ପୁରୀ,୨୫/୦୬: ଚାହୁଁ ଚାହୁଁ ବଡ଼ଦାଣ୍ଡରେ ଠିଆ ହେଲାଣି ରଥତ୍ରୟ । ତ୍ୱରାନ୍ୱିତ ଗତିରେ ଚାଲିଛି ଠାକୁରଙ୍କ ରଥ ନିର୍ମାଣ । ସୋମବାର ତିନି ରଥରେ ତୃତୀୟ ଭୂଇଁ ଟୁଙ୍ଗୁରା ଯାଇଛି । ଏହାପରେ ପୋଟଳ ଓରା,ପାରେଣୀ ଓ ଖମ୍ବୀ ରଖାଯାଇଛି । ଏଣିକି ବଡ଼ଛତା ପୋଟଳ ଉଠିବ । ବିଶ୍ୱକର୍ମାଙ୍କ ନିର୍ଦ୍ଦେଶରେ ଭୋଇ ସେବକମାନେ କାଠ ସବୁକୁ ରଥ ଉପରକୁ ବୋହି ନେଇଥିଲେ । ଏଥିସହ ରଥରେ ତାଗ ବାଡ଼ିଆ ଆରମ୍ଭ ହୋଇଛି । ସେଥିରେ ପଟା ବାଡ଼ିଆ ହେଲେ ରଥର ଚଟାଣ ପ୍ରସ୍ତୁତ ହେବ ।
ପୂର୍ବରୁ ରଥ ଖଳାରେ ତୃତୀୟ ଭୂଇଁ ଫ୍ରେମ୍ ପଡ଼ି ଖୋଲା ଯାଇଥିଲା । ଏହାପରେ ରଥ ଉପରକୁ ଉଠିଥିଲା ୩ୟ ଭୂଇଁ । ସୋମବାର ଭୂଇଁକାମ ଶେଷ କରାଯାଇଛି । ତୃତୀୟ ଭୂଇଁ ଉଠି ଅକାତ, ମାଛପାତିଆ, ଛିଆଣ, ଭୂଇଁ ନାହାକା ଓ ଖଦିଓରା ଆଦି ଲାଗିଲା । ଖଦିଓରା ବିନ୍ଧରେ ଭୂଇଁ ନାହାକା ସାଲ ହୋଇ ଭର୍ତ୍ତି ହେଲା । ପାଖୁଡ଼ା ଉପରେ ଅକାତ ଓ ମାଛପାତିଆ ଲଗାଯାଇଥିଲା । ଭୂଇଁ ଶେଣୀ ଉପରେ ଛିଆଣ ପଡ଼ିଥିଲା । ଏହାପରେ କଣ୍ଟା ବାଡ଼ିଆ ଯାଇଥିଲା । ଏହାପରେ ପୋଟଳ ଖମ୍ବି ଉଠି ପୋଟଳ ଓରା ଓ ପୋଟଳ ପାରେଣୀ ଲାଗିଥିଲା । ଏହା ଉପରେ ବଡ଼ ପୋଟଳ ଉଠାଯିବ । ରଥରେ ମୋଟ ୧୩ ପରସ୍ତ ପୋଟଳ ରଥରେ ସ୍ଥାପନ କରାଯିବ । ବର୍ତ୍ତମାନ ଚକକୁ ମଜଭୁତ କରିବାକୁ ପହିରେ ନଟବୋଲ୍ଟ ସହ ଲୌହ ପ୍ଲେଟ୍ ଫିଟିଂ କରୁଛନ୍ତି ।
ସୋମବାର ରଥରେ ତାଗ ବାଡ଼ିଆ ଆରମ୍ଭ ହୋଇଛି । ଗୟଳ ଉପରେ ବରଗା ଗୁଡ଼ିକ ହେଉଛି ତାଗ । ୩ ଇଞ୍ଚରେ ଅଢେଇ ଇଞ୍ଚର ୧୨ ଫୁଟିଆ ଲମ୍ବ କାଠ । ରଥ ଚାରିପଟେ ତାଗ ବାଡ଼ିଆ ପରେ ରଥରେ ପଟା ପଡ଼ିବ । ଏହାଦ୍ୱାରା ରଥର ଚଟାଣ ପ୍ରସ୍ତୁତ ହୋଇଯିବ। ବିଶ୍ୱକର୍ମାଙ୍କ ତତ୍ତ୍ୱାବଧାନରେ ଭୋଇସେବକମାନେ କାର୍ଯ୍ୟରେ ଲାଗିଛନ୍ତି । କମାର ସେବକମାନେ ତାଗରେ କଣ୍ଟା ପିଟୁଛନ୍ତି । ଏବେ ରଥଚାଳିରେ ତିନି ରଥର ଦୁଆର ଘଡ଼ା କାମ ସରିବା ଉପରେ । ଓଝା ସେବକମାନେ ଜଙ୍ଘା କଣ୍ଟା ତିଆରିଛନ୍ତି । ଏହି ବଡ଼ କଣ୍ଟା ରଥର ୧୩ ପରସ୍ତ ପୋଟଳରେ ଲାଗିବ। କରତି ସେବକ ନିଜ କାମରେ ବ୍ୟସ୍ତ ରହିଛନ୍ତି । ଚିତ୍ରକର ସେବକମାନେ ରଥାଂଶକୁ ଜୀବନ୍ତ କରିବାରେ ଲାଗିଛନ୍ତି । ତାଳଧ୍ୱଜ, ଦେବଦଳନ ଓ ନନ୍ଦିଘୋଷ ରଥରେ ସମନ୍ୱୟ ରହି କାର୍ଯ୍ୟ ଚାଲିଛି ।