ନୂଆଦିଲ୍ଲୀ: ଦିଲ୍ଲୀର ମୁଖ୍ୟମନ୍ତ୍ରୀ ଆତିଶୀ କାଲକାଜୀ ବିଧାନସଭା ଆସନରୁ ନିର୍ବାଚନ ଲଢ଼ିବା ଲାଗି ଜନତାଙ୍କ ପାଖରୁ ସହାୟତା ମାଗିଛନ୍ତି । ଏପରିକି ସେ କ୍ରାଉଡ ଫଣ୍ଡିଂ ଆରମ୍ଭ କରିଛନ୍ତି । ଏହାକୁ ନେଇ କଂଗ୍ରେସ ପ୍ରାର୍ଥୀ ଅଳକା ଲାମ୍ବା କଡ଼ା ସମାଲୋଚନା କରିଛନ୍ତି । ଅଳକା ଲାମ୍ବା କହିଛନ୍ତି, ‘ଆତିଶୀ ଏବେ ଜନତାଙ୍କୁ ଟଙ୍କା ମାଗୁଛନ୍ତି । ଯଦି ସେ ସଚ୍ଚୋଟ ତେବେ ସେ ନିଜ ଟଙ୍କାରେ ନିର୍ବାଚନ ଲଢ଼ନ୍ତୁ । ଆମ ଆଦମୀ ପାର୍ଟି କିଭଳି ଅବକାରୀ ଦୁର୍ନୀତି କରିଛି ଆମେ ସସସ୍ତେ ଦେଖିଛନ୍ତି । କେଜ୍ରିଓ୍ବାଲ ଏବଂ ବିଜେପି ମିଶି ଦିଲ୍ଲୀକୁ ବରବାଦ୍ କରିଦେଇଛନ୍ତି । କେଜ୍ରିଓ୍ବାଲ ବଜେପି ଏବଂ ଆରଏସଏସ୍ କାର୍ଯ୍ୟାଳୟ ଯିବା ବନ୍ଦ କରନ୍ତୁ ବୋଲି କହିଛନ୍ତି ଅଳକା ଲାମ୍ବା ।
ସେପଟେ ମୁଖ୍ୟମନ୍ତ୍ରୀ ଆତିଶୀ ‘ଡୋନେଟ୍ ଫର ଆତିଶୀ’ କ୍ୟାମ୍ପେନ୍ ଆରମ୍ଭ କରିବା ସହ ଟ୍ବିଟ୍ କରିଛନ୍ତି, ‘ଗତ ୫ ବର୍ଷରେ ବିଧାୟକ, ମନ୍ତ୍ରୀ ଏବଂ ଯେବେ ମୁଖ୍ୟମନ୍ତ୍ରୀ ହେଲି ଆପଣମାନେ ମୋ ସହ ରହିଛନ୍ତି । ଆପଣମାନଙ୍କ ସମର୍ଥନ ଏବଂ ଆଶୀର୍ବାଦ ବିନା ଏହା ସମ୍ଭବ ନୁହେଁ । ଜଣେ ଯୁବ ଏବଂ ଶିକ୍ଷିତ ମହିଳା ଭାବରେ ଆପଣମାନଙ୍କ ବିଶ୍ବାସ ରାଜନୀତିରେ କ୍ୟାରିୟର କରିବାରେ ମୋତେ ପ୍ରେରଣା ଦେଇଛି ।’
ଆତିଶୀ ସମର୍ଥନ ଲାଗି ଅପିଲ୍ କରିବା ସହ କହିଛନ୍ତି, ‘ଏବେ ଆଉ ଏକ ନିର୍ବାଚନ ଅଭିଯାନ ସାମ୍ନାରେ ରହିଛି । ମୋତେ ଆପଣମାନଙ୍କ ଆବଶ୍ୟକତା ରହିଛି । ମୋ କ୍ରାଉଡ ଫଣ୍ଡିଂ କ୍ୟାମ୍ପେନରେ ଯୋଗଦାନ ଦିଅନ୍ତୁ । ଅନ୍ୟପଟେ, ବିଜେପି ନେତା କପିଲ ମିଶ୍ର ମୁଖ୍ୟମନ୍ତ୍ରୀ ଆତିଶୀଙ୍କ କ୍ରାଉଡ୍ ଫଣ୍ଡିଂ କ୍ୟାମ୍ପେନକୁ ଜୋରଦାର ବିରୋଧ କରିଛନ୍ତି । ପୂର୍ବରୁ ଏନଆରଆଇ ଏବଂ ଦେଶର ଲୋକେ ଆପଣଙ୍କୁ ଟଙ୍କା ଦେଉଥିଲେ । କିନ୍ତୁ ଏବେ ମିଡିଆରେ ଆସି କ୍ରାଉଡ ଫଣ୍ଡିଂ କରୁଛନ୍ତି, ଏହା ଆପଣଙ୍କ ଦୁର୍ଗତିକୁ ଦର୍ଶାଉଛି । ଏମାନେ ଲୋକମାନଙ୍କ ସଂପର୍କରେ ନାହାନ୍ତି ଏବଂ ପରାଜିତ ହୋଇସାରିଛନ୍ତି ।
