ନୂଆଦିଲ୍ଲୀ: ପୂର୍ବତନ ରେସଲର ଏବଂ କଂଗ୍ରେସ ବିଧାୟିକା ଭିନେଶ ଫୋଗଟଙ୍କ ସଂପର୍କୀୟ ଭାଇଙ୍କ ଦୁର୍ଘଟଣାରେ ମୃତ୍ୟୁ ଘଟିଛି । ଭିନେଶଙ୍କ ଭାଇ ନବଦୀପଙ୍କ ମୃତ୍ୟୁକୁ ନେଇ ସ୍ଥାନୀୟ ଅଞ୍ଚଳରେ ଶୋକର ଛାୟା ଖେଳି ଯାଇଛି । ନବଦୀପ ରାଜ୍ୟ ପଦକ ବିଜେତା କୁସ୍ତିଯୋଦ୍ଧା ଥିଲେ । ଶୁକ୍ରବାର ରାତିରେ ଘସୋଲା ଗାଁ ନିକଟ ଜାତୀୟ ରାଜପଥରେ ତାଙ୍କୁ ଏକ ଅଜଣା ଗାଡ଼ି ଧକ୍କା ଦେଇଥିଲା । ଘଟଣାସ୍ଥଳରେ ହିଁ ପ୍ରାଣ ହରାଇଥିଲେ ନବଦୀପ । ମୃତଦେହକୁ ପୋଷ୍ଟମର୍ଟମ ପାଇଁ ଦାଦ୍ରି ସିଭିଲ୍ ହସ୍ପିଟାଲକୁ ପଠାଯାଇଥିଲା । ପରେ ମୃତଦେହକୁ ପରିବାର ଲୋକଙ୍କୁ ହସ୍ତାନ୍ତର କରାଯାଇଛି ।
ସୂଚନା ଅନୁଯାୟୀ, ନବଦୀପ ତାଙ୍କ ବନ୍ଧୁମାନଙ୍କ ସହିତ ଚରଖି ଦାଦରୀ ଆସିଥିଲେ। ଫେରୁଥିବା ସମୟରେ, ସେ ଘସୋଲା ନିକଟରେ ଜାତୀୟ ରାଜପଥ ପାର ହେଉଥିଲେ । ସେହି ସମୟରେ ଏକ ଅଜଣା ଗାଡ଼ି ତାଙ୍କୁ ଧକ୍କା ଦେଇଥିଲା । ଫଳରେ ତାଙ୍କର ମୃତ୍ୟୁ ଘଟିଥିଲା।
ନବଦୀପ ନିଜେ ଜଣେ କୁସ୍ତିଯୋଦ୍ଧା ଥିଲେ ଏବଂ ରାଜ୍ୟ ସ୍ତରରେ ଅନେକ ପଦକ ଜିତିଥିଲେ। ଏହା ବ୍ୟତୀତ, ସେ ଗାଁର ଯୁବକମାନଙ୍କୁ କୁସ୍ତି ପ୍ରଶିକ୍ଷଣ ଦେଉଥିଲେ । ନବଦୀପଙ୍କର ଗୋଟିଏ ମାସର ଝିଅଟିଏ ଅଛି। ତାଙ୍କ ମୃତ୍ୟୁ ପରେ ପରିବାର ସଦସ୍ୟ ଦୁଃଖରେ ଭାଙ୍ଗି ପଡ଼ିଥିବା ବେଳେ ଗାଁ ଲୋକଙ୍କ ଗହଣରେ ଶୋକର ଛାୟା ଖେଳିଯାଇଛି ।
