ନୂଆଦିଲ୍ଲୀ,୦୫/୦୪: ପର୍ତ୍ତୁଗାଲ ଏବଂ ସ୍ଲୋଭାକିଆ ଗସ୍ତରେ ଯିବେ ଭାରତର ରାଷ୍ଟ୍ରପତି ଦ୍ରୌପଦୀ ମୁର୍ମୁ । ପର୍ତ୍ତୁଗାଲ ରାଷ୍ଟ୍ରପତି ମାର୍ସେଲୋ ରେବେଲୋ ଡି ସୌସାଙ୍କ ନିମନ୍ତ୍ରଣ କ୍ରମେ ଏପ୍ରିଲ ୭-୮ ରେ ପର୍ତ୍ତୁଗାଲ ଗସ୍ତରେ ଯିବେ ଦ୍ରୌପଦୀ ମୁର୍ମୁ। ବୈଦେଶିକ ମନ୍ତ୍ରଣାଳୟ ଅନୁଯାୟୀ, ରାଷ୍ଟ୍ରପତି ମୁର୍ମୁ ତାଙ୍କର ୪ ଦିନିଆ ଗସ୍ତର ଦ୍ୱିତୀୟ ପର୍ଯ୍ୟାୟରେ ସ୍ଲୋଭାକିଆ ଗସ୍ତ କରିବେ। ୨୯ ବର୍ଷ ମଧ୍ୟରେ ସ୍ଲୋଭାକିଆକୁ ତାଙ୍କର ପ୍ରଥମ ଗସ୍ତ ହେବ। ସେ ଏହି ଦୁଇଟି ଗସ୍ତରେ ଏପ୍ରିଲ ୧୦ ପର୍ଯ୍ୟନ୍ତ ରହିବେ।
ୟୁରୋପ ସହିତ ଭାରତର ସମ୍ପର୍କ ପୂର୍ବ ଅପେକ୍ଷା ଭଲ ହେଉଛି। ଏହି ପରିପ୍ରେକ୍ଷୀରେ ରାଷ୍ଟ୍ରପତିଙ୍କ ଏହି ଯାତ୍ରା ଆହୁରି ଗୁରୁତ୍ୱପୂର୍ଣ୍ଣ ହୋଇପାରେ। କିଛି ସପ୍ତାହ ପୂର୍ବରୁ, ୟୁରୋପୀୟ କମିଶନର ଅଧ୍ୟକ୍ଷ ଉର୍ସୁଲା ଭନ୍ ଡେର ଲେଏନ୍ ଏବଂ କମିଶନର କଲେଜ ଭାରତ ଗସ୍ତ କରିଥିଲେ। ସେହି ସମୟରେ ଘୋଷଣା କରାଯାଇଥିଲା ଯେ, ଭାରତ-ୟୁରୋପୀୟ ସଂଘ ମୁକ୍ତ ବାଣିଜ୍ୟ ଚୁକ୍ତିନାମା ଏହି ବର୍ଷ ଚୂଡ଼ାନ୍ତ ହେବ। ଗଣମାଧ୍ୟମ ସହିତ କଥାବାର୍ତ୍ତା ସମୟରେ, ବୈଦେଶିକ ମନ୍ତ୍ରଣାଳୟ ସଚିବ ତନ୍ମୟ ଲାଲ ରାଷ୍ଟ୍ରପତି ମୁର୍ମୁଙ୍କ ବୈଠକକୁ ଦୁଇଟି ଗୁରୁତ୍ୱପୂର୍ଣ୍ଣ ଐତିହାସିକ ଗସ୍ତ ବୋଲି କହିଥିଲେ। ସେ କହିଛନ୍ତି ଯେ, ପର୍ତ୍ତୁଗାଲ ଗସ୍ତ ଐତିହାସିକ। କାରଣ ଏହା ନୂଆଦିଲ୍ଲୀ ଏବଂ ଲିସବନ ମଧ୍ୟରେ କୂଟନୈତିକ ସମ୍ପର୍କର ୫୦ତମ ବାର୍ଷିକୀ ପାଳନ କରୁଛି। ପର୍ତ୍ତୁଗାଲ ରାଷ୍ଟ୍ରପତି ଡି ସୌସା ୨୦୨୦ ମସିହାରେ ଭାରତ ଗସ୍ତରେ ଆସିଥିବା ବେଳେ ପ୍ରଧାନମନ୍ତ୍ରୀ ଆଣ୍ଟୋନିଓ କୋଷ୍ଟା ୨୦୧୯ ମସିହାରେ ଭାରତ ଗସ୍ତ କରିଥିଲେ।
ଏହା ମଧ୍ୟ ପଢନ୍ତୁ- ଘମାଘୋଟ ବାଣିଜ୍ୟ ଯୁଦ୍ଧ: ଆଗକୁ ମାଡ଼ିଆସୁଛି ମହାମାନ୍ଦାବସ୍ଥା, ବିଶ୍ୱ ଅର୍ଥନୀତିରେ ହେବ ସୁନାମୀ
ପର୍ତ୍ତୁଗାଲରେ ରାଷ୍ଟ୍ରପତି ମୁର୍ମୁ ପର୍ତ୍ତୁଗାଲର ପ୍ରଧାନମନ୍ତ୍ରୀ ଲୁଇସ୍ ମୋଣ୍ଟେନେଗ୍ରୋ ଏବଂ ରାଷ୍ଟ୍ରୀୟ ବିଧାନସଭା ବାଚସ୍ପତି ଜୋସେ ପେଡ୍ରୋ ଆଗୁଆର-ବ୍ରାନକୋଙ୍କୁ ଭେଟିବେ। ସେ ସ୍ଲୋଭାକିଆ ରାଷ୍ଟ୍ରପତି ପିଟର ପେଲେଗ୍ରୀନି ଏବଂ ପ୍ରଧାନମନ୍ତ୍ରୀ ରବର୍ଟ ଫିକୋଙ୍କ ସହ କରିବେ ଦ୍ୱିପାକ୍ଷିକ ଆଲୋଚନା। ଏନେଇ ତନ୍ମୟ ଲାଲ କହିଛନ୍ତି ଯେ, ରାଷ୍ଟ୍ରପତି ପର୍ତ୍ତୁଗାଲରେ ଥିବା ଭାରତୀୟ ସମ୍ପ୍ରଦାୟର ସଦସ୍ୟମାନଙ୍କୁ ଭେଟିବେ ଏବଂ ବିଭିନ୍ନ ବିଶ୍ୱବିଦ୍ୟାଳୟ ଏବଂ ଶିକ୍ଷାନୁଷ୍ଠାନର ଭାରତୀୟ ଗବେଷକଙ୍କ ସହ ମଧ୍ୟ ଆଲୋଚନା କରିବେ। ପ୍ରକାଶ ଥାଉକି, ତତ୍କାଳୀନ ରାଷ୍ଟ୍ରପତି କେ.ଆର. ନାରାୟଣନ ୧୯୯୮ ମସିହାରେ ପର୍ତ୍ତୁଗାଲ ଗସ୍ତ କରିଥିଲେ। ତେବେ ସ୍ଲୋଭାକିଆରେ ୬ ହଜାର ଭାରତୀୟ ପ୍ରବାସୀ ବାସ କରୁଛନ୍ତି । ଏହା ଦୁଇ ଦେଶ ମଧ୍ୟରେ ବିଶେଷକରି ଅଟୋମୋବାଇଲ୍, ଇଞ୍ଜିନିୟରିଂ ଏବଂ ଆଇଟି କ୍ଷେତ୍ରରେ ଦ୍ୱିପାକ୍ଷିକ ବାଣିଜ୍ୟକୁ ବୃଦ୍ଧି କରିବ। ଅଧିକାରୀମାନେ କହିଛନ୍ତି ଯେ ସ୍ଲୋଭାକିଆ କମ୍ପାନୀଗୁଡ଼ିକ ଭାରତରେ ଇସ୍ପାତ ଉତ୍ପାଦନ, ଆଇଟି ହାର୍ଡୱେୟାର ଏବଂ ପ୍ରତିରକ୍ଷା କ୍ଷେତ୍ରରେ ମଧ୍ୟ ନିବେଶ କରୁଛନ୍ତି।
