ଚେନ୍ନାଇ: ଚେପକ ଷ୍ଟାଡିୟମରେ ଖେଳାଯାଉଥିବା ମ୍ୟାଚ୍ରେ ଦିଲ୍ଲୀ କ୍ୟାପିଟାଲ୍ସ ୧୮୩ ରନ୍ କରିଛି । ଚେନ୍ନାଇ ସୁପର କିଙ୍ଗସ ଆଗରେ ୧୮୪ ରନ୍ର ବିଜୟ ଲକ୍ଷ୍ୟ ରଖିଛି ଡିସି । କେଏଲ ରାହୁଲ ଦମଦାର ବ୍ୟାଟିଂ କରିବା ସହ ଦଳକୁ ଏକ ବଡ଼ ସ୍କୋର କରିବାରେ ସହାୟକ ହୋଇଛନ୍ତି । ରାହୁଲ ୫୧ ବଲ୍ରେ ୭୭ ରନ୍ର ଏକ ବଡ଼ ଇନିଂସ ଖେଳିଛନ୍ତି । ଦିଲ୍ଲୀର ଓପନର ବ୍ୟାଟର ଜେକ ପ୍ରେଜର ମ୍ୟାକଗ୍ରକ୍ ପୁଣି ଥରେ ଖାତା ଖୋଲିବାରେ ଅସମର୍ଥ ହୋଇଛନ୍ତି । ଅଭିଷେକ ପୋରେଲ୍ ୩୩ ରନ୍ କରିଥିବା ବେଳେ ଅଧିନାୟକ ଅକ୍ଷର ପଟେଲ ୨୧ ରନ୍ କରି ଆଉଟ ହୋଇଥିଲେ । ସମୀର ରିଜଭୀ ୨୦ ରନ୍, ତ୍ରିଷ୍ଟାନ ଷ୍ଟବ୍ସ ୨୪ ରନ୍ର ଯୋଗଦାନ ଦେଇଥିଲେ ।
ଚଳିତ ଆଇପିଏଲ ସିଜିନ୍ରେ ଦିଲ୍ଲୀ କ୍ୟାପିଟାଲ୍ସ ଲଗାତାର ଦୁଇଟି ବିଜୟ ପାଇସାରିଛି । ସେପଟେ ଚେନ୍ନାଇ ଲାଗାତାର ଦୁଇଟି ମ୍ୟାଚ୍ରେ ପରାସ୍ତ ହୋଇଛି । ଆଜିର ମ୍ୟାଚ୍ରେ ସିଏସକେ ୧୮୪ ରନ୍ର ବିଜୟ ଲକ୍ଷ୍ୟ ହାସଲ କରିପାରିବ କି ନାହିଁ ତା ଉପରେ ଖେଳପ୍ରେମୀଙ୍କ ନଜର ରହିଛି । ଚେପକ ଷ୍ଟାଡିୟମରେ ଦିଲ୍ଲୀ ଟସ୍ ଜିତି ପ୍ରଥମେ ବ୍ୟାଟିଂ ପାଇଁ ନିଷ୍ପତ୍ତି ନେଇଥିଲା । ପ୍ରଥମରୁ ବ୍ୟାଟିଂ ବିପର୍ଯ୍ୟୟ ଭୋଗିଥିବା ଦଳ ଲାଗି ସଙ୍କଟ ମୋଚକ ସାଜିଥିଲେ କେଏଲ ରାହୁଲ ।
ରାହୁଲ ଏବଂ ପୋରେଲଙ୍କ ମଧ୍ୟରେ ୫୧ ରନ୍ର ଭାଗିଦାରୀ ହୋଇଥିଲା । ଗୋଟିଏ ସମୟରେ ଦିଲ୍ଲୀ ୧୫ ଓଭରରେ ୧୩୮ ରନ ହାସ କରିସାରିଥିଲା । କାରଣ କେଏଲ ରାହୁଲ ଦମଦାର ସଟ୍ ଖେଳୁଥିଲା । ଏମିତି ଲାଗୁଥିଲା ୨୦ ଓଭରରେ ଦଳ ୨୦୦ ରନ୍ ପାର କରିଯିବ । କିନ୍ତୁ ଶେଷ ୫ ଓଭରରେ ଦିଲ୍ଲୀ ଟିମ୍ କେବଳ ୪୫ ରନ୍ କରିଥିଲା ଏବଂ ୩ଟି ବଡ଼ ଓ୍ବିକେଟ ହରାଇଥିଲା । ସେପଟେ ସିଏସକେର ବୋଲରଙ୍କ ସଂପର୍କରେ କହିବାକୁ ଗଲେ, ଖଲୀଲ ଅହମ୍ମଦ ସବୁଠାରୁ ସଫଳ ସାବ୍ୟସ୍ତ ହୋଇଥିଲେ । ସେ ୨ ଟି ଓ୍ବିକେଟ ନେଇଥିଲେ । ସେହିଭଳି ରବୀନ୍ଦ୍ର ଜାଡେଜା, ନୁର ଅହମ୍ମଦ ଗୋଟିଏ ଲେଖାଏଁ ଓ୍ବିକେଟ ନେଇଥିଲେ । ନୁର ଅହମ୍ମଦ ଏବେ ବି ପର୍ପଲ୍ କ୍ୟାପ୍ ହୋଲ୍ଡର ଅଛନ୍ତି ।
