ନୂଆଦିଲ୍ଲୀ,୫।୪:  ବଢୁଛି ଭାରତର ବିଦେଶୀ ମୁଦ୍ରା ଭଣ୍ଡାର। ୨୮ ମାର୍ଚ୍ଚରେ ଶେଷ ହୋଇଥିବା ସପ୍ତାହରେ ଭାରତର ବିଦେଶୀ ମୁଦ୍ରା ୬.୫୯୬ ବିଲିୟନ ଡଲାର ବୃଦ୍ଧି ପାଇ ୬୬୫.୩୯୬ ବିଲିୟନ ଡଲାରରେ ପହଞ୍ଚିଛି। ଭାରତୀୟ ରିଜର୍ଭ ବ୍ୟାଙ୍କ ଶୁକ୍ରବାର କହିଛି, ଗତ ସପ୍ତାହରେ ବୈଦେଶିକ ମୁଦ୍ରା ଭଣ୍ଡାର ୪.୫୩ ବିଲିୟନ ଡଲାର ବୃଦ୍ଧି ପାଇଛି। ଏହା ଲଗାତାର ଚତୁର୍ଥ ସପ୍ତାହ ଯେତେବେଳେ ଦେଶର ବୈଦେଶିକ ମୁଦ୍ରା ଭଣ୍ଡାର ବୃଦ୍ଧି ପାଇଛି। ନିକଟରେ ଟଙ୍କାରେ ଅସ୍ଥିରତାକୁ କମ୍ କରିବା ପାଇଁ ଭାରତୀୟ ରିଜର୍ଭ ବ୍ୟାଙ୍କର ବିଦେଶୀ ମୁଦ୍ରା ବଜାରରେ ହସ୍ତକ୍ଷେପ ସହ  ପୁନଃମୂଲ୍ୟାୟନ କାରଣରୁ ଏଥିରେ  ହ୍ରାସ ପାଇଥିଲା।   

ସେପ୍ଟେମ୍ବର ୨୦୨୪ ଶେଷ ସୁଦ୍ଧା, ଦେଶର ବୈଦେଶିକ ମୁଦ୍ରା ଭଣ୍ଡାର ସର୍ବକାଳୀନ ସର୍ବାଧିକ ୭୦୪.୮୮    ବିଲିୟନ ଡଲାରରେ ପହଞ୍ଚିଥିଲା। ଶୁକ୍ରବାର ପ୍ରକାଶିତ ତଥ୍ୟ ଅନୁଯାୟୀ, ୨୮ ମାର୍ଚ୍ଚ ଶେଷ ସପ୍ତାହରେ ବିଦେଶୀ ମୁଦ୍ରା ଭଣ୍ଡାରର ଏକ ଗୁରୁତ୍ୱପୂର୍ଣ୍ଣ ଅଂଶ ବିଦେଶୀ ମୁଦ୍ରା ସମ୍ପତ୍ତି ମଧ୍ୟ ୬.୧୬ ବିଲିୟନ ଡଲାର ବୃଦ୍ଧି ପାଇ ୫୬୫.୦୧ ବିଲିୟନ ଡଲାରରେ ପହଞ୍ଚିଛି।  ବିଦେଶୀ ମୁଦ୍ରା ଭଣ୍ଡାରରେ ରଖାଯାଇଥିବା ୟୁରୋ, ପାଉଣ୍ଡ ଏବଂ ୟେନ୍ ଭଳି ଅଣ-ଆମେରିକୀୟ ମୁଦ୍ରାର ମୂଲ୍ୟବୃଦ୍ଧି ଅନ୍ତର୍ଭୁକ୍ତ। 

ଦେଶରେ କେବଳ ବିଦେଶୀ ମୁଦ୍ରା ନୁହେଁ ସୁନା ଭଣ୍ଡାର ମଧ୍ୟ ବୃଦ୍ଧି ପାଇଛି।  ଆରବିଆଇ କହିଛି ଯେ ସମୀକ୍ଷା ସପ୍ତାହରେ ସୁନା ଭଣ୍ଡାର ମଧ୍ୟ ୫୧୯ ମିଲିୟନ ଡଲାର ବୃଦ୍ଧି ପାଇ ୭୭.୭୯ ବିଲିୟନ ଡଲାର ହୋଇଛି। ସ୍ପେଶାଲ ଡ୍ରଇଂ ରାଇଟ୍ସ (SDR) ୬୫ ମିଲିୟନ ଡଲାରରୁ ବଢି ୧୮.୧୮ ବିଲିୟନ ଡଲାର ହୋଇଛି। ତଥ୍ୟ ଅନୁଯାୟୀ, ଏହି ସମୟ ମଧ୍ୟରେ, ଅନ୍ତର୍ଜାତୀୟ ମୁଦ୍ରା ପାଣ୍ଠି (IMF) ପାଖରେ ଦେଶର ସଂରକ୍ଷିତ ଭଣ୍ଡାର ୧.୬ କୋଟି ଡଲାର ହ୍ରାସ ୪.୪୧ ବିଲିୟନ ଡଲାର ରହିଛି।