୍ୟୁନାଲ ସଂପୃକ୍ତ କର୍ତ୍ତୃପକ୍ଷଙ୍କୁ ନିର୍ଦ୍ଦେଶ ଦେଇଥିଲେ ।
ବାଂଲାଦେଶ ସରକାରଙ୍କ ପ୍ରେସ୍ ସଚିବ ଶଫିକୁଲ ଆଲାମ କହିଛନ୍ତି, ଶେଖ ହସିନା ଯେମିତି ହେଲେ ବି ନ୍ୟାୟପାଳିକାର ସାମ୍ନା କରିବେ । ତାଙ୍କୁ ମାନବଜାତି ବିରୋଧୀ ଅପରାଧ ପାଇଁ ଦଣ୍ଡ ଦେବାକୁ ଆମେ ପୂରା ଚେଷ୍ଟା କରିବୁ । ତାଙ୍କୁ ବାଂଲାଦେଶ ଆଣିବାକୁ ଆମର ଚାପ ପକାଇବା କାମ ଜାରି ରହିବ ବୋଲି ସେ କହିଛନ୍ତି । ଶେଖ ହସିନାଙ୍କ ପ୍ରତ୍ୟର୍ପଣ ପାଇଁ ବାଂଲାଦେଶର ଅନ୍ତରୀଣ ସରକାର ଭାରତକୁ କୂଟନୀତିକ ସ୍ତରରେ ଚିଠି ଲେଖିଛନ୍ତି ।
