ବୌଦ୍ଧ,୧୫/୦୭: ଅସରାଏ ବର୍ଷାରେ ଜମିଲା ପାଣି । ନୂତନ ଭାବେ ନିର୍ମାଣ ହୋଇଥିବା ସରକାରୀ ହାଟରେ ଦେଖିବାକୁ ମିଳିଛି ଏପରି ଦୃଶ୍ୟ । ଦୋକାନୀ ଏବଂ ଗ୍ରାହକ ହେଉଛନ୍ତି ହନ୍ତସନ୍ତ । ନିୟମାନୁଯାୟୀ ହାଟପଦା ନିର୍ମାଣ ନହେବା ଓ ଉପଯୁକ୍ତ ଡ୍ରେନେଜ୍ ବ୍ୟବସ୍ଥା ନଇବାରୁ ଏପରି ହୋଇଥିବା ଅଭିଯୋଗ କରିଛନ୍ତି ଅଞ୍ଚଳବାସୀ। 

ସୂଚନା ଅନୁଯାୟୀ, ବର୍ଷାରେ ଭାସିଲା ସରକାରୀ ହାଟପଦା । ବୌଦ୍ଧ ବ୍ଲକ ତାଳସରଡ଼ା ଗ୍ରାମ ପଞ୍ଚାୟତ ଅନ୍ତର୍ଗତ ସାହାଜପାଲରେ ଏପରି ଘଟିଛି । ନାହିଁ ନଥିବା ଅସୁବିଧାର ସାମ୍ନା କରୁଛନ୍ତି ଉଭୟ ଦୋକାନୀ ଏବଂ ଗ୍ରାହକ । ଏହାର ନିର୍ମାଣରେ ହୋଇଥିଲା ବ୍ୟାପକ ଅନିୟମିତତା ହୋଇଥିବା ଅଭିଯୋଗ ହୋଇଛି । ଉପଯୁକ୍ତ ଡ୍ରେନ ନଥିବାରୁ ହାଟ ଭିତରେ ଲହଡି ମାଡୁଛି ପାଣି । ନର୍ଦ୍ଦମା ପାଣି ଯୋଗୁ ହାଟକୁ ଆସୁଥିବା ବେପାରୀ ମାନେ ବ୍ୟବସାୟ କରିବରେ ଅସୁବିଧାର ସମ୍ମୁଖୀନ ହେଉଛନ୍ତି। ଗ୍ରାହକ ପାଣିରେ ପଶି ସାମଗ୍ରୀ କିଣି ବାକୁ ବାଧ୍ୟ ହେଉଛନ୍ତି । ଅନ୍ୟପଟେ ପାଣି ଜମି ରହିବା ହେତୁ ହାଟରେ ଥିବା ନଳକୂପର ବ୍ୟବହାର ଉପଯୋଗୀ ହୋଇପାରୁନାହିଁ । ସେପଟେ ହାଟପଦା ନିକଟରେ ଥିବା ଡାକ କାର୍ଯ୍ୟାଳୟକୁ ଯିବା କଷ୍ଟସାଧ୍ୟ ହୋଇପଡିଛି। ପଞ୍ଚାୟତ ପକ୍ଷରୁ ହାଟରୁ ସାପ୍ତାହିକ ବଟି ଆଦାୟ କରାଯାଉଥିଲେ ମଧ୍ୟ ଏହି ସମସ୍ୟା ପ୍ରତି କାହାର ଖାତିର ନାହିଁ । ଏନେଇ ବାରମ୍ବାର ପଞ୍ଚାୟତ ଅଧିକାରୀଙ୍କୁ ଜଣାଇବା ସତ୍ତ୍ୱେ କୌଣସି ସୁଫଳ ମିଳିନଥିବା ଅଭିଯୋଗ ହୋଇଛି । ତେବେ ତୁରନ୍ତ ଏ ଦିଗରେ ଜିଲ୍ଲା ପ୍ରଶାସନ ଦୃଷ୍ଟି ଦେବା ସହିତ ଏହାର ପ୍ରତିକାର କରିବାକୁ ସ୍ଥାନୀୟ ଲୋକେ ଦାବି କରିଛନ୍ତି ।