ମୁମ୍ବାଇ,୧୦/୪ : ଆଇପିଏଲ ୨୦୨୫ମଝିରେ ଚେନ୍ନାଇ ସୁପରକିଙ୍ଗ୍ସକୁ ଲାଗିଛି ବଡ଼ ଝଟକା । ଟିମର ଅଧିନାୟକ ଋତୁରାଜ ଗାୟକଓ୍ବାଡ଼ ଆହତ ହୋଇଛନ୍ତି । ଗାୟକଓ୍ବାଡ଼ଙ୍କ ଆଘାତ ଏତେ ଗମ୍ଭୀର ଯେ ସେ ଏହି ସିଜନରେ ଖେଳିପାରିବେ ନାହିଁ । ଏହାକୁ ନେଇ ଚେନ୍ନାଇ ସୁପରକିଙ୍ଗ୍ସ ଏକ୍ସ ମାଧ୍ୟମରେ ଅପଡେଟ୍ ସେୟାର କରିଛି । ସିଏସକେ ଏହା ମଧ୍ୟ କହିଛି ଯେ, ଏବେ ଦଳର ଅଧିନାୟକ କିଏ ହେବେ ।
ସିଏସକେ ପୁଣି ଥରେ ଭେଟରାନ ଓ୍ବିକେଟକିପର ବ୍ୟାଟ୍ସମ୍ୟାନ ମହେନ୍ଦ୍ର ସିଂହ ଧୋନିଙ୍କୁ ଅଧିନାୟକ ଦାୟିତ୍ବ ହସ୍ତାନ୍ତର କରିଛି । ଧୋନିଙ୍କ ଅଧିନାୟକତ୍ବରେ ସିଏସକେ ମୋଟ୍ ୫ଥର ଆଇପିଏଲ ଟାଇଟଲ ଜିତିଛି । ଚେନ୍ନାଇ ୨୦୧୦, ୨୦୧୧, ୨୦୧୮, ୨୦୨୧ ଏବଂ ୨୦୨୩ରେ ଆଇପିଏଲ୍ ଟ୍ରଫି ଜିତିଥିଲା । ଧୋନି ୨୦୨୨ସିଜନରେ ରିବନ୍ଦ୍ର ଜାଡେଜାଙ୍କୁ ଅଧିନାୟକ ଦାୟିତ୍ବ ହସ୍ତାନ୍ତର କରିଥିଲେ । କିନ୍ତୁ ସିଜନ ମଝିରେ ଜାଡେଜା ଅଧିନାୟକ ପଦ ଛାଡ଼ି ଦେଲେ ଏବଂ ଧୋନିଙ୍କୁ କମାଣ୍ଡ ଗ୍ରହଣ କରିବାକୁ ପଡ଼ିଥିଲା । ଏହାପରେ ୨୦୨୪ରେ ଋତୁରାଜ ଗାୟକଓ୍ବାଡ଼ଙ୍କୁ ଅଧିନାୟକ କରାଯାଇଥିଲା ।
