ଭୁବନେଶ୍ୱର,୧୧/୦୧: ଠକେଇ ଅଭିଯୋଗରେ ବିଷ୍ଣୁପ୍ରିୟା ଚାନ୍ଦ ଓରଫ ହଂସିକା ଓ ତାଙ୍କ ପାର୍ଟନର ଅନିଲ୍ ମହାନ୍ତି ବାବଦରେ ଦିନକୁ ଦିନ ନୂଆ ତଥ୍ୟ ପୁଲିସ୍ ହାତରେ ଲାଗୁଛି । ଅନିଲ ବ୍ୟବହାର କରୁଥିବା ଆଉ ଦୁଇଟି ଦାମୀ କାର୍କୁ ଜବତ କରି ନିଜ ହେପାଜତକୁ ଆଣିଲା ସ୍ପେଶାଲ କ୍ରାଇମ ୟୁନିଟ୍ । ଆଗକୁ ଏହି ଦୁଇଜଣଙ୍କୁ ପୁଣି ରିମାଣ୍ଡରେ ଆଣିବାକୁ କୋର୍ଟରେ ଆବେଦନ କରିବ କମିଶନରେଟ ପୋଲିସ । ଏମାନଙ୍କ ବିରୁଦ୍ଧରେ ଏବେବି କୌଣସି ଅପରାଧିକ ପ୍ରମାଣ ପୋଲିସକୁ ମିଳିପାରି ନାହିଁ । ତେବେ ଖୁବ କମ ଦିନରେ ଏହି ଦୁଇ ଜଣ କିପରି କୋଟିପତି ହେଲେ, ତାର ଛାନଭିନ୍ କରୁଛି ଆୟକର ବିଭାଗ ।
ସ୍ପେଶାଲ୍ କ୍ରାଇମ୍ ୟୁନିଟ୍ ଶୁକ୍ରବାର ଏକ ମର୍ସିଡିଜ୍ କାର୍ ଜବତ କରିଥିଲା । ଯାହାର ମୂଲ୍ୟ ୨ କୋଟି ୧୫ ଲକ୍ଷ ଟଙ୍କା ହେବ । ତା’ଛଡ଼ା ଅନିଲଙ୍କ ଜନ୍ମଦିନ ଭୋଜିର ମଧ୍ୟ କିଛି କାଗଜପତ୍ର କ୍ରାଇମ ୟୁନିଟ ହାତରେ ଲାଗିଛି । ଗତ ଡିସେମ୍ୱର ୨୪ ତାରିଖରେ ଅନୀଲଙ୍କ ଜନ୍ମଦିନ ଥିଲା । ଭୁବନେଶ୍ୱର ଗଲ୍ଫ କ୍ଲବ୍ରେ ଏକ ଆଖି ଝଲସା ପାର୍ଟିର ଆୟୋଜନ କରିଥିଲେ ଅନିଲ୍ । ଜନ୍ମ ଦିନରେ ହଂସିକା ତାଙ୍କୁ ଉପହାର ସ୍ୱରୂପ ଏକ ମର୍ସିଡିଜ୍ କାର୍ ଦେଇଥିଲେ । ଯାହାର ଭିଡିଓ ଏବେ ସୋସିଆଲ୍ ମିଡିଆରେ ଭାଇରାଲ୍ ହେବାରେ ଲାଗିଛି ।
ଜନ୍ମଦିନର ଭୋଜି ଓ ସାଜସଜାରେ ୫୦ ଲକ୍ଷରୁ ଅଧିକ ଟଙ୍କା ଖର୍ଚ୍ଚ ହୋଇଥିବା ପ୍ରମାଣ ମଧ୍ୟ ପାଇଛି ସ୍ପେଶାଲ୍ କ୍ରାଇମ୍ ୟୁନିଟ୍ । ଦୁଇ ଅଭିଯୁକ୍ତ କେଉଁ ଉପାୟରେ ଶହ ଶହ କୋଟି ଟଙ୍କା ରୋଜଗାର କରୁଥିଲେ, ତାହା ଜାଣିବା ପାଇଁ ପୋଲିସ ଉଭୟଙ୍କୁ ଦିନିକିଆ ରିମାଣ୍ଡରେ ଆଣିଥିଲା । ଜେରା ସମୟରେ ଟଙ୍କା କାରବାର ବିଷୟରେ କିଛି ଟେର୍ ମିଳିଲା ନାହିଁ । ଶୁକ୍ରବାର ପୋଲିସ ଦୁଇ ଜଣଙ୍କୁ ଜେଲ୍ ପଠାଇ ଦେଇଥିଲା । ଅଧିକ ତଦନ୍ତ ପାଇଁ ଉଭୟଙ୍କୁ ପୁଣି ରିମାଣ୍ଡରେ ଅଣାଯିବ ବୋଲି ଜଣାପଡ଼ିଛି ।
ଅନ୍ୟପକ୍ଷରେ ଆୟକର ବିଭାଗ ୪ ଦିନ ହେବ ହଂସିକା ଓ ଅନିଲଙ୍କ କଳାଧନର ଖୋଳତାଡ଼ କରୁଛି । ବର୍ତ୍ତମାନ ସୁଦ୍ଧା ଏମାନଙ୍କ ସଂପତ୍ତି ପ୍ରାୟ ୧୦୦ କୋଟି ହେବ ବୋଲି ଜଣାପଡ଼ିଛି । ତା’ଛଡ଼ା ବିଭିନ୍ନ ଆଡ଼େ ଏମାନେ ଟଙ୍କା ନିବେଶ କରିଥିବା ଆୟକର ବିଭାଗ ଜାଣିବାକୁ ପାଇଛି । ପୂର୍ବରୁ ପୋର୍ସେ, ଜାଗୁଆର, ଅଡି ଭଳି ୬ଟି ଦାମୀ କାର୍ର କାଗଜପତ୍ର ଆୟକର ବିଭାଗ ପାଇଥିଲା । ଶୁକ୍ରବାର ୨ କୋଟି ୧୫ ଲକ୍ଷ ଟଙ୍କାର ଏକ ମର୍ସିଡିଜ ଜବତ ହେବା ପରେ ଆୟକର ବିଭାଗର ଏହାର ଖୋଳତାଡ଼ କରୁଛି । ଉକ୍ତ କାର୍କୁ ଏକ ପରିତ୍ୟକ୍ତ ସ୍ଥାନରେ ଲୁଚାଇ ରଖାଯାଇଥିଲା ବୋଲି ପୋଲିସ କହିଛି । ଉକ୍ତ ଗାଡ଼ିଟିକୁ ନଗଦ ଟଙ୍କାରେ କିଣା ଯାଇଥିବା ଜଣାପଡିଛି ।
