ଭୋପାଳ: କେନ୍ଦ୍ର କୃଷିମନ୍ତ୍ରୀ ଶିବରାଜ ସିଂହ ଚୌହାନଙ୍କ କାରକେଡ୍ରେ ଯାଉଥିବା ଏକ ଗାଡ଼ି ଓଲଟି ପଡ଼ିଛି । ଏହି ଦୁର୍ଘଟଣାରେ ୩ ଜଣ ପୋଲିସ ଅଧିକାରୀ ଆହତ ହୋଇଛନ୍ତି । ଆହତ ପୋଲିସ ଅଧିକାରୀ ସିହୋର ହସ୍ପିଟାଲରେ ଭର୍ତ୍ତି ହୋଇଛନ୍ତି । ଆଜି (ଶନିବାର) କେନ୍ଦ୍ରମନ୍ତ୍ରୀ ଶିବରାଜ ଚୌହାନ ଭୋପାଳରୁ ଦେବାସ ଜିଲ୍ଲା ଅନ୍ତର୍ଗତ ଖାତେଗାଁ ସନ୍ଦେଳପୁର ଯାଉଥିଲେ । ଏହି ଦୁର୍ଘଟଣା ଆଷ୍ଟା ଥାନା ଅନ୍ତର୍ଗତ ବେଦାଖେଡ଼ି ହାଇଓ୍ବେରେ ଘଟିଛି । ଦୁର୍ଘଟଣାରେ ଆହତ ପୋଲିସ ଅଧିକାରୀମାନେ ହେଉଛନ୍ତି, ଏସପି ସିମୋଲିଆ, ନୀରଜ ଶୁକ୍ଳା ଏବଂ ଆକାଶ ଅଟଳ ।
ଏସପି ସିମୋଲିଆଙ୍କ ଛାତିରେ ଆଘାତ ଲାଗିଥିବା ବେଳେ ଅନ୍ୟ ଦୁଇ ଜଣ ସାମାନ୍ୟ ଆହତ ହୋଇଥିବା ଜଣାପଡ଼ିଛି । ସେପଟେ ଆଜି କେନ୍ଦ୍ରମନ୍ତ୍ରୀ ଶିବରାଜ ଚୌହାନ ଖାତେଗାଁର ଦିବଗଂତ ବିଜେପି ନେତା ଶୁମ୍ଭୁକୁମାର ବାକାଲିବାଲଙ୍କ ପରିଜନଙ୍କୁ ଭେଟି ସମବେଦନା ଜଣାଇଛନ୍ତି । ଏହା ପରେ ଗୁଜରାଟରେ ବାଣ କାରଖାନା ବିସ୍ଫୋରଣରେ ପ୍ରାଣ ହରାଇଥିବା ପଂକଜ ସଂକାଲିଆଙ୍କ ଘରକୁ ଯାଇ ତାଙ୍କ ବାପା-ମାଙ୍କୁ ସାକ୍ଷାତ କରିଛନ୍ତି । ବିସ୍ଫୋରଣରେ ମୃତ୍ୟୁବରଣ କରିଥିବା ଅନ୍ୟ ଦୁଇ ଜଣଙ୍କ ପରିବାରକୁ ଭେଟିଛନ୍ତି ଶିବରାଜ ଚୌହାନ ।
ଗୁଜରାଟର ବନାସକାଣ୍ଠାରେ ବେଆଇନ ବାଣ କାରଖାନାରେ ବିସ୍ଫୋରଣ ଘଟି ୨୧ ଜଣଙ୍କ ଜୀବନ ଚାଲି ଯାଇଥିଲା । ସେଥିମଧ୍ୟରୁ ଅଧିକାଂଶ ମୃତ ମଧ୍ୟପ୍ରଦେଶର ଥିଲେ । ଅନ୍ୟପଟେ ମଧ୍ୟପ୍ରଦେଶ ମୁଖ୍ୟମନ୍ତ୍ରୀ ବନାସାକାଣ୍ଠା ବିସ୍ଫୋରଣରେ ପ୍ରାଣ ହରାଇଥିବା ଲୋକଙ୍କ ଲାଗି ଅନୁକମ୍ପା ରାଶି ଘୋଷଣା କରିଛନ୍ତି । ସେ ଏକ୍ସରେ ପୋଷ୍ଟ କରି କହିଛନ୍ତି, ମୃତକଙ୍କ ପରିବାର ଲାଗି ୨ ଲକ୍ଷ ଟଙ୍କା ଲେଖାଏଁ ଏବଂ ଆହତ କର୍ମଚାରୀଙ୍କୁ ୫୦ ହଜାର ଟଙ୍କା ଲେଖାଏଁ ଆର୍ଥିକ ସହାୟତା ଦିଆଯିବ । ବିସ୍ଫୋରଣରେ ପ୍ରାଣ ହରାଇଥିବା ୧୮ ଜଣଙ୍କ ଶେଷକୃତ୍ୟ ଗୁରୁବାର (ଏପ୍ରିଲ ୩) ଦେବାସର ନେମାବାର ଘାଟରେ ସଂପନ୍ନ ହୋଇଛି ।
