ମୁମ୍ବାଇ,୧୮।୯:  କଂଗ୍ରେସର ବରିଷ୍ଠ ନେତା ରାହୁଲ ଗାନ୍ଧୀଙ୍କୁ ଜୀବନରେ ମାରିବାକୁ ହେଉଛି ଷଡଯନ୍ତ୍ର। ଏଭଳି ଏକ ଅଭିଯୋଗ ଆଣିଛନ୍ତି ଶିବସେନାର ବରିଷ୍ଠ ନେତା ସଞ୍ଜୟ ରାଉତ। ରାଜ୍ୟର ଶାସକ ଦଳ ବିଜେପିର ନେତା ରାହୁଲଙ୍କୁ ନେଇ ଦେଇଥିବା ମନ୍ତବ୍ୟକୁ ସେ ନିନ୍ଦା କରିଛନ୍ତି। ଏହା ସହ ବିଜେପି ନେତାଙ୍କ ମନ୍ତବ୍ୟ ପରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଓ କେନ୍ଦ୍ର ଗୃହମନ୍ତ୍ରୀ  ଅମିତ ଶାହ ଚୁପ୍‌ ଥିବା ନେଇ ସେ ପ୍ରଶ୍ନ ଉଠାଇଛନ୍ତି। 

ସଞ୍ଜୟ ରାଉତ କହିଛନ୍ତି, ରାହୁଲଙ୍କ ସ୍ଥିତି ତାଙ୍କ ଜେଜେ ମା’ (ଇନ୍ଦିରା ଗାନ୍ଧୀ) ଓ ବାପା (ରାଜୀବ ଗାନ୍ଧୀ)ଙ୍କ ଭଳି ହେବ ବୋଲି ତାଙ୍କୁ ଧମକ ଦିଆଯାଉଛି। ପ୍ରଧାନମନ୍ତ୍ରୀ ଓ ଗୃହମନ୍ତ୍ରୀ ଏହି କଥା ଜାଣିବା ପରେ ମଧ୍ୟ ଚୁପ୍ ଅଛନ୍ତି। କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରୁନାହାନ୍ତି। ଏହାର ଅର୍ଥ ସେ ଏଭଳି ଟିପ୍ପଣି ଦେଇଥିବା ଲୋକଙ୍କ ସହ ଅଛନ୍ତି। 

ସେ କହିଛନ୍ତି, ରାହୁଲ ବର୍ତ୍ତମାନ ବିରୋଧି ଦଳ ନେତା ଓ ତାଙ୍କୁ କ୍ୟାବିନେଟ୍‌ ରାଙ୍କ ମିଳିଛି।ଯେତେବେଳେ ଆପଣଙ୍କ ପାର୍ଟିର ଲୋକ ତାଙ୍କ ଉପରେ ଆକ୍ରାମକ କରିବା କଥା କହୁଛନ୍ତି ସେ ସମୟରେ ଆପଣ(ପ୍ରଧାନମନ୍ତ୍ରୀ-ଗୃହମନ୍ତ୍ରୀ) ଚୁପ୍ ରହୁଛନ୍ତି। ଆମେ ଏହାକୁ ବରଦାସ୍ତ କରିବୁ ନାହିଁ। ରାହୁଲଙ୍କ ବିରୋଧରେ ଏଭଳି ଷଡଯନ୍ତ୍ରର ଅର୍ଥ ହେଉଛି ତାଙ୍କ ଜୀବନ ପ୍ରତି ବିପଦ ରହିଛି। କିଛି ଲୋକ ଆକ୍ରମଣ କରିବାକୁ ଚେଷ୍ଟା କରୁଛନ୍ତି। ଉଲ୍ଳେଖନୀୟ ଯେ, ବିଜେପି ରାଜ୍ୟସଭା ସାଂସଦ ଅନିଲ ବୋଣ୍ଡେ କହିଛନ୍ତି, ରାହୁଲଙ୍କ ଜିଭ କାଟିଦେବା ଦରକାର, କାରଣ ସେ ସଂରକ୍ଷଣ ବିଷୟରେ ଯାହା କହୁଛନ୍ତି, ତାହ ବିପଦଜନକ।ତାଙ୍କ ପରେ ଶିବସେନା(ସିନ୍ଦେ ଗୋଷ୍ଠୀ) ବୁଲଢାଣା ବିଧାୟକ ସଞ୍ଜୟ ଗାଏକଓ୍ବାଡ କହିଥିଲେ ଯିଏ ଏଭଳି କରିବ ତାଙ୍କୁ ୧୧ ଲକ୍ଷ ଟଙ୍କା ପୁରସ୍କାର ଦିଆଯିବ।