ନୂଅଦିଲ୍ଲୀ,୧୨/୦୧: ବାଂଲାଦେଶରେ ସଂଖ୍ୟାଲଘୁଙ୍କ ଉପରେ ଆକ୍ରମଣ ମାମଲାରେ ପୋଲିସର ଅନୁସନ୍ଧାନରେ ଅନେକ ଖୁଲାସା କରାଯାଇଛି। ଅନୁସନ୍ଧାନରୁ ଜଣାପଡିଛି ଯେ ଶେଖ ହସିନା ସରକାରଙ୍କ ପତନ ସମୟରେ ସଂଖ୍ୟାଲଘୁଙ୍କ ଉପରେ ହୋଇଥିବା ଆକ୍ରମଣର ୯୮.୪ ପ୍ରତିଶତ ରାଜନୈତିକ ଉଦ୍ଦେଶ୍ୟ ପ୍ରଣୋଦିତ। ଅନୁସନ୍ଧାନରୁ ଏହା ମଧ୍ୟ ଜଣାପଡିଛି ଯେ ମାତ୍ର ୧.୫୯ ପ୍ରତିଶତ ଆକ୍ରମଣ ସାମ୍ପ୍ରଦାୟିକତା କାରଣରୁ ଘଟିଛି। ଅଗଷ୍ଟ ୪ ରୁ ଅଗଷ୍ଟ ୨୦ ମଧ୍ୟରେ ଘଟିଥିବା ଘଟଣାକୁ ନେଇ ପୋଲିସର ଅନୁସନ୍ଧାନରୁ ଏହି ସୂଚନା ସାମ୍ନାକୁ ଆସିଛି। ଏବେ ପ୍ରଶ୍ନ ଉଠୁଛି ଯେ ଅପରାଧୀମାନଙ୍କୁ ଦଣ୍ଡ ଦେବା ପାଇଁ ୟୁନୁସ ସରକାର କ’ଣ ପଦକ୍ଷେପ ନେବେ?
ଅନୁସନ୍ଧାନରେ ଅନେକ ଖୁଲାସା:
ଶେଖ ହସିନା ସରକାରଙ୍କ ପତନ ସମୟରେ ସଂଖ୍ୟାଲଘୁମାନଙ୍କ ଉପରେ ହୋଇଥିବା ଆକ୍ରମଣ ଏବଂ ଅତ୍ୟାଚାରର ହୋଇଥିବା ୧୪୧୫ ଟି ରିପୋର୍ଟ ମଧ୍ୟରୁ ୯୮.୪ ପ୍ରତିଶତ ରାଜନୈତିକ ଉଦ୍ଦେଶ୍ୟ ପ୍ରଣୋଦିତ ହୋଇଥିବାବେଳେ ୧.୫୯ ପ୍ରତିଶତ ସାମ୍ପ୍ରଦାୟିକ କାରଣରୁ ହୋଇଥିଲା। ଏହି ସୂଚନା ମଧ୍ୟବର୍ତ୍ତୀକାଳୀନ ସରକାରଙ୍କ ପ୍ରେସ ୱିଙ୍ଗ ଶନିବାର ଏକ ପ୍ରେସ ବିଜ୍ଞପ୍ତିରେ ସେୟାର କରିଛି।
କହିରଖୁଛୁ ଯେ ବାଂଲାଦେଶ ହିନ୍ଦୁ, ବୌଦ୍ଧ, ଖ୍ରୀଷ୍ଟିଆନ ଏକତା ପରିଷଦ ଏହାରି ଭିତରେ ସାମ୍ପ୍ରଦାୟିକ ହିଂସା ଘଟଣାର ୨୦୧୦ ରିପୋର୍ଟ କରିଥିଲା। ତେବେ ପୋଲିସର ତଥ୍ୟରେ ୧୭୬୯ ଆକ୍ରମଣ ଏବଂ ଭଙ୍ଗାରୁଜା ମାମଲା ରିପୋର୍ଟ ହୋଇଛି। ସେଥିମଧ୍ୟରୁ ପୋଲିସ ୧୪୧୫ ଘଟଣାର ତଦନ୍ତ କରିସାରିଥିବା ବେଳେ ୩୫୪ ଟି ଘଟଣାର ତଦନ୍ତ ଏବେ ମଧ୍ୟ ଚାଲିଛି। ଅନୁସନ୍ଧାନ ସମୟରେ, ୧୬୧ ଟି ମାମଲାରେ ପ୍ରମାଣ ମିଳି ନ ଥିବାବେଳେ ୧୨୫୪ ଟି ମାମଲା ପ୍ରମାଣିତ ହୋଇଥିଲା।
୫ ଅଗଷ୍ଟରୁ ୮ ଡିସେମ୍ବର ୨୦୨୪ ପର୍ଯ୍ୟନ୍ତ, ବାଂଲାଦେଶରେ ୨୨୦୦ ସଂଖ୍ୟାଲଘୁଙ୍କୁ ହତ୍ୟା ଏବଂ ଆକ୍ରମଣ କରିବାର ଘଟଣା ରିପୋର୍ଟ କରାଯାଇଥିଲା। ଏହା ପରେ ଅନ୍ତରିଣ ସରକାର ଏହି ରିପୋର୍ଟଗୁଡ଼ିକୁ ବଢ଼ାଇ ଚଢ଼ାଇ ଗଣମାଧ୍ୟମ ଦ୍ୱାରା କରାଯାଇଥିବା ଦର୍ଶାଇ ଖାରଜ କରିଦେଇଥିଲେ ଏବଂ ଗମ୍ଭୀରତାକୁ ସ୍ୱୀକାର କରିବାକୁ ରାଜି ହୋଇନଥିଲେ।ବର୍ତ୍ତମାନ, ୪-୫ ମାସ ପରେ, ତାଙ୍କ ନିଜ ପୋଲିସ୍ ଅନୁସନ୍ଧାନ କରି ସ୍ୱୀକାର କରିଛନ୍ତି ଯେ ଆକ୍ରମଣ ହୋଇଛି, ମାତ୍ର ୧୭୬୯ଟି ମାମଲା ସାମ୍ନାକୁ ଆସିଛି।
