ମାଲକାନଗିରି, ୦୫/୦୪: ମାଓ ଦମନ ଅଭିଯାନକୁ ମିଳିଲା ସଫଳତା । ଭୁଷୁଡ଼ୁଛି ଲାଲ୍ ଗଡ଼ । ଦୁର୍ବଳ ହେଉଛି ମାଓ ସଙ୍ଗଠନ । ପିଏଲଜିଏ ବାଟାଲିୟନର ମୁଖ୍ୟ ବର୍ସେ ଦେବାଙ୍କ ଭାଇ ସମେତ ୪ ଜଣ ହାର୍ଡକୋର୍ ମାଓବାଦୀ ସୁକୁମା ପୋଲିସ ନିକଟରେ ଆତ୍ମସମର୍ପଣ କରିଛନ୍ତି । ୪ ମାଓବାଦୀଙ୍କ ମଧ୍ୟରେ ୩ ଜଣ ପୁରୁଷ ଏବଂ ଜଣେ ମହିଳା ରହିଛନ୍ତି । ଆତ୍ମସମର୍ପଣ କରିଥିବା ଚାରି ଜଣ ମାଓବାଦୀଙ୍କୁ ୨୫ ହଜାର ଟଙ୍କା ଲେଖାଏଁ ପ୍ରୋତ୍ସାହନ ଚେକ୍ ପ୍ରଦାନ କରିଛନ୍ତି ସୁକୁମା ଏସପି କିରଣ ଚୌହାନ ।
ସୂଚନା ମୁତାବକ, ମାଓ ମୁକାବିଲାର ସମୀକ୍ଷା କରିବା ପାଇଁ ଶନିବାର ଦିନ ଛତିଶଗଡ ଦନ୍ତେୱାଡା ଜିଲ୍ଲାକୁ ଯାଉଛନ୍ତି କେନ୍ଦ୍ର ଗୃହ ମନ୍ତ୍ରୀ ଅମିତ ଶାହ । ତେବେ ଏହା ପୂର୍ବରୁ ନକ୍ସଲ ପନ୍ଥିଙ୍କ ପିଏଲଜିଏ ବାହିନୀକୁ ଲାଗିଛି ବଡ଼ ଝଟକା । ପିଏଲଜିଏ ବାଟାଲିୟନର ମୁଖ୍ୟ ବର୍ସେ ଦେବାଙ୍କ ଭାଇ ସୁକୁମା ପୋଲିସ ନିକଟରେ ଆତ୍ମସମର୍ପଣ କରିଛି । ନକ୍ସଲ କମାଣ୍ଡର ବର୍ସେ ଦେବାଙ୍କ ଭାଇ ବର୍ସେ ସାନ୍ନା ସମେତ ୪ ଜଣ ମାଓବାଦୀ ସୁକୁମା ଏସ.ପି କିରଣ ଚୌହାନ ଓ ସିଆରପିଏଫ ଅଧିକାରୀଙ୍କ ନିକଟରେ ଆତ୍ମସମର୍ପଣ କରିଛନ୍ତି । ସେମାନଙ୍କ ମଧ୍ୟରୁ ଦୁଇ ମାଓବାଦୀଙ୍କ ମୁଣ୍ଡ ଉପରେ ପୂର୍ବରୁ ୮ ଲକ୍ଷ ଟଙ୍କାର ପୁରସ୍କାର ରାଶି ଘୋଷଣା କରିଥିଲେ ଛତିଶଗଡ ସରକାର। ଆତ୍ମସମର୍ପଣ କରିଥିବା ଚାରି ଜଣ ମାଓବାଦୀଙ୍କୁ ୨୫ ହଜାର ଟଙ୍କା ଲେଖାଏଁ ପ୍ରୋତ୍ସାହନ ଚେକ୍ ପ୍ରଦାନ କରିଛନ୍ତି ସୁକୁମା ଏସପି କିରଣ ଚୌହାନ । ପରେ ସେମାନଙ୍କୁ ସରକାରଙ୍କ ନିୟମ ଅନୁଯାୟୀ ଥଇଥାନ କରାଯିବ ବୋଲି ସୁକୁମା ଏସ.ପି. କହିଛନ୍ତି ।
