କଟକ,୦୬/୦୭: ବହୁଚର୍ଚ୍ଚିତ ବଲାଙ୍ଗୀର ପାର୍ସଲ୍ ବୋମା ବିସ୍ଫୋରଣ ଘଟଣାର ମୁଖ୍ୟ ଅଭିଯୁକ୍ତ ପୁଞ୍ଜିଲାଲ୍ ମେହେର୍ର ଉଭୟ ନିୟମିତ ଏବଂ ଅନ୍ତରୀଣ ଜାମିନ୍ ଆବେଦନକୁ ପୁନର୍ବାର ଓଡ଼ିଶା ହାଇକୋର୍ଟ ଶୁକ୍ରବାର ଖାରଜ କରିଦେଇଛନ୍ତି । ମାମଲାର ଗୁରୁତ୍ୱ ଏବଂ ଅଭିଯୁକ୍ତ ବିରୋଧରେ ପ୍ରାଥମିକ ପ୍ରମାଣକୁ ଆଧାର କରି ହାଇକୋର୍ଟର ବିଚାରପତି ଜଷ୍ଟିସ୍ ସଙ୍ଗମ କୁମାର ସାହୁ ଏହି ନିର୍ଦ୍ଦେଶ ଦେଇଛନ୍ତି ।
ବଲାଙ୍ଗୀର ଜିଲ୍ଲା ପାଟଣାଗଡ଼ର ସୌମ୍ୟ ଏବଂ ରୀମାଙ୍କର ୨୦୧୮ ଫେବ୍ରୁଆରୀ ୧୮ରେ ବିବାହ ହୋଇଥିଲା । ସେମାନଙ୍କ ନିକଟକୁ ଆସିଥିବା ଏକ ପାର୍ସଲ୍ ବୋମା ବିବାହର ଚାରି ଦିନ ପରେ ଖୋଲାଯିବା ବେଳେ ବିସ୍ଫୋରଣ ଘଟିଥିଲା । ଯେଉଁଥିରେ ସୌମ୍ୟ ଏବଂ ତାଙ୍କ ଆଈମା’ ଜେମାମଣି ସାହୁଙ୍କର ମୃତ୍ୟୁ ଘଟିଥିଲା । ରୀମା ଗୁରୁତର ଆହତ ହୋଇଥିଲେ । ଏହି ଘଟଣାରେ କ୍ରାଇମ୍ବ୍ରାଞ୍ଚ୍ ପୁଲିସ୍ ପୁଞ୍ଜିଲାଲ୍ ମେହେରକୁ ଗିରଫ କରିଥିଲା । ଇତିମଧ୍ୟରେ ଅନେକ ଥର ପୁଞ୍ଜିଲାଲ୍ ଜାମିନ୍ ଆବେଦନ କରି ହାଇକୋର୍ଟଙ୍କ ଦ୍ୱାରସ୍ଥ ହୋଇଛି । ରାଜ୍ୟ ସରକାରଙ୍କ ପକ୍ଷରୁ ଆଇନଜୀବୀ ପ୍ରିୟବ୍ରତ ତ୍ରିପାଠୀ ଏହି ମାମଲା ପରିଚାଳନା କରୁଥିଲେ ।