ପୁରୀ,୨୭/୦୭: ବଳିଆପଣ୍ଡାସ୍ଥିତ ଷ୍ଟର୍ଲିନ୍ ଗୋଲେଇ ଛକ ନିକଟ ବେଳାଭୂମିରେ ବେଆଇନ୍ ଭାବେ ନିର୍ମାଣାଧୀନ ଏକ କୋଠାର ନିର୍ମାଣ କାର୍ଯ୍ୟକୁ ବନ୍ଦ କରିଛି ଜିଲ୍ଲାପ୍ରଶାସନ । ଜିଲ୍ଲାପାଳ ସିଦ୍ଧାର୍ଥ ଶଙ୍କର ସ୍ୱାଇଁଙ୍କ ନିର୍ଦ୍ଦେଶକ୍ରମେ ପିକେଡିଏ ତରଫରୁ ଗୃହ ନିର୍ମାଣ କାର୍ଯ୍ୟ ବନ୍ଦ କରିବା ଲାଗି କାନ୍ଥରେ ଏକ ନୋଟିସ୍ ଲଗାଯାଇଛି । ଆଗକୁ ଆଉ ନିର୍ମାଣ ନ କରିବାକୁ ନୋଟିସ୍ରେ ଉଲ୍ଲେଖ ରହିଛି । ଏନେଇ ମଧ୍ୟ ଗୃହ ନିର୍ମାଣକାରୀ ହରଚଣ୍ଡୀସାହି ନାଗାମଠଲେନ୍ର ପୂର୍ଣ୍ଣିମା ପଟ୍ଟନାୟକଙ୍କୁ ନୋଟିସ୍ କରିଛି ପିକେଡିଏ ।
ଏସମ୍ପର୍କରେ ଜିଲ୍ଲାପାଳ ଶ୍ରୀ ସ୍ୱାଇଁ କହିଛନ୍ତି, ବେଳାଭୂମିରେ ଗୃହ ନିର୍ମାଣ କାର୍ଯ୍ୟ ବେଆଇନ୍ । ତେବେ ପୂର୍ବରୁ ସେଟେଲମେଣ୍ଟ ସମୟରେ ବେଳାଭୂମିର କିଛି ଅଂଶ ସ୍ଥିତିବାନ ଜମି ଭାବେ ଲୋକଙ୍କୁ ମିଳିଥିଲା । ସେହି ଆଳରେ ସେମାନେ ବେଳାଭୂମିରେ ଗୃହ ନିର୍ମାଣ କରୁଛନ୍ତି । ତେବେ ପ୍ରଥମେ ବେଳାଭୂମିରେ ଗୃହ ନିର୍ମାଣ କାର୍ଯ୍ୟକୁ ବନ୍ଦ କରାଯାଇଛି । ଏହା ସହିତ ସେହି ନିକଟରେ ବେଳାଭୂମିକୁ ମଧ୍ୟ ଖଣ୍ଡ ଖଣ୍ଡ କରି ପ୍ଲଟିଂ କରାଯାଇଛି । ତେବେ ତାଙ୍କୁ କିଭଳି ବେଳାଭୂମିରେ ଜମି ମିଳିଲା ସେ ନେଇ ଖୁବ୍ଶୀଘ୍ର ତଦନ୍ତ କରିବାକୁ ଉପଜିଲ୍ଲାପାଳଙ୍କୁ ନିର୍ଦ୍ଦେଶ ଦିଆଯାଇଛି । ତଦନ୍ତ ପରେ ବେଆଇନ୍ ନିର୍ମାଣକାରୀଙ୍କ ବିରୋଧରେ ଦୃଢ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ । ସେହିଭଳି କୌଣସି ବ୍ୟକ୍ତି ସରକାରୀ ଜମିକୁ ନୋଟାରୀ ଜରିଆରେ କିଣନ୍ତୁ ନାହିଁ ବୋଲି ଅପିଲ କରିଛନ୍ତି ଜିଲ୍ଲାପାଳ ଶ୍ରୀ ସ୍ୱାଇଁ ।
ପୁରୀ ସହର ପରିସରରୁ ଆରମ୍ଭ କରି ବେଳାଭୂମି ପର୍ଯ୍ୟନ୍ତ ଅନେକ ବେଆଇନ୍ ଭାବେ ନିର୍ମାଣ କରାଯାଉଛି । କେଉଁଠି ପିକେଡିଏ ନିୟମ ତ, ଅନ୍ୟ କେଉଁଠି ସିଆରଜେଡ୍ ନିୟମକୁ ଖୋଲାଖୋଲି ଉଲ୍ଲଘଂନ କରାଯାଇ ବେଧଡ଼କ ଭାବେ ନିର୍ମାଣ କାର୍ଯ୍ୟ ଜାରି ରହିଛି । ଏନେଇ ଅଭିଯୋଗ ସତ୍ତେ୍ୱ ପ୍ରଶାସନର ଆଖିଦୃଶିଆ ପଦକ୍ଷେପ ଗ୍ରହଣ କରାଯାଉନଥିବାରୁ ପରୋକ୍ଷରେ ସେମାନଙ୍କୁ ସାହସକୁ ଦ୍ୱିଗୁଣିତ କରିଛି । ଯାହାର ଜ୍ୱଳନ୍ତ ଉଦାହରଣ ଦେଖିବାକୁ ମିଳିଛି ଷ୍ଟର୍ଲିନ୍ ଛକ ସିପସରୁବାଲି ମୌଜାରେ । ଏହି ଛକ ଦେଇ ରାଜ୍ୟର ମନ୍ତ୍ରୀ ଓ ବରିଷ୍ଠ ଅଧିକାରୀମାନେ ଯାତାୟତ କରୁଥିବା ବେଳେ କାହାରି ନଜର ଏହି ବେଆଇନ୍ ନିର୍ମାଣ ଉପରେ ପଡୁନାହିଁ । ଦିନଦ୍ୱିପ୍ରହରରେ ବେଳାଭୂମିରେ ଏସବୁ ବେଆଇନ୍ ଗୃହ ନିର୍ମାଣ ଚାଲୁଛି । କେତେକ ଗୃହର ମୂଳଦୁଆ ପଡ଼ିଥିବା ବେଳେ କେତେକର ନିର୍ମାଣ କାର୍ଯ୍ୟ ଆରମ୍ଭ ହେଉଛି । ଏସବୁ ବେଆଇନ୍ ନିର୍ମାଣ ସମ୍ପର୍କରେ ଜିଲ୍ଲାପାଳ ଶ୍ରୀ ସ୍ୱାଇଁ ଅବଗତ ହେବା ପରେ ନିର୍ମାଣ କାର୍ଯ୍ୟ ବନ୍ଦ କରିବା ଲାଗି ନିର୍ଦ୍ଦେଶ ଦେଇଛନ୍ତି । ଅନ୍ୟପକ୍ଷରେ ସିଆର୍ଜେଡ୍ ନିୟମ ଅନୁସାରେ ବେଳାଭୂମିର ୫୦୦ ମିଟର ଦୂରରେ ଗୃହ ନିର୍ମାଣ ହେବା କଥା । କିନ୍ତୁ ଏହି ନିୟମକୁ ଉଲ୍ଲଘଂନ କରାଯାଇ ୩୦୦ମିଟର ପରିସରରେ କଂକ୍ରିଟ୍ରେ ଗୃହ ନିର୍ମାଣ କରିବା ସହ ନିକଟରେ ଥିବା ବେଳାଭୂମିକୁ ପ୍ଲଟିଂ କରାଯାଇଛି ।
ଏହି ପ୍ଲଟିଂ ଜାଗାଗୁଡ଼ିକ ପାଚେରି ତିଆରି କରାଯାଇ ଦଖଲରେ ନିଆଯାଇଛି । ତେବେ ଏହା ଉପରେ ପ୍ରଶାସନ ଦୃଷ୍ଟି ଦେବାକୁ ବୁଦ୍ଧିଜୀବୀଙ୍କ ମହଲରେ ଦାବି ଜୋର ଧରିଛି । ଏସମ୍ପର୍କରେ ପିକେଡିଏ ସଚିବ ମାୟାଧର ବେହେରା କୁହନ୍ତି, ସିପସରୁବାଲି ମୌଜାର ଖାତା ନଂ ୧୪୨/୪୯/୬୦ ହୋଇଥିବା ବେଳେ ପ୍ଲଟ ନଂ ୨୫୬/୫୬୦ରେ ଗୃହ ନିର୍ମାଣ କରୁଥିଲେ ପୂର୍ଣ୍ଣିମା ପଟ୍ଟନାୟକ । ତାଙ୍କ ନିର୍ମାଣ କାର୍ଯ୍ୟକୁ ବନ୍ଦ କରାଯାଇଛି । ସିଆର୍ଜେଡ ନିୟମ ଉଲ୍ଲଘଂନ ହେଉଥିବା ବେଳେ ଉକ୍ତ ଗୃହ ମାଲିକଙ୍କୁ ଅନେକ ଆପତ୍ତିବିହୀନ ପ୍ରମାଣପତ୍ର ଅଣାଯିବାକୁ ଚିଠି ଲେଖାଯାଇଥିଲା । ତେବେ ସେସବୁ ନ ଥିବା ସ୍ଥଳେ ସେ କିଭଳି ନିର୍ମାଣ ଆରମ୍ଭ କରୁଛନ୍ତି ତାହା ଆଶ୍ଚର୍ଯ୍ୟର ବିଷୟ । ଏନେଇ ଜିଲ୍ଲାପାଳଙ୍କୁ ଅବଗତ କରାଯାଇଛି । ଜିଲ୍ଲାପାଳଙ୍କ ନିର୍ଦ୍ଦେଶ ଅନୁସାରେ ପିକେଡିଏ ପକ୍ଷରୁ ନିର୍ମାଣାଧୀନ କୋଠାର କାର୍ଯ୍ୟ ବନ୍ଦ କରାଯାଇଛି । ପରବର୍ତ୍ତୀ ସମୟରେ ଏହାକୁ ଭାଙ୍ଗି ଦିଆଯିବ ।
ସୂଚନାଥାଉକି, କିଛି ବର୍ଷପୂର୍ବେ ଏହି ସ୍ଥାନରେ ବେଆଇନ୍ ଗୃହ ନିର୍ମାଣ କାର୍ଯ୍ୟ ଆରମ୍ଭ ହୋଇଥିଲା । ଏନେଇ ଗଣମାଧ୍ୟମରେ ଖବର ପ୍ରକାଶ ପାଇବା ପରେ ପୂର୍ବତନ ଉପଜିଲ୍ଲାପାଳ ନିର୍ମାଣ କାର୍ଯ୍ୟ ବନ୍ଦ କରିଥିଲେ । ପୁଣି ସେହି ସ୍ଥାନରେ ନିର୍ମାଣ କାର୍ଯ୍ୟ ସହ ପ୍ଲଟିଂ କରାଯାଇ ଲୋକେ ଦଖଲ ନେଇ ଖୁଣ୍ଟ ପୋତିଛନ୍ତି । ଏସବୁ ବେଆଇନ୍ କାର୍ଯ୍ୟ ଉପରେ ନଜର ରଖାଯାଇଛି।