ଚେନ୍ନାଇ: ଦିଲ୍ଲୀ କ୍ୟାପିଟାଲ୍ସ ଚେନ୍ନାଇ ସୁପର କିଙ୍ଗସକୁ ୨୫ ରନରେ ପରାସ୍ତ କରିଛି। ଦିଲ୍ଲୀ IPL 2025 ରେ ହ୍ୟାଟ୍ରିକ୍ ବିଜୟ ହାସଲ କରିଛି । ଅନ୍ୟପକ୍ଷରେ ସିଏସକେ ଲଗାତାର ତୃତୀୟ ପରାଜୟ ବରଣ କରିଛି। ଚେପକ ଗ୍ରାଉଣ୍ଡରେ ଖେଳାଯାଇଥିବା ଏହି ମ୍ୟାଚ୍ରେ ଦିଲ୍ଲୀ ପ୍ରଥମେ ବ୍ୟାଟିଂ କରି ୧୮୩ ରନ୍ କରିଥିଲା । ଜବାବରେ ଚେନ୍ନାଇ ମାତ୍ର ୧୫୮ ରନ୍ କରିପାରିଥିଲା। ବିଜୟ ଶଙ୍କର ୬୯ ରନର ଅର୍ଦ୍ଧଶତକୀୟ ଇନିଂସ ଖେଳିଥିଲେ, କିନ୍ତୁ ତାଙ୍କର ଖରାପ ଷ୍ଟ୍ରାଇକ୍ ରେଟ୍ ଚେନ୍ନାଇ ଦଳକୁ ବହୁତ କ୍ଷତି ପହଞ୍ଚାଇଥିଲା।
ଚେନ୍ନାଇ ସୁପର କିଙ୍ଗସକୁ ୧୮୪ ରନର ଟାର୍ଗେଟ ମିଳିଥିଲା। ସିଏସକରେ ଆରମ୍ଭ ବହୁତ ଖରାପ ହୋଇଥିଲା କାରଣ ରଚିନ ରବିନ୍ଦ୍ର ୩ ରନ, ଅଧିନାୟକ ଋତୁରାଜ ଗାୟକ୍ବାଡ ୫ ରନ ଏବଂ ଡେଭନ କନୱେ ୧୩ ରନ କରି ଆଉଟ ହୋଇଥିଲେ। ଚେନ୍ନାଇ ୪୧ ରନ୍ ସୁଦ୍ଧା ୩ ୱିକେଟ୍ ହରାଇ ଥିଲା। ଏପରି ପରିସ୍ଥିତିରେ ଅଲରାଉଣ୍ଡର ବିଜୟ ଶଙ୍କର ଚତୁର୍ଥ ନମ୍ବରରେ ବ୍ୟାଟିଂ କରିବାକୁ ଆସିଥିଲେ। ସେ ୬୯ ରନ କରିଥିଲେ । କିନ୍ତୁ ଏହି ସମୟରେ ତାଙ୍କର ଷ୍ଟ୍ରାଇକ୍ ରେଟ୍ ଥିଲା ମାତ୍ର ୧୨୭.୭୮।
ଚେନ୍ନାଇକୁ ଶେଷ ୫ ଓଭରରେ ଜିତିବା ପାଇଁ ୭୮ ରନ ଆବଶ୍ୟକ ଥିଲା । ବିଜୟ ଶଙ୍କର ଡେଥ ଓଭରରେ ବଡ଼ ସଟ ଖେଳିପାରି ନଥିଲେ । ଆଜି ୧୧ତମ ଓଭରରେ ଚେନ୍ନାଇ ପାଇଁ ଏମଏସ ଧୋନୀ ବ୍ୟାଟିଂ କରିବାକୁ ଆସିଥିଲେ। ସେ ୨୬ ବଲ୍ରେ ୩୦ ରନ୍ର ଅପରାଜିତ ଇନିଂସ ଖେଳିଥିଲେ। ଏହି ସମୟରେ ସେ କେବଳ ଗୋଟିଏ ଚୌକା ଏବଂ ଗୋଟିଏ ଛକା ମାରିପାରିଥିଲେ। ଧୋନୀ ଚମତ୍କାର ପ୍ରଦର୍ଶନ କରି ଚେନ୍ନାଇକୁ ଏକ ସ୍ମରଣୀୟ ବିଜୟ ଦେବାର ଆଶା କରାଯାଉଥିଲା । କିନ୍ତୁ ତାଙ୍କର ୧୧୫.୩୮ର ଧିର ଷ୍ଟ୍ରାଇକ୍ ରେଟ୍ ମଧ୍ୟ ଚେନ୍ନାଇର ପରାଜୟର ଏକ ବଡ଼ କାରଣ ପାଲଟିଲା।
ପୂର୍ବରୁ ଦିଲ୍ଲୀ, ଲକ୍ଷ୍ନୌ ସୁପରଜାଏଣ୍ଟସକୁ ୧ ୱିକେଟରେ, ତା'ପରେ ସନରାଇଜର୍ସ ହାଇଦ୍ରାବାଦକୁ ୭ ୱିକେଟରେ ପରାସ୍ତ କରିଥିଲା ଏବଂ ଏବେ ସିଏସକେକୁ ୨୫ ରନରେ ପରାସ୍ତ କରିଛି। ଧୋନିଙ୍କ ଦଳ ଆରସିବି, ରାଜସ୍ଥାନ ରୟାଲ୍ସ ଏବଂ ଏବେ ଦିଲ୍ଲୀ କ୍ୟାପିଟାଲ୍ସ ଠାରୁ ପରାସ୍ତ ହୋଇଛି।
