ନୂଆଦିଲ୍ଲୀ: ଭାରତୀ ଏୟାରଟେଲ୍ ନିଜର ଓ୍ବାଇଫାଇ ଗ୍ରାହକଙ୍କ ଲାଗି ବଡ଼ ଉପହାର ଦେବାକୁ ଯାଉଛି । ଏୟାରଟେଲ୍ ଓ୍ବାଇଫାଇ ବ୍ୟବହାର କରୁଥିବା ଗ୍ରାହକ ଏବେ ମାଗଣାରେ ଜି-୫ର ଡିଜିଟାଲ କଣ୍ଟେଣ୍ଟ ଦେଖିପାରିବେ । ୬୯୯ ଟଙ୍କା କିମ୍ୱା ଏହାଠୁ ଅଧିକ ଟଙ୍କାର ୱାଇଫାଇ ରିଚାର୍ଜ ପ୍ଲାନ୍ ଉପରେ ଗ୍ରାହକ ବିନା କୌଣସି ଅତିରିକ୍ତ ଶୁଳ୍କରେ ଜି-୫ର ମଜା ନେଇପାରିବେ ।
ଏଥିପାଇଁ ଏୟାରଟେଲ ଏବଂ ଜି-୫ ମଧ୍ୟରେ ବୁଝାମଣା ହୋଇଛି । ଦୁଇ କମ୍ପାନି ମଧ୍ୟରେ ବୁଝାମଣା ଅନୁସାରେ ଜି-୫ର ଏକ୍ସକ୍ଲୁସିଭ୍ କଣ୍ଟେଣ୍ଟ, ଅରିଜିନାଲ୍ ସୋ’, ଚାର୍ଟବଷ୍ଟର ଟାଇଟଲ୍ସ, ଓଟିଟି ମୁଭିଜ୍ ଏବଂ ବିଭିନ୍ନ ଭାଷାରେ ସିରିଜ୍ ଏୟାରଟେଲ୍ ୱାଇଫାଇ ଗ୍ରାହକଙ୍କ ପାଇଁ ଉପଲବ୍ଧ ହେବ । କମ୍ପାନିର ଏହି ଘୋଷଣା ପରେ ଏୟାରଟେଲ୍ ୱାଇଫାଇ୍ ଗ୍ରାହକ ଏବେ ୧.୫ ଲକ୍ଷରୁ ଅଧିକ ଘଣ୍ଟାର ଓଟିଟି କଣ୍ଟେଣ୍ଟର ଲାଭ ପାଇପାରିବେ ।
ଭାରତୀ ଏୟାରଟେଲର ମୁଖ୍ୟ ମାର୍କେଟିଂ ଅଧିକାରୀ ଅମିତ ତ୍ରିପାଠୀ କହିଛନ୍ତି, 'ଏହି ବୁଝାମଣା ଏୟାରଟେଲର ଡିଏନଏର ଅଂଶ ଏବଂ ଜି-୫ ସହ ଏହି ଚୁକ୍ତି କରି ଆମେ ଖୁସି ଅଛୁ । ଆମ ଗ୍ରାହକଙ୍କ ପାଇଁ ଏକ ବିଶ୍ୱସ୍ତରୀୟ ଡିଜିଟାଲ ଇକୋସିଷ୍ଟମ ଉପଲବ୍ଧ କରାଇବା ଦିଗରେ ଏହା ଏକ ଗୁରୁତ୍ୱପୂର୍ଣ୍ଣ ପଦକ୍ଷେପ । ଜି-୫ର ସମୃଦ୍ଧ କଣ୍ଟେଣ୍ଟ ଆମ ପୋର୍ଟଫୋଲିଓକୁ ଅଧିକ ବଳ ଦେବ ଏବଂ ଗ୍ରାହକଙ୍କୁ ନିଆରା ଅନୁଭୂତି ପ୍ରଦାନ କରିବ ।' ସେପଟେ ଏୟାରଟେଲ୍ ଓ୍ବାଇଫାଇ ଗ୍ରାହକ ପୂର୍ବରୁ ଆମାଜନ୍ ପ୍ରାଇମ୍, ନେଟଫ୍ଲିକ୍ସ ଏବଂ ହଟଷ୍ଟାରର ମଜା ନେଉଥିବା ବେଳେ ଏଣିକି ଜି-୫ ମଧ୍ୟ ମାଗଣାରେ ପାଇବେ ।
