ମାଲକାନଗିରି,୫।୧୨(ଆପ୍ର ): ଗତ ୩ ମାସ ପୂର୍ବେ ମାଲକାନଗିରି ଜିଲ୍ଲାରେ ଲଗାଣ ବର୍ଷା ଯୋଗୁଁ ବନ୍ୟା ପରିସ୍ଥିତି ଉପୁଜିଥିବା ବେଳେ ଜିଲ୍ଲାର ପୋଟେରୁ ସମେତ ଅନେକ ଗ୍ରାମ ବିଶେଷ ଭାବେ ପ୍ରଭାବିତ ହୋଇଥିଲା। ପୋଟେରୁ ଗ୍ରାମ ସମ୍ପୂର୍ଣରୂପେ ଜଳ ଘେରକୁ ଚାଲି ଯାଇଥିବା ବେଳେ ଅନେକ ଗ୍ରାମରେ ଜଳ ପଶି ଘର ଭାଙ୍ଗିବା ସହ ରାସ୍ତା ଘାଟ ଆଦି ଧୋଇ ହୋଇ ଫସଲ ନଷ୍ଟ ହୋଇ ଯାଇଥିଲା। ତେବେ ଏହାରି ମଧ୍ୟରେ ଅନେକ ଚାଷୀ ନିଜର କଷ୍ଟ ଅର୍ଜିତ ଫସଲ ମଧ୍ୟ ହରାଇଥିବା ବେଳେ ହେକ୍ଟର ହେକ୍ଟର ଜମିରେ ବାଲି ମାଡି ଯାଇଥିଲା। ତେବେ ମୁଖ୍ୟମନ୍ତ୍ରୀ ମୋହନ ଚରଣ ମାଝି ମାଲକାନଗିରି ଜିଲ୍ଲା ଗସ୍ତ କରି ହେଲିକେପ୍ଟର ଯୋଗେ ବର୍ଷା ଜନିତ କ୍ଷୟକ୍ଷତି ହୋଇଥିବା ଗ୍ରାମ ଗୁଡିକୁ ଆକାଶ ମାର୍ଗରୁ ବୁଲି ଦେଖିଥିଲେ। ଏଥି ସହ ବର୍ଷାଜନିତ କ୍ଷୟକ୍ଷତି ସମ୍ବନ୍ଧୀୟ ସମୀକ୍ଷା ବୈଠକରେ ଯୋଗ ଦେଇ ଯଥା ଶୀଘ୍ର କ୍ଷତି ପୂରଣ ଦେବାକୁ ପ୍ରତିଶ୍ରୁତି ଦେଇଥିଲେ।
କିନ୍ତୁ ଏହାରି ମଧ୍ୟରେ ଏହି ବନ୍ୟା କୁ ପ୍ରାୟ ୩ ମାସ ବିତି ଯାଇଛି। କିନ୍ତୁ କ୍ଷତି ପୂରଣ ମିଳି ନାହିଁ। ଏହାକୁ ନେଇ ବିଧାନ ସଭାରେ ପ୍ରଶ୍ନ ଉଠାଇଛନ୍ତି ଶାସକ ଦଳର ନେତା ତଥା ମାଲକାନଗିରି ବିଧାୟକ ନରସିଂହ ମାଡକାମୀ।
କ୍ଷୟକ୍ଷତିର ଆକଳନ କରି ଯେଉଁମାନଙ୍କ ଘର ନଷ୍ଟ ହୋଇଛି, ସେମାନଙ୍କୁ ଓଡିଶା ରିଲିଫ କୋଡ଼ ଅନୁଯାୟୀ କ୍ଷତିପୂରଣ ଦିଆଯିବା ସହ ଫସଲ ନଷ୍ଟ ଓ ଗୃହପାଳିତ ପଶୁର ମୃତ୍ୟୁ ହୋଇଥିଲେ କ୍ଷତିପୂରଣ ଯୋଗାଇ ଦିଆଯିବ ବୋଲି ରାଜସ୍ବ ମନ୍ତ୍ରୀ ସୁରେଶ ପୂଜାରୀ ପ୍ରକାଶ କରିବା ପରେ ଲୋକେ ସରକାରୀ ସହାୟତାକୁ ଅପେକ୍ଷା କରିଥିଲେ। ଏହାରି ମଧ୍ୟରେ ୩ ମାସ ସମୟ ବିତି ଯାଇଥିବା ବେଳେ ବର୍ତ୍ତମାନ ସରକାରୀ ସହାୟତା କେବେ ମିଳିବ ଓ ପ୍ରକୃତରେ କେତେ ପରିମାଣର କ୍ଷୟକ୍ଷତି ହୋଇଛି ସେନେଇ ମାଲକାନଗିରି ବିଧାୟକ ଶ୍ରୀ ମାଡ଼କାମି କ୍ଷୟ କ୍ଷତିର ତାଲିକା ମାଗିବା ସହ କ୍ଷତି ପୂରଣ ରାଶି କେବେ ସୁଦ୍ଧା ପ୍ରଦାନ କରାଯିବ ବୋଲି ବିଧାନ ସଭାରେ ପ୍ରଶ୍ନ କରିଛନ୍ତି।
