ଭୁବନେଶ୍ୱର,୦୩/୧୦: ଓଡ଼ିଶାରେ ଶିଳ୍ପାୟନ ପାଇଁ ଅନୁକୂଳ ପରିବେଶ ରହିଛି । ଦିଲ୍ଲୀରେ ଶିଳ୍ପପତି, ରାଷ୍ଟ୍ରଦୂତ ଓ ବିଭିନ୍ନ ଦେଶର ବାଣିଜ୍ୟିକ ମୁଖ୍ୟଙ୍କ ସହ ଜଣ ଜଣ କରି ଆଲୋଚନା କରିବି । ଓଡ଼ିଶାକୁ ଆସି ନିବେଶ କଲେ ସରକାର ସବୁ ସହଯୋଗ କରିବାର ନିର୍ଭର ପ୍ରତିଶ୍ରୁତି ଦେବି । ମହାପ୍ରଭୁ ଶ୍ରୀଜଗନ୍ନାଥଙ୍କ ଆଶୀର୍ବାଦରୁ ରାଜ୍ୟକୁ ନିଶ୍ଚୟ ଅଧିକ ନିବେଶକ ଆସିବେ । ପୁଞ୍ଜି ଖଟାଇବେ । ଶିଳ୍ପାୟନରେ ରାଜ୍ୟ ଆଗକୁ ଦୌଡ଼ିବ । ଦୁଇ ଦିନିଆ ନୂଆଦିଲ୍ଲୀ ଗସ୍ତ ପୂର୍ବରୁ ଗଣମାଧ୍ୟମକୁ ଏହା କହିଛନ୍ତି ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ।
ବେଶ୍ ଆତ୍ମବିଶ୍ୱାସର ସହ ସେ କହିଛନ୍ତି, ଗୁରୁବାର ଦିନ ତମାମ ସେ ନିବେଶକ ଓ ରାଷ୍ଟ୍ରଦୂତମାନଙ୍କ ସହ ଓଡ଼ିଶାରେ ପୁଞ୍ଜି ଲଗାଣ ନେଇ ଆଲୋଚନା କରିବେ । ରାଜ୍ୟ ସରକାର ବିଶେଷ ଭାବେ ଖାଦ୍ୟ ପ୍ରକ୍ରିୟାକରଣ, ଆଇଟି, ରାସାୟନିକ ଶିଳ୍ପ ସହ ପେଟ୍ରୋକେମିକାଲସକୁ ଅଗ୍ରାଧିକାର ଦେଉଛନ୍ତି । ଏ କ୍ଷେତ୍ରରେ ଅଧିକ ନିବେଶ ଭିଡ଼ି ଅଧିକ ନିଯୁକ୍ତି ସୁଯୋଗ ସୃଷ୍ଟି କରିବାକୁ ନିଷ୍ପତ୍ତି ହୋଇଛି । କେବଳ ଜାତୀୟସ୍ତରର ନିବେଶକ ନୁହଁ ବିଦେଶୀ ନିବେଶକଙ୍କୁ ମଧ୍ୟ ଆମେ ରାଜ୍ୟକୁ ଟାଣିବାକୁ ଯଥାସମ୍ଭବ ଉଦ୍ୟମ କରିବୁ । ରାଜ୍ୟରେ ନିବେଶ କରିବାକୁ ସରକାରଙ୍କର କ’ଣ ସବୁ ପ୍ରୋତ୍ସାହନ ବ୍ୟବସ୍ଥା ଅଛି ସେ ସଂପର୍କରେ ଆଲୋଚନା ବେଳେ ସ୍ପଷ୍ଟ ଭାବେ ଅବଗତ କରାଇ ଓଡ଼ିଶା ପ୍ରତି ଆକୃଷ୍ଟ କରାଇବୁ । ଏ ଆଲୋଚନା ସମୟରେ ନିବେଶକମାନଙ୍କୁ ‘ଉତ୍କର୍ଷ ଓଡ଼ିଶା’ ସମ୍ମିଳନୀରେ ଯୋଗ ଦେବାକୁ ନିମନ୍ତ୍ରଣ ମଧ୍ୟ ଜଣାଇବି ବୋଲି ମୁଖ୍ୟମନ୍ତ୍ରୀ କହିଛନ୍ତି ।
ମୋହନ କହିଛନ୍ତି, ରାଜ୍ୟ ସରକାର ଶିଳ୍ପକୁ ଗୁରୁତ୍ୱ ଦେଉଛନ୍ତି । ଆସନ୍ତା ୫ ବର୍ଷରେ ୫ ଲକ୍ଷ କୋଟିର ନିବେଶ ଆଣିବାକୁ ଲକ୍ଷ୍ୟ ରଖାଯାଇଛି । ଖୁସିର କଥା, ଶହେ ଦିନର ସରକାରରେ ୪୫ ହଜାର କୋଟିର ନିବେଶ ପ୍ରତିଶ୍ରୁତି ମିଳିଛି । ଇତିମଧ୍ୟରେ ବହୁ ଶିଳ୍ପପତି ମୋତେ ଭେଟି ଶିଳ୍ପ ପ୍ରତିଷ୍ଠା ପାଇଁ ଆଗ୍ରହ ଦେଖାଇବା ସହ ଆଲୋଚନା କରିଛନ୍ତି । ରାଜ୍ୟ ସରକାର ମଧ୍ୟ ଉଦ୍ୟୋଗୀମାନଙ୍କୁ ସବୁପ୍ରକାର ସହଯୋଗ ଯୋଗାଇଦେବାକୁ ପ୍ରସ୍ତୁତ ଅଛନ୍ତି । ଆସନ୍ତା ଜାନୁଆରୀ ୨୮ ଓ ୨୯ରେ ‘ଉତ୍କର୍ଷ ଓଡ଼ିଶା’ ସମ୍ମିଳନୀରେ ଅଧିକ ନିବେଶକ କିଭଳି ସାମିଲ ହୋଇ ରାଜ୍ୟରେ ପୁଞ୍ଜି ଖଟାଇବେ ତା’କୁ ଦୃଷ୍ଟିରେ ରଖି ସରକାର ରୋଡ୍ ଶୋ ସହ ନିବେଶକଙ୍କ ସହ ବୈଠକ କରିବାକୁ ନିଷ୍ପତ୍ତି ନେଇଛନ୍ତି । ପୁଞ୍ଜିପତିଙ୍କୁ ଓଡ଼ିଶାମୁହାଁ କରିବାକୁ ଆମ ଉଦ୍ୟମ ଜାରି ରହିବ । ରାଜ୍ୟବାସୀଙ୍କ ଆଶୀର୍ବାଦରେ ଆମେ ଏଥିରେ ସଫଳ ମଧ୍ୟ ହେବୁ ।
ସୂଚନାଯୋଗ୍ୟ, ମୁଖ୍ୟମନ୍ତ୍ରୀ ଗୁରୁବାର ଦିନ ହୋଟେଲ ତାଜରେ ନିବେଶକଙ୍କ ସହ ସ୍ୱତନ୍ତ୍ର ବୈଠକରେ ଯୋଗ ଦେବେ । ଫିକି ସହଯୋଗରେ ଆୟୋଜିତ ଏ ବୈଠକରେ ମୁଖ୍ୟମନ୍ତ୍ରୀଙ୍କ ସହ ଶିଳ୍ପ ମନ୍ତ୍ରୀ ସଂପଦ ଚନ୍ଦ୍ର ସ୍ୱାଇଁ, ଶିଳ୍ପ ବିଭାଗ ପ୍ରମୁଖ ସଚିବ ହେମନ୍ତ ଶର୍ମା ଓ ବରିଷ୍ଠ ଅଧିକାରୀମାନେ ମଧ୍ୟ ସାମିଲ ହେବେ । ଆସନ୍ତା ଜାନୁଆରୀ ୨୮ ଓ ୨୯ରେ ଦୁଇଦିନ ଧରି ଭୁବନେଶ୍ୱରରେ ନିବେଶକ ସମ୍ମିଳନୀ ‘ଉତ୍କର୍ଷ ଓଡ଼ିଶା’ ଅନୁଷ୍ଠିତ ହେବ । ‘ମେକ୍ ଇନ ଓଡ଼ିଶା’ ସମିଳନୀ ନାଁ ବଦଳାଇ ନୂଆ ସରକାର ଉତ୍କର୍ଷ ଓଡ଼ିଶା ରଖିଥିଲା ବେଳେ ଏଥିପାଇଁ ଇତିମଧ୍ୟରେ ଏହାର ଲୋଗୋ ଉନ୍ମୋଚନ ସରିଛି ।
