ନୀଳଗିରି, ୨୪/୭: ନୀଳଗିରିର ବିକାଶ ପାଇଁ ଅଣ୍ଟା ଭିଡ଼ିଲେ ନବ ନିର୍ବାଚିତ ବିଧାୟକ ସନ୍ତୋଷ ଖଟୁଆ । ପୂର୍ବରୁ ୫ କିମିର ପୋଲ ଭିତରେ ଗୋଟାଏ ପୋଲ ନିର୍ମାଣ କରିବା ନେଇ ନିୟମ ରହିଥିଲା । କିନ୍ତୁ, ନୂତନ ସରକାର ଆସିବା ପରେ ଏହା ୪ କିମିକୁ କମାଇ ଦିଆଯାଇଛି । ଏନେଇ ନୀଳଗିରିରେ ଏକ ନୂତନ ପୋଲ ନିର୍ମାଣ ହେବାର ଆବଶ୍ୟକତା ରହିଛି । ତେବେ ଏହି ପୋଲ ସୋନନଦୀରେ ହେଉ ଅବା ଅନ୍ୟ ନଦୀରେ । ଯେଉଁଠାରେ ପୋଲର ଆବଶ୍ୟକତା ରହିଛି ଏନେଇ ବିଧାୟକ ସନ୍ତୋଷ ଖଟୁଆ ଅଞ୍ଚଳବାସୀଙ୍କୁ ନିଜ ନିଜର ପ୍ରୋଜେକ୍ଟ ଦେବାକୁ କହିଛନ୍ତି ।
ସେହିପରି ଚାଷ ଜମିକୁ ଜଳସେଚନ ବ୍ୟବସ୍ଥା ପାଇଁ ଡ୍ରେନେଜ୍ ପାଣି କିଭଳି ଗଚ୍ଛିତ ହେବ ଏନେଇ ସନ୍ତୋଷ ବିଭାଗୀୟ ମନ୍ତ୍ରୀଙ୍କ ସହ ଗୁରୁତ୍ୱପୂର୍ଣ୍ଣ ଅଲୋଚନା କରିଛନ୍ତି । ସବୁଠାରୁ ଗୁରୁତ୍ୱପୂର୍ଣ୍ଣ କଥା ହେଉଛି, ସେ ବିଧାନସଭାରେ ଏନେଇ ପ୍ରଶ୍ନ କରି ଲିଖିତ ଭାବେ ଜଣାଇଥିବା ସୂଚନା ମିଳିଛି । ଋଷିଆ ଡ୍ୟାମ୍ ପୋତି ଯାଇଥିବା ବେଳେ ଏହାର ପୁନଃଉଦ୍ଧାର ସହ ପଦ୍ମତୋଳା ହ୍ରଦର ପୁନଃଉଦ୍ଧାର ପାଇଁ ବିଭାଗୀୟ ମନ୍ତ୍ରୀଙ୍କ ନିକଟରେ ଏନେଇ ପ୍ରଶ୍ନ ରଖିଥିବା ଜଣାପଡ଼ିଛି । ସେହିଭଳି ୩ କିମିର ଭିତରେ ଥିବା ବିଭିନ୍ନ ପଞ୍ଚାୟତର ରାସ୍ତା ପ୍ରଶସ୍ଥିକରଣ ପାଇଁ ଗ୍ରାମ୍ୟ ଉନ୍ନୟନ ବିଭାଗକୁ ହସ୍ତାନ୍ତର ପ୍ରକ୍ରିୟା ଦେବା ସହ ବିଧାୟକ ବିଭାଗୀୟ ମନ୍ତ୍ରୀଙ୍କ ସହ ଆଲୋଚନା କରିଛନ୍ତି । ମାତ୍ର ମାସେ ଭିତରେ ନୀଳଗିରି ନିର୍ବାଚନମଣ୍ଡଳୀ ପାଇଁ ବିଭିନ୍ନ ଉନ୍ନୟନମୂଳକ କାର୍ଯ୍ୟ କରିଥିବାରୁ ବିଧାୟକଙ୍କ ଏଭଳି ପଦକ୍ଷେପକୁ ବେଶ୍ ପ୍ରଶଂସା କରାଯାଇଛି ।