ସମ୍ବଲପୁର,୦୫/୧୨: ସାରା ଦେଶରେ ମୁକ୍ତିଲାଭ କରିଛି ଲୋକପ୍ରିୟ ସିନେମା ପୁଷ୍ପା-୨: ଦ ରୁଲ୍ । ଏଥିପାଇଁ କାହିଁରେ କଣ କ୍ରେଜ୍ । ହେଲେ ସମ୍ବଲପୁରରେ ଏହି ସିନେମା ଦେଖିବାକୁ ମିଳୁନି । ସହରରେ ଏକମାତ୍ର ପ୍ରେକ୍ଷାଳୟ ବନ୍ଦ ଥିବାରୁ ସମ୍ବଲପୁରରେ ଫିଲ୍ମ ରିଲିଜ୍ ହୋଇପାରିନାହିଁ । ଲୋକପ୍ରିୟ ଅଭିନେତା ଅଲ୍ଲୁ ଅର୍ଜୁନଙ୍କ ଫ୍ୟାନ୍ ବୁଧବାର ଦିନସାରା ପ୍ରେକ୍ଷାଳୟ ବାହାରେ ଟିକଟ୍ କାଟିବାକୁ ଅପେକ୍ଷା କରି ଶେଷରେ ନିରାଶ ହୋଇ ଫେରିଥିଲେ । ଆଉ ସମସ୍ତଙ୍କ ମୁହଁରେ ଗୋଟିଏ କଥା ଥିଲା ‘ସମ୍ବଲପୁରରେ ନଇଁଲା ପୁଷ୍ପା’ ।
ସମ୍ବଲପୁରରେ ଏକ ମଲ୍ରେ ଏକମାତ୍ର ପ୍ରେକ୍ଷାଳୟ ରହିଛି । ହେଲେ ମଲ୍ ଓ ହଲ୍ ମାଲିକଙ୍କ ମଧ୍ୟରେ ଥିବା ବିବାଦରୁ ଗତ ୫ ଦିନ ହେଲା ଏହା ବନ୍ଦ ରହିଛି । ଏମିତ କି, ପ୍ରେକ୍ଷାଳୟର ବିଦ୍ୟୁତ୍ ବି କଟାଯାଇଛି । ତେଣୁ ସମ୍ବଲପୁରବାସୀ ଗତ କିଛି ଦିନ ହେଲା ସିନେମା ଦେଖାରୁ ବଞ୍ଚିତ ହୋଇଛନ୍ତି । ଦିନେ, ସମ୍ବଲପୁରରେ ସିନେମାକୁ ନେଇ କାହିଁରେ କଣ କ୍ରେଜ୍ ଥିଲା । ସେତେବେଳେ ୩ଟି ହଲ୍ ବି ଥିଲା । ହେଲେ ଏବେ ସହର ବଢ଼ିଥିଲେ ମଧ୍ୟ ସିନେମା ଶିଳ୍ପର ବିକାଶ ନ ହେବାରୁ ହଲ୍ ବି ବୁଡ଼ିଗଲା । କେବଳ ଏକ ମାତ୍ର ପ୍ରେକ୍ଷାଳୟରେ ସମ୍ବଲପୁରବାସୀ ସିନେମା ଦେଖିବାକୁ ସୁଯୋଗ ପାଉଥିଲେ । ହେଲେ ହଲ୍ ଓ ମଲ୍ ମାଲିକଙ୍କ ବିବାଦ ପାଇଁ ଏହା ବି ବନ୍ଦ ରହିଛି ।
ଅନ୍ଲାଇନ୍ରେ ସମ୍ବଲପୁରରେ ଟିକଟ୍ ନ ଦେଖାଇବାରୁ ବୁଧବାର ସକାଳେ ପ୍ରେକ୍ଷାଳୟ ସମ୍ମୁଖରେ ବହୁ ଲୋକଙ୍କ ଭିଡ ଜମିଥିଲା । ଆଗୁଆ ଟିକଟ୍ କାଟିବାକୁ ସମସ୍ତେ ଲମ୍ବା ଧାଡି ବି କରିଥିଲେ । କିନ୍ତୁ ହଲ୍ ମାଲିକ ଫିଲ୍ମ ଚାଲିବନି ବୋଲି କହିବା ପରେ ଅସନ୍ତୋଷ ଦେଖା ଦେଇଥିଲା । ସିନେପ୍ରେମୀ ନିରାଶ ହୋଇ ଫେରିଯାଇଥିଲେ । ସମ୍ବଲପୁରରେ ଗେଟି ଟକିଜ, ଲକ୍ଷ୍ମୀ ଟକିଜ ଏବଂ ଅଶୋକା ଟକିଜର କ୍ରେଜ ଆଜିଯାଏଁ ବି ରହିଛି । କିନ୍ତୁ ବ୍ୟବସାୟୀକ ସଫଳତା ଓ ସମୟାନୁସାରେ ପରିବର୍ତ୍ତନ ନ ହେବାରୁ ଏହି ୩ଟି ହଲ୍ ବନ୍ଦ ହୋଇଯାଇଥିଲା ବୋଲି କହିଛନ୍ତି ସମ୍ବଲପୁର ବାସିନ୍ଦା ମୁକେଶ ଜରିୱାଲ । ତତ୍କାଳୀନ ରାଜ୍ୟ ସରକାର ଏଥିପାଇଁ କୌଣସି ପଦକ୍ଷେପ ଗ୍ରହଣ କଲେ ନାହିଁ । ଗୋଟିଏ ସମୟରେ ସମ୍ବଲପୁର ସବୁ ହଲ୍ ବନ୍ଦ ହୋଇଯାଇଥିଲା । ଗୋଟିଏ ବି କାର୍ଯ୍ୟକ୍ଷମ ହୋଇନଥିଲା । କିନ୍ତୁ ଏବେ ଗୋଟିଏ ପ୍ରେକ୍ଷାଳୟ ଖୋଲିଛି । ଯଦି ଏହା ବି ବନ୍ଦ ହୋଇଯିବ, ତାହେଲେ ଲୋକ କେଉଁଠି ଦେଖିବେ? ପୁଷ୍ପା-୨ ଦେଖିବାକୁ ଟିକଟ ପାଇଁ ଲାଇନ ଲଗାଇଥିବା ସନ୍ଦୀପ କୁମାର ବେହେରା କହିଛନ୍ତି, ଆମେ ଜାଣିନଥିଲୁ କେବେଠୁ ଏହି ପ୍ରେକ୍ଷାଳୟ ବନ୍ଦ ହୋଇଯାଇଛି । ତେଣୁ ଆଗୁଆ ଟିକଟ ନେବାକୁ ଧାଇଁ ଆସିଥିଲୁ । ହେଲେ ହଲ୍ ବନ୍ଦ ଥିବା ଜାଣି ଏବେ ନିରାଶରେ ଫେରୁଛୁ । ଏନେଇ ହଲ୍ କର୍ତ୍ତୃପକ୍ଷ କହିଛନ୍ତି, ଖୁବଶୀଘ୍ର ଏହି ମାମଲାର ଅନ୍ତ ଘଟିବ । ଲୋକ ପୁଣି ଥରେ ସିନେମାର ମଜା ନେଇପାରିବେ । ଅନ୍ୟ ପକ୍ଷେ ମଲ୍ ମାଲିକଙ୍କ ପ୍ରତିକ୍ରିୟା ମିଳିନାହିଁ ।
