ଭୁବନେଶ୍ୱର ୨୪/୧୦: ବାତ୍ୟା ଯୋଗୁଁ କିଭଳି ରେଳ ଚଳାଚଳ ବିଶେଷ ଭାବେ ବାଧାପ୍ରାପ୍ତ ହେବନି, ସେ ନେଇ ସମୀକ୍ଷା କରିଛନ୍ତି ରେଳମନ୍ତ୍ରୀ ଅଶ୍ୱିନୀ କୁମାର ବୈଷ୍ଣବ । ଉଭୟ ପଶ୍ଚିମବଙ୍ଗ ଓ ଓଡ଼ିଶାର ବିଭିନ୍ନ ରେଳ ଅଧିକାରୀଙ୍କ ସହ ଏ ନେଇ ଆଭାସୀରେ ଆଲୋଚନା କରିଛନ୍ତି । ବାତ୍ୟା ବେଳେ କିଭଳି ସୁଚାରୁ ଭାବେ ରିଲିଫ୍ ପରିବହନ କରାଯାଇପାରିବ, ଯାତ୍ରୀ ସୁରକ୍ଷା କିଭଳି ପ୍ରଭାବିତ ହେବନି ତାହାକୁ ଗୁରୁତ୍ୱ ଦେଇଛନ୍ତି ରେଳମନ୍ତ୍ରୀ ।
ବାତ୍ୟା ମୁକାବିଲା ପାଇଁ ୨ ରାଜ୍ୟରେ ୯ଟି ୱାର୍ ରୁମ୍ ଗଢ଼ାଯାଇଛି । ପ୍ରତି ୱାର ରୁମ୍ରେ ପାୱାର ବ୍ୟାକ୍ ଅପ୍ ରହୁଥିବା ୨୦ଟି ସାଟେଲାଇଟ୍ ଫୋନ୍ ଦିଆଯାଇଛି । ଏହି ୱାର ରୁମ୍ରେ ଇଞ୍ଜିନିୟରିଂ ବିଭାଗ, ପରିଚାଳନା ବିଭାଗ, ବାଣିଜ୍ୟ ବିଭାଗ ଓ ଆର୍ପିଏଫ୍ର ଅଧିକାରୀମାନଙ୍କୁ ନେଇ ପରିଚାଳନା କରାଯିବ । ସେହିପରି ତୁରନ୍ତ ଟ୍ରାକ୍ ମରାମତି, ସିଗନାଲ୍ ଓ ବିଦ୍ୟୁତ ବ୍ୟବସ୍ଥା ସଜାଡିବା ପାଇଁ ସୋରୋ ଓ ଜଳେଶ୍ୱର ସମେତ ବିଭିନ୍ନ ଗୁରୁତ୍ୱପୂର୍ଣ୍ଣ ଷ୍ଟେସନରେ ବିଶେଷଜ୍ଞ ଦଳ ଅଛନ୍ତି । ୬ ଶହ ଅଧିକାରୀ ନିୟୋଜିତ ହୋଇଛନ୍ତି । ୭ଟି ଟ୍ରଲି, ୭ଟି କୋଚ୍ ଓ ଟାୱାର ୱାଗନ୍ ସମେତ ବିଭିନ୍ନ ଯନ୍ତ୍ରପାତି ପ୍ରସ୍ତୁତ ହୋଇ ରହିଛି । ତୁରନ୍ତ ପୁନରୁଦ୍ଧାର ପାଇଁ ପୂର୍ବତଟ ରେଳପଥ ପକ୍ଷରୁ ରେଡ୍ ଆଲର୍ଟ ଜାରି କରାଯାଇଛି ।
ପ୍ରଭାବିତ ହେବାର ସମ୍ଭାବନା ଥିବା ବିଭିନ୍ନ ରେଳ ଷ୍ଟେସନଗୁଡ଼ିକରେ ବ୍ୟାପକ ଖାଦ୍ୟ ଓ ପିଇବା ପାଣି ବ୍ୟବସ୍ଥା କରାଯାଇଛି । ବିଭିନ୍ନ ଷ୍ଟେସନ ପାଇଁ ହେଲ୍ପ୍ ଡେସ୍କ୍ ନମ୍ବର ଜାରି କରାଯାଇଛି । ପୁରୀ ପାଇଁ ୮୯୨୬୧୦୦୩୫୬, ଖୋର୍ଦ୍ଧା ରୋଡ୍-୮୯୨୬୧୦୦୨୧୫, ଭୁବନେଶ୍ୱର-୮୧୧୪୩୮୨୩୭୧, କଟକ– ୮୧୧୪୩୮୨୩୫୯, ପାରାଦୀପ-୮୧୧୪୩୮୮୩୦୨, ଯାଜପୁର-କେନ୍ଦୁଝର ରୋଡ୍-୮୧୧୪୩୮୨୩୪୨, ଭଦ୍ରକ-୮୧୧୪୩୮୨୩୦୧,ପଲାସା-୮୧୧୪୩୮୨୩୧୯ ଓ ବ୍ରହ୍ୱପୁର ପାଇଁ ୮୧୧୪୩୮୨୩୪୦ ହେଲ୍ପଲାଇନ୍ ନମ୍ବର ଜାରି କରାଯାଇଛି।