ନୂଆଦିଲ୍ଲୀ,୦୫/୦୪: ଦୁଇଦିନିଆ ଥାଇଲାଣ୍ଡ ଗସ୍ତ ସାରି ଶ୍ରୀଲଙ୍କାରେ ପହଞ୍ଚିଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି । ଥାଇଲାଣ୍ଡର ବ୍ୟାଙ୍କକ୍ରେ ବିମଷ୍ଟେକ୍ ସମ୍ମିଳନୀରେ ଯୋଗ ଦେବା ପରେ ତିନିଦିନିଆ ଶ୍ରୀଲଙ୍କା ଗସ୍ତ କରିଛନ୍ତି ପ୍ରଧାନମନ୍ତ୍ରୀ । କଲମ୍ବୋ ଅନ୍ତର୍ଜାତୀୟ ବିମାନବନ୍ଦରରେ ପହଞ୍ଚିବା ପରେ ପ୍ରଧାନମନ୍ତ୍ରୀଙ୍କୁ ବିପୁଳ ସ୍ୱାଗତ ସମ୍ବର୍ଦ୍ଧନା କରାଯାଇଥିଲା । ପାରମ୍ପରିକ ନୃତ୍ୟରେ ପ୍ରଧାନମନ୍ତ୍ରୀଙ୍କୁ ଭବ୍ୟ ସ୍ୱାଗତ କରାଯାଇଥିଲା । ଏହା ସହିତ ଭାରତୀୟ ସମୁଦାୟ ମୋଦିଙ୍କୁ ଭେଟି ଖୁସି ବ୍ୟକ୍ତ କରିଥିଲେ । ୬ ବର୍ଷ ପରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଶ୍ରୀଲଙ୍କା ଗସ୍ତ କରିଛନ୍ତି ।
ଭାରତୀୟ ସମୁଦାୟଙ୍କୁ ଭେଟିବା ସମୟରେ ପ୍ରଧାନମନ୍ତ୍ରୀ ମହାପୁରୁଷ ଶ୍ରୀମନ୍ତ ଶଙ୍କରଦେବ, ଶ୍ରୀ ଶ୍ରୀ ମାଧବଦେବଙ୍କ ଚିନ୍ତାଧାରାରେ ଅନୁବାଦ, ସଙ୍ଗୀତ ଉପରେ ପୁସ୍ତକ, ପାଲିରେ ଗୀତ ଗୋବିନ୍ଦର କିଛି ଅଂଶ ତାଙ୍କୁ ଦେଖିବାକୁ ପାଇଥିଲେ । ପପେଟ୍ ଶୋ ମଧ୍ୟ ଦେଖିଥିଲେ ପିଏମ୍ । ବିମ୍ଷ୍ଟେକ୍ ସମ୍ମିଳନୀ ପରେ ଶ୍ରୀଲଙ୍କା ଗସ୍ତରେ ବାହାରିଥିଲେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି । ଏହି ୩ ଦିନିଆ ଗସ୍ତରେ ଦୁଇଦେଶ ମଧ୍ୟରେ ପ୍ରତିରକ୍ଷା, ଶକ୍ତି, ବାଣିଜ୍ୟ ଓ ଯୋଗାଯୋଗ ଆଦି କ୍ଷେତ୍ରରେ ଦ୍ୱିପାକ୍ଷିକ ସହଯୋଗ ବୃଦ୍ଧି ଲାଗି ରାଜିନାମା ସ୍ୱାକ୍ଷର ହୋଇପାରେ । ୧୦ଟି କ୍ଷେତ୍ରରେ ଦୁଇ ଦେଶ ମଧ୍ୟରେ ଦ୍ୱିପାକ୍ଷିକ ଆଲୋଚନା ହେବାର ସମ୍ଭାବନା ରହିଛି । ଏହାପୂର୍ବରୁ ପ୍ରଧାନମନ୍ତ୍ରୀ ୨୦୧୯ରେ ଶ୍ରୀଲଙ୍କା ଗସ୍ତ କରିଥିଲେ ।
ଗତକାଲି (ଶୁକ୍ରବାର) ଥାଇଲାଣ୍ଡରେ ଷଷ୍ଠ ବିମଷ୍ଟେକ୍ ସମ୍ମିଳନୀ ଅନୁଷ୍ଠିତ ହୋଇଥିଲା । ଏହା ସାମୂହିକ ବିକାଶ ଏବଂ ସୁରକ୍ଷାର ଏକ ମଡ଼େଲ ବୋଲି କହିଥିଲେ ପ୍ରଧାନମନ୍ତ୍ରୀ । ବିମଷ୍ଟେକ୍ ପାଇଁ ସୁଯୋଗର ପରିସର ବୃଦ୍ଧି କରିବାକୁ ୨୧ ସୂତ୍ରୀ ଆକ୍ସନ ପ୍ଲାନ ବାବଦରେ ଜଣାଇଛନ୍ତି ପିଏମ୍ ମୋଦି । ବିମ୍ଷ୍ଟେକ ଚାମ୍ବର ଅଫ୍ କମର୍ସର ସ୍ଥାପନା, ବାର୍ଷିକ ବ୍ୟାପାର ଶିଖର ସମ୍ମିଳନୀ ଆୟୋଜନ ଏବଂ କ୍ଷେତ୍ରରେ ସ୍ଥାନୀୟ ମୁଦ୍ରାରେ ବାଣିଜ୍ୟକୁ ପ୍ରୋତ୍ସାହିତ କରିବା ଲାଗି ପ୍ରସ୍ତାବ ରଖିଛନ୍ତି । ଏହା ସହିତ ବିମ୍ଷ୍ଟେକ ସଦସ୍ୟ ରାଷ୍ଟ୍ରକୁ ୟୁପିଆଇ ସହ ଯୋଡ଼ି ହେବାକୁ ପ୍ରସ୍ତାବ ଦେଇଛନ୍ତି । ସାଇବର ଅପରାଧ, ଆତଙ୍କବାଦ, ନିଶାଦ୍ରବ୍ୟ ଏବଂ ମାନବ ଚାଲାଣ ରୋକିବାକୁ ବିମ୍ଷ୍ଟେକ୍ ଗୁରୁତ୍ବପୂର୍ଣ୍ଣ ଭୂମିକା ତୁଲାଇଥିବା କହିଥିଲେ ପ୍ରଧାନମନ୍ତ୍ରୀ ।
