ଉମରକୋଟ,୧୪/୩ : ନେତା ହେଲେ ବାସନ୍ଦ । ନିଜ ସମାଜ ଆଜି ତାଙ୍କୁ ୧୨ବର୍ଷ ବାସନ୍ଦ କରିଛି । ଆମେ କହୁଛୁ ପୂର୍ବତନ ନବରଙ୍ଗପୁର ସାଂସଦ ପ୍ରଦୀପ ମାଝୀ କଥା । ସେ ଅନ୍ୟ ଜାତିରେ ବିବାହ କରି ହୋଇଛନ୍ତି ହଟହଟା । ନିଜ ସମାଜ ତାଙ୍କୁ ଗ୍ରହଣ କରିନି । ଆଉ ଏହାର ଫଳ ସୂରୁପ ସେ ସମାଜରୁ ବାସନ୍ଦ ହୋଇଛନ୍ତି ।
ସୂଚନା ଅନୁଯାୟୀ ପୂର୍ବତନ ନବରଙ୍ଗପୁର ସାଂସଦ ପ୍ରଦୀପ ମାଝୀ ଚଳିତ ମାସ ୧୧ତାରିଖରେ ଗୋଆଠାରେ କେନ୍ଦ୍ରାପଡା ଜିଲ୍ଲାର ସଂଗୀତା ସାହୁ ନାମକ ଯୁବତୀ ସହ ବହୁ ଆଡମ୍ବର ସାହିତ ବାହା ହୋଇଥିଲେ ।
କିନ୍ତୁ ଏହି ବିବାହଟି ତାଙ୍କ ଭତ୍ରା ସମାଜକୁ ପସନ୍ଦ ନାହିଁ । କାରଣ ସଂଗୀତା ସାହୁ ଅନ୍ୟ ସମାଜର ଅଟନ୍ତି । ଏହି ପରିପ୍ରେକ୍ଷୀରେ ଆଜି ଜିଲ୍ଲାର ଭତ୍ରା ସମାଜର ବରିଷ୍ଠ ବ୍ୟକ୍ତିମାନେ ନବରଙ୍ଗପୁର ଜିଲ୍ଲା ଝରିଗାଁ ବ୍ଲକର ଧାମନାଗୁଡାରେ ଥିବା ମାଁ ଦନ୍ତେଶ୍ବରୀ ମନ୍ଦିର ପ୍ରାଙ୍ଗଣରେ ଏକ ବୈଠକର ଆୟୋଜନ କରାଯାଇଥିଲା । ଏହି ବୈଠକରେ ସର୍ବସମ୍ମତି କ୍ରମେ ପ୍ରଦୀପ ମାଝୀ ଏବଂ ତାଙ୍କ ପିତା, ଭାଇ ଭଉଣୀ ସମସ୍ତ ପରିବାରକୁ ୧୨ବର୍ଷ ପର୍ଯ୍ୟନ୍ତ ଭତ୍ରା ସମାଜରୁ ବାସନ୍ଦ କରିଥିବା ନିଷ୍ପତ୍ତି ନିଆଯାଇଥିଲା । ୧୨ବର୍ଷ ପର୍ଯ୍ୟନ୍ତ ଭତ୍ରା ସମାଜର କୌଣସି ବ୍ୟକ୍ତି ପ୍ରଦୀପ ମାଝୀଙ୍କ ପରିବାରର ଦୁଃଖ ସୁଖରେ ସାମିଲ ହେବେ ନାହିଁ ବୋଲି କେନ୍ଦ୍ରୀୟ କମିଟିର ଉପସଭାପତି ଗୋପାଳ ପୂଜାରୀ ଏବଂ ଝରିଗାଁ ବ୍ଲକ ଭତ୍ରା ସମାଜର ସଭାପତି ଟିକଚନ୍ଦ ମାଝୀ କହିଛନ୍ତି ।
