ଭୁବନେଶ୍ୱର,୧୨/୦୧: ଏଣିକି ପ୍ରତିମାସରେ ହେବ ପଥ ଉତ୍ସବ । କେବଳ ବର୍ଷା ମାସକୁ ଛାଡି ଦେଲେ ବର୍ଷକୁ ୧୨ ଥର ପଥ ଉତ୍ସବ କରିବାକୁ ଲକ୍ଷ ରଖିଛି ନଗର ଉନ୍ନୟନ ବିଭାଗ । ଏନେଇ ନଗର ଉନ୍ନୟନ ମନ୍ତ୍ରୀ କୃଷ୍ଣଚନ୍ଦ୍ର ପାତ୍ର ସୂଚନା ଦେଇଛନ୍ତି । ପଥ ଉତ୍ସବରେ ଲୋକଙ୍କ ଉତ୍ସାହ ଓ ଭିଡ଼କୁ ଦେଖି ଏହି ନିଷ୍ପତ୍ତି ନିଆଯାଇଛି । ରବିବାର ଦ୍ୱିତୀୟ ପଥ ଉତ୍ସବରେ ହଜାର ହଜାର ଲୋକଙ୍କ ଭିଡ଼ ସମସ୍ତଙ୍କୁ ଆଶ୍ଚର୍ଯ୍ୟ କରିଛି ।
ଜାଗମରା ନୂଆ ରୋଡରେ ଅନୁଷ୍ଠିତ ପଥ ଉତ୍ସବରେ ଉତ୍ସାହ ସହ ସାମିଲ ହୋଇଛନ୍ତି ରାଜଧାନୀ ବାସିନ୍ଦା । ଏଠାରେ ଲାଗିଥିବା ବିଭିନ୍ନ ଷ୍ଟେଜ ସାମ୍ନାରେ ଭିଡ଼ ଦେଖିବାକୁ ମିଳିଛି । ପିଲାଙ୍କ ପାଇଁ ସ୍ୱତନ୍ତ୍ର ଗେମ୍ ଜୋନ ଓ ବିଭିନ୍ନ ଆକ୍ଟିଭିଟି ଯେପରିକି ଟାଲେଣ୍ଟ ହଣ୍ଟ, ପେଣ୍ଟିଂ, କ୍ରାଫ୍ଟ, ବ୍ୟବସ୍ଥା କରାଯାଇଛି । ଏହା ଛଡ଼ା ଜୋକର୍, ଷଣ୍ଢ, ବାଘ ନୃତ୍ୟ ଓ ଶଙ୍ଖ ଫୁଙ୍କା ସହ ପାରମ୍ପରିକ ଢୋଲ ବାଦ୍ୟ ସମସ୍ତଙ୍କୁ ଆକର୍ଷିତ କରିଛି । ମୁଖ୍ୟ ଷ୍ଟେଜ୍ରେ କଣ୍ଠଶିଳ୍ପୀ ସତ୍ୟଜିତ ପ୍ରଧାନ ଓ ଅସୀମା ପଣ୍ଡାଙ୍କ ଗୀତରେ ଝୁମିଥିଲେ ରାଜଧାନୀ ବାସୀ । ଶୀତୁଆ ସକାଳକୁ ଗୀତର ନାଚର ଗରମ ଲୋକଙ୍କୁ ବେଶ ଉତ୍ସାହିତ କରିଛି ।
