ନୂଆଦିଲ୍ଲୀ,୩୦/୦୯: ସରକାର ଭାୟାକମ ୧୮ ମିଡିଆ ଲିମିଟେଡର ଅଣ ନ୍ୟୁଜ ଏବଂ କରେଣ୍ଟ ଆଫେୟାର୍ସ ଟିଭି ଚ୍ୟାନେଲ ଲାଇସେନ୍ସକୁ ଷ୍ଟାର ଇଣ୍ଡିଆ ପ୍ରାଇଭେଟ ଲିମିଟେଡକୁ ସ୍ଥାନାନ୍ତର କରିବାକୁ ମଞ୍ଜୁରୀ ପ୍ରଦାନ କରିଛନ୍ତି । ମିଶ୍ରଣ ସର୍ତ୍ତ ଆଧାରରେ କମ୍ପିଟିଶନ କମିଶନ ଅଫ୍ ଇଣ୍ଡିଆ (ସିସିଆଇ) ଏହି ଅନୁମୋଦନ ପ୍ରଦାନ କରିଛି । ରିଲାଏନ୍ସ ଏବଂ ଡିଜନୀ ଚଳିତ ବର୍ଷ ଫେବ୍ରୁଆରିରେ ଭାରତରେ ନିଜର ଏଣ୍ଟରଟେନମେଣ୍ଟ ବ୍ରାଣ୍ଡ ଗୁଡିକୁ ଏକ ସାଥିରେ ନେବା ଲାଗି ଷ୍ଟ୍ରାଟେଜିକ ଯୌଥ ଉଦ୍ୟୋଗ ସ୍ଥାପନ କରିବା ଲାଗି ଘୋଷଣା କରିଥିଲେ ।
ଏହି ଡିଲ ରିଲାଏନ୍ସ ଇଣ୍ଡଷ୍ଟ୍ରିଜର ସହାୟକ କମ୍ପାନି ଭାୟାକମ ୧୮କୁ ଡିଜନୀର ଇଣ୍ଡିଆନ ୟୁନିଟ ଷ୍ଟାର ଇଣ୍ଡିଆ ସହ ମିଶ୍ରଣ କରାଯିବ । ଏହି ମିଶ୍ରଣ ପରେ ଆସିବାକୁ ଥିବା ନୂଆ କମ୍ପାନି ଦେଶର ସବୁଠୁ ବଡ ଟିଭି ଏବଂ ଡିଜିଟାଲ ଷ୍ଟ୍ରିମିଂ କମ୍ପାନି ହେବ । ଏହା ପୂର୍ବରୁ ୨୮ ଅଗଷ୍ଟରେ କମ୍ପିଟିଶନ କମିଶନ ଅଫ୍ ଇଣ୍ଡିଆ ଡିଜନୀ ଏବଂ ରିଲାଏନ୍ସ ଏଣ୍ଟରଟେନମେଣ୍ଟ ମିଶ୍ରଣକୁ ମଞ୍ଜୁରୀ ପ୍ରଦାନ କରିଥିଲା । ମିଶ୍ରଣ ପରେ ନୂଆ କମ୍ପାନି ନିକଟରେ ୭୫ କୋଟି ଦର୍ଶକ ରହିବେ । ମ
ନ୍ତ୍ରଣାଳୟ ପକ୍ଷରୁ କୁହାଯାଇଛି ଯେ, ପ୍ରତିସ୍ପର୍ଦ୍ଧା ଆୟୋଗଙ୍କ ନିର୍ଦ୍ଧାରିତ ସର୍ତ୍ତ ଆଧାରରେ ଏଭଳି ମଞ୍ଜୁରୀ ପ୍ରଦାନ କରାଯାଇଛି । ଭାୟାକମ ୧୮ ରିଲାଏନ୍ସ ଇଣ୍ଡଷ୍ଟ୍ରିଜ ଏବଂ ବୋଧି ଟ୍ରି ସିଷ୍ଟମ ମିଡିଆ ଏବଂ ଏଣ୍ଟରଟେନମେଣ୍ଟ ବ୍ୟବସାୟର ଏକ ହୋଲ୍ଡିଂ କମ୍ପାନି । ଉଭୟ ପକ୍ଷ ମିଶ୍ରଣର ଚୂଡାନ୍ତ ପର୍ଯ୍ୟାୟରେ ରହିଛନ୍ତି । ପ୍ରତିସ୍ପର୍ଦ୍ଧା ଆୟୋଗଙ୍କ ନିର୍ଦ୍ଦେଶ ମୁ୍ତାବକ, କିଛି ବ୍ୟବସାୟକୁ ଏବେ ସଙ୍ଗଠିତ କରିବାକୁ ପଡିବ ।
ଅଗଷ୍ଟ ୩୦ରେ ଏନ୍ସିଏଲ୍ଟି ଭାୟାକମ ୧୮ ମିଡିଆ ଏବଂ ଡିଜିଟାଲ ୧୮ ମିଡିଆର ବିଲୟ ପ୍ରସ୍ତାବକୁ ମଞ୍ଜୁରି ପ୍ରଦାନ କରିଛନ୍ତି । ଯେଉଁଥିରେ ରିଲାଏନ୍ସ ଇଣ୍ଡଷ୍ଟ୍ରିଜର ମିଡିଆ ଏବଂ ଏଣ୍ଟରଟେନମେଣ୍ଟ ଆସେଟ ସାମିଲ ରହିଛି । ରିଲାଏନ୍ସ ଇଣ୍ଡଷ୍ଟ୍ରିଜ ଏବଂ ୱାଲଟ ଡିଜନୀ ଦେଶର ସର୍ବବୃହତ ମିଡିଆ ଗ୍ରୁପ ବନାଇବ । ଯାହାର ମୂଲ୍ୟ ୭୦ ହଜାର କୋଟି ଟଙ୍କାରୁ ଉଦ୍ଧ୍ୱର୍ ହେବ ।
ୱାଲଟ ଡିଜନୀର ସିଇଓ ବବ୍ ହର୍ଗର କହିଥିଲେ, ବଜାରରେ ପ୍ରତିଯୋଗିତା ଥିବାରୁ ମିଶ୍ରଣ ଦ୍ୱାରା ଏକ ବଡ କମ୍ପାନି ସ୍ଥାପନ ହେବ । ନୂଆ କମ୍ପାନି ନିକଟରେ ଓଟିଟିର ଏକ ବଡ ଗ୍ରାହକ ରହିବେ । ଯାହା ୫.୧ କୋଟି ରହିବ । ମିଶ୍ରଣ ପରେ ଡିଜନୀ ନିକଟରେ ବ୍ୟବସାୟ ବୃଦ୍ଧି ନେଇ ବେଶି କିଛି ରିସ୍କ ରହିବନି । ୨.୩ କୋଟି ଏଣ୍ଟରଟେନମେଣ୍ଟ ବଜାରରେ ସ୍ଥିତି ଦୃଢ଼ କରିବା ଦିଗରେ ନୂଆ କମ୍ପାନି ଧ୍ୟାନ କେନ୍ଦ୍ରିତ କରିପାରିବ ।
ସୋନି ଏବଂ ନେଟଫ୍ଲିକ୍ସ ଭଳି କମ୍ପାନି ଗୁଡିକ ସହ ଏହା କଡା ପ୍ରତିଯୋଗିତା କରିବାକୁ ସକ୍ଷମ ହେବ । ମିଶ୍ରଣ ପରେ ଭାରତୀୟ ବିଜ୍ଞାପନ ବଜାରରେ ଏହି କମ୍ପାନିର ଅଂଶ ୪୦% ରହିବ । କ୍ରିକେଟ ବିଜ୍ଞାପନ କ୍ଷେତ୍ରରେ ଏହାର ଏକଚାଟିଆ ଅଂଶ ରହିବ । ୨ କମ୍ପାନି ଗ୍ରାହକଙ୍କ ସଂଖ୍ୟା ବଢ଼ାଇବା ଲାଗି ପ୍ରତିଯୋଗିତା ମୂଳକ ପ୍ଲାନ ଆଣିବେ । ଯାହାର ସିଧାସଳଖ ଲାଭ ଗ୍ରାହକଙ୍କୁ ମିଳିବ ।