ନୂଆଦିଲ୍ଲୀ: ପଞ୍ଜାବ ପୋଲିସର ଜଣେ ମହିଳା କନଷ୍ଟେବଲ ଅମନଦୀପ କୌରଙ୍କୁ ୧୭.୭୧ ଗ୍ରାମ ହେରୋଇନ ସହିତ ଗିରଫ କରାଯାଇଛି। ଏହି ଘଟଣା ପଞ୍ଜାବ ସରକାରଙ୍କ ଚାଲୁଥିବା ମାଦକ ବିରୋଧୀ ଅଭିଯାନ ‘ୱାର ଏଗେନଷ୍ଟ ଡ୍ରଗ୍ସ’ର ଏକ ଅପରେସନରେ ଧରା ପଡିଛି। ଗିରଫ ପରେ ଅମନଦୀପଙ୍କୁ ତୁରନ୍ତ ଚାକିରିରୁ ବରଖାସ୍ତ କରାଯାଇଛି।

ବଠିଣ୍ଡା ପୋଲିସ ଏବଂ ଆଣ୍ଟି-ନାର୍କୋଟିକ୍ସ ଟାସ୍କ ଫୋର୍ସ (ANTF) ମିଳିତ ଭାବେ ଏକ ସୂଚନା ଆଧାରରେ ବୁଧବାର ସନ୍ଧ୍ୟାରେ ବଠିଣ୍ଡାର ବାଦଲ ଫ୍ଲାଏଓଭର ନିକଟରେ ଅମନଦୀପଙ୍କ ମହିନ୍ଦ୍ରା ଥାର ଏସୟୁଭିକୁ ଅଟକାଇଥିଲେ। ଗାଡ଼ିରେ ତଲାସୀ ବେଳେ ଗିଅରସିଫ୍ଟ ସହ ଲାଗିଥିବା ଏକ ବାକ୍ସ ଭିତରୁ ହେରୋଇନ ଜବତ କରାଯାଇଥିଲା। ଏହାପରେ ତାଙ୍କୁ ହେପାଜତକୁ ନିଆଯାଇ ଗାଡ଼ିକୁ ଜବତ କରାଯାଇଥିଲା। ଡିଏସପି ହରବଂଶ ସିଂହ କହିଛନ୍ତି, "ଆମକୁ ଏନେଇ ସୂଚନା ମିଳିଥିଲା। ଏହି ସୂଚନା ଆଧାରରେ ଆମେ କାର୍ଯ୍ୟାନୁଷ୍ଠାନ ଗ୍ରହଣ କରି ଅମନଦୀପଙ୍କ ଗାଡ଼ିରୁ ହେରୋଇନ ଉଦ୍ଧାର କରିଥିଲୁ।"

ଅମନଦୀପ ପୂର୍ବରୁ ମନ୍ସା ପୋଲିସରେ କାର୍ଯ୍ୟ କରୁଥିଲେ ଏବଂ ଗିରଫ ସମୟରେ ସେ ବଠିଣ୍ଡା ପୋଲିସ ଲାଇନ୍ସରେ ଅସ୍ଥାୟୀ ଭାବେ ନିଯୁକ୍ତ ଥିଲେ। ମୁଖ୍ୟମନ୍ତ୍ରୀ ଭଗଵନ୍ତ ମାନଙ୍କ ନିର୍ଦ୍ଦେଶ ଅନୁଯାୟୀ, ମାଦକ ଦ୍ରବ୍ୟ ସମ୍ପୃକ୍ତ ଅଭିଯୋଗରେ ଜଡ଼ିତ ଯେକୌଣସି କର୍ମଚାରୀଙ୍କୁ କୌଣସି ପ୍ରକାରର କ୍ଷମା ଦିଆଯିବ ନାହିଁ ବୋଲି ଘୋଷଣା କରିଛନ୍ତି। ଇନ୍ସପେକ୍ଟର ଜେନେରାଲ ଅଫ୍ ପୋଲିସ ସୁଖଚୈନ ସିଂହ ଗିଲ କହିଛନ୍ତି, "ମନ୍ସା ଏସଏସପିଙ୍କୁ ତୁରନ୍ତ କାର୍ଯ୍ୟାନୁଷ୍ଠାନ ନେବାକୁ ନିର୍ଦ୍ଦେଶ ଦିଆଯାଇଥିଲା। ସେ ଅମନଦୀପ କୌରଙ୍କୁ ସମ୍ବିଧାନର ଅନୁଚ୍ଛେଦ ୩୧୧ ଅନୁଯାୟୀ ଚାକିରିରୁ ବରଖାସ୍ତ କରିଥିଲେ।"

ଅମନଦୀପ ପ୍ରାୟ ସମୟ ସୋସିଆଲ ମିଡିଆରେ ସକ୍ରିୟ ରହୁଥିଲେ ଓ ତାଙ୍କ ଥାର ଗାଡ଼ିର ଭିଡିଓ ସହିତ ଅନେକ ପୋଷ୍ଟ ସେୟାର କରୁଥିଲେ। ଯାଞ୍ଚ ବେଳେ ତାଙ୍କ ଗାଡ଼ିରେ ପଞ୍ଜାବ ପୋଲିସର ଷ୍ଟିକର ଲାଗିଥିବା ଦେଖାଯାଇଥିଲା। ଯାହା ସମ୍ଭବତଃ ପୋଲିସ ଚେକିଂ ସମୟରେ ଏହାକୁ ଏଡ଼ାଇବା ପାଇଁ ସେ ଏହାର ବ୍ୟବହାର କରୁଥିଲେ ବୋଲି ଜଣାପଡିଛି। ବର୍ତ୍ତମାନ ପୋଲିସ ତାଙ୍କ ସମ୍ପତ୍ତି ଏବଂ ଅବୈଧ ମାଦକ କାରବାରରୁ ଅର୍ଜିତ ସମ୍ଭାବ୍ୟ ଆୟ ଉପରେ ତଦନ୍ତ ଆରମ୍ଭ କରିଛି। ସୂଚନା ଅନୁଯାୟୀ, ଅମନଦୀପଙ୍କ ପାଖରେ ଏକ ଅଡ଼ି କାର, ଦୁଇଟି ଇନୋଭା, ଏକ ବୁଲେଟ ମୋଟରସାଇକେଲ ଏବଂ ପ୍ରାୟ ୨ କୋଟି ଟଙ୍କାର ଏକ ଘର ଥିବା ଜଣାପଡ଼ିଛି।