ନୂଆଦିଲ୍ଲୀ: ସରକାରୀ ବାସଭବନରୁ ବିପୁଳ ପରିମାଣରେ ଟଙ୍କା ମିଳିବା ପରେ ସୁପ୍ରିମକୋର୍ଟ ମନିଟରିଂ ଇନକ୍ୱାରିର ସାମ୍ନା କରୁଥିବା ଜଷ୍ଚିସ ୟଶବନ୍ତ ବର୍ମା ଆହ୍ଲାବାଦ ହାଇକୋର୍ଟର ବିଚାରପତି ଭାବେ ଶପଥ ଗ୍ରହଣ କରିଛନ୍ତି। ଶନିବାର ସେ ନିଜ ବ୍ୟକ୍ତିଗତ କକ୍ଷରେ ଅଳ୍ପଜଣଙ୍କ ଉପସ୍ତିତିରେ ବିଚାରପତି ଭାବେ ଶପଥ ଗ୍ରହଣ କରିଛନ୍ତି। ତେବେ ସବୁଠୁ ଆଶ୍ଚର୍ଯ୍ୟଜନକ ବିଷୟ ହେଉଛି ଜଷ୍ଟିସ ବର୍ମାଙ୍କୁ ନେଇ ଇନ-ହାଉସ ଇନକ୍ୱାରି ପୁରା ନହେବା ଯାଏ ତାଙ୍କୁ କୌଣସି ନ୍ୟାୟିକ କାମରେ ହସ୍ତକ୍ଷେପ କରିବାକୁ ବାରଣ କରାଯାଇଛି।
ସୂଚନା ମୁତାବକ, ଗତ ମାର୍ଚ୍ଚ ୨୮ ତାରିଖରେ କେନ୍ଦ୍ର ତାଙ୍କୁ ଦିଲ୍ଲୀରୁ ଆହ୍ଲାବାଦ ହାଇକୋର୍ଟକୁ ବଦଳି କରିବାକୁ ବିଜ୍ଞପ୍ତି ଜାରି କରିଥିଲେ। ତେବେ ସୁପ୍ରିମକୋର୍ଟ କଲେଜିୟମର ସୁପାରିଶ କ୍ରମେ ଏହି ବିଜ୍ଞପ୍ତି ଜାରି କରାଯାଇଥିଲା। ଏହାର ବହୁ ପୂର୍ବରୁ ଆହ୍ଲାବାଦ ବାର ଆସୋସିଏସନ ତାଙ୍କ ବଦଳି ନେଇ ବିରୋଧ ପ୍ରଦର୍ଶନ କରି ଆସୁଥିଲା।
ଦୁର୍ନିତି ଅଭିଯୋଗରେ ଫଶିଥିବା ବିଚାରପତିମାନଙ୍କୁ କଣ ପାଇଁ ଆହ୍ଲାବାଦ ହାଇକୋର୍ଟକୁ ପଠାଯାଉଛି? ଆହ୍ଲାବାଦ ହୋଇକୋର୍ଟ ଡଷ୍ଟବିନ ନୁହେଁ। ଯଦି ସେ ଆହ୍ଲାବାଦ ହାଇକୋର୍ଟରେ କାର୍ଯ୍ୟଭାର ଗ୍ରହଣ କରନ୍ତି ତେବେ ବାର ଆସୋସିଏସନ ତାଙ୍କୁ କୌଣସି କାର୍ଯ୍ୟରେ ସହଯୋଗ କରିବ ନାହିଁ ବୋଲି ଆସୋସିଏସନ ଅଭିଯୋଗ କରିଥିଲା। ତେବେ ଚିପ୍ ଜଷ୍ଟିସ ସଞ୍ଜିବ ଖନ୍ନା ଆସୋସିଏସନ ସହ ଆଲୋଚନା କରିବା ସହିତ ଏ ଦିଗରେ ଧ୍ୟାନ ଦେବେ ବୋଲି ସେମାନଙ୍କୁ ପ୍ରତିଶ୍ରୁତି ଦେଇଥିଲେ।
ଗତ ସପ୍ତାହରେ ସୁପ୍ରିମକୋର୍ଟ ଜଷ୍ଚିସ ବର୍ମାଙ୍କ ବିରୁଦ୍ଧରେ ଦାଏର ହୋଇଥିବା ଏକ ମାମଲାକୁ ଖାରଜ କରିଦେଇଥିଲେ। ଏହି ମାମଲାରେ ରାୟ ଦେଇ କୋର୍ଟ କହିଥିଲେ ଯେ, “ଏହି ମାମଲାରେ ଏକ ତିନି ଜଣିଆ ଖଣ୍ଡିପିଠ ଯାଞ୍ଚ କରୁଛି। ତେବେ ଖଣ୍ଡପିଠର ରାୟ ଆସିବା ପରେ ଏହା ଉପରେ ମାମଲା ଦାଏର କରାଯାଇ ପାରିବ।”
ଆପଣଙ୍କୁ ଜଣାଇରଖୁ ଯେ, ଗତ ମାର୍ଚ୍ଚ ୧୪ ତାରିଖରେ ଜଷ୍ଟିସ ୟସୱନ୍ତ ବର୍ମାଙ୍କ ସରକାରୀ ବାସଭବନରେ ଭୀଷଣ ନିଆଁ ଲାଗି ଯାଇଥିଲା। ତେବେ ସେହି ସମୟରେ ଜଷ୍ଟିସ ବର୍ମା ସହରରେ ଉପସ୍ଥିତ ନଥିଲେ। ତେବେ ଘଟଣାସ୍ଥଳରେ ଉଭୟ ପୋଲିସ ଓ ଅଗ୍ନିଶମ ବିଭାଗ ପହଞ୍ଚି ନିଆଁକୁ ଆୟତ କରିଥିଲେ। ଏହାପରେ ନିଆଁ ଲାଗିବାର କାରଣ ଯାଞ୍ଚ ସମୟରେ ତାଙ୍କ ଭଣ୍ଡାରଗୃହରୁ ପୁଳାପୁଳା ଅଧାଜଳା ନୋଟ୍ ଜବତ ହୋଇଥିଲା।
ଏହି ମାମଲା ସାମ୍ନାକୁ ଆସିବା ପରେ ଦେଶରେ ହଇଚଇ ସୃଷ୍ଟି ହୋଇଯାଇଥିଲା। ତାଙ୍କୁ ଦିଲ୍ଲୀ ହାଇକୋର୍ଟରୁ ଆହ୍ଲାବାଦ ହାଇକୋର୍ଟକୁ ବଦଳି କରାଯାଇଥିଲା। ଏହାସହ ମୁଖ୍ୟ ନ୍ୟାୟାଧିଶ ଏହି ମାମଲାର ଯାଞ୍ଚ କରିବାକୁ ଏକ ତିନିଜଣିଆ ଖଣ୍ଡପିଠର ନିର୍ମାଣ କରିଥିଲେ। ଅନ୍ୟପଟେ ଜଷ୍ଟିସ ବର୍ମା ଏହି ଘଟଣାକୁ ଭିତ୍ତିହିନ କହିବା ସହ ଗଣମାଧ୍ୟମରେ ଭୁଲ ଖବର ପ୍ରସାରଣ କରାଯାଉଛି ବୋଲି କହିଛନ୍ତି।
