ସିମୁଳିଆ,୧୫/ ୦୪ : ସଡ଼କ ଦୁର୍ଘଟଣାରେ ଅଳ୍ପକେ ବର୍ତ୍ତିଲେ ତୁଳସୀ ଗଣନାଟ୍ୟର ଅଭିନେତା ଅଶ୍ୱିନୀ କୁମାର। ଯାତ୍ରା ସାରି ଘରକୁ ଫେରୁଥିବା ସମୟରେ ଟ୍ରକ ସହ ମୁହାଁମୁହିଁ ଧକ୍କା ହୋଇଥିଲା ଅଶ୍ୱିନୀଙ୍କ କାର । ଯାହା ଫଳରେ ଅଶ୍ୱିନୀ ସାମାନ୍ୟ ଆହତ ହୋଇଥିବା ବେଳେ କାର ଡ୍ରାଇଭରଙ୍କ ମୁଣ୍ଡରେ ଗଭୀର ଆଘାତ ଲାଗିଥିବା ସୂଚନା ମିଳିଛି।
ସୂଚନା ମୁତାବକ, ତୁଳସୀ ଯାତ୍ରା ଅଭିନେତା ବାଲେଶ୍ୱର ଜିଲ୍ଲା ନୀଳଗିରି ଅଞ୍ଚଳରୁ ଯାତ୍ରା ସାରି ଭୁବନେଶ୍ୱର ଅଭିମୁଖେ ନିଜ ଘରକୁ ଫେରୁଥିଲେ । ସେହି ସମୟରେ ସିମୁଳିଆ ଥାନା ନିକଟ ୧୬ ନମ୍ବର ଜାତୀୟ ରାଜପଥ ତାରିଣୀ ପୋଲ ନିକଟରେ ଏହି ଦୁର୍ଘଟଣା ଘଟିଥିଲା। ବାଲେଶ୍ୱର ଆଡ଼କୁ ଦୁଇଟି ଟ୍ରକ ଯାଉଥିବା ବେଳେ ଗୋଟିଏ ଅନ୍ୟଟିକୁ ଅତିକ୍ରମ କରୁଥିଲା । ଆଉ ଏହି ସମୟରେ ଅଭିନେତା ଅଶ୍ୱନିଙ୍କ କାର ଓ ଟ୍ରକ ମଧ୍ୟରେ ମୁହିଁମୁହିଁ ଧକ୍କା ହୋଇଥିଲା। ଯାହା ଫଳରେ ଅଭିନେତା ଓ କାର୍ ଡ଼୍ରାଇଭର ଆହତ ହୋଇଥିବା ଜଣାପଡ଼ିଛି । ତେବେ ଉଭୟଙ୍କୁ ୧୦୮ ଆମ୍ବୁଲାନ୍ସ ସାହାଯ୍ୟରେ ପ୍ରଥମେ ସିମୁଳିଆ ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରକୁ ଅଣାଯାଇଥିଲା । କିନ୍ତୁ ସେଠାରେ କାରର ଡ୍ରାଇଭର ସୋମନାଥ ଦାଶଙ୍କ ଅବସ୍ଥା ଗୁରୁତର ଥିବାରୁ ତାଙ୍କୁ ଭୁବନେଶ୍ୱର କିମସ ହସପିଟାଲକୁ ସ୍ଥାନାନ୍ତରିତ କରାଯାଇଥିବା ସୂଚନା ମିଳିଛି।
ତେବେ ବର୍ତ୍ତମାନ ଯାତ୍ରା କଳାକାର ଅଶ୍ୱିନୀ ସୁସ୍ଥ ଥିବାର ଜଣାପଡ଼ିଛି । ଖବର ପାଇ ସିମୁଳିଆ ପୋଲିସ ଘଟଣାସ୍ଥଳରେ ପହଁଞ୍ଚି ପରିସ୍ଥିତିକୁ ନିୟନ୍ତ୍ରଣ କରିଛି। ପ୍ରକାଶ ଥାଉକି, ୧୬ନଂ ଜାତୀୟ ରାଜପଥ ସଂପ୍ରସାରଣ କାର୍ଯ୍ୟ ଚାଲୁଛି। ତେଣୁ ସେହି ରାସ୍ତାକୁ ୱାନ ୱେ କରାଯାଇଥିବାରୁ ଏଭଳି ଦୁର୍ଘଟଣା ଘଟିଥିବାର ଜଣାପଡିଛି।
