ମାଲକାନଗିରି,୧୧।୧୨ (ଆପ୍ର ):ମାଲକାନଗିରି ଜିଲ୍ଲାର ଲୋକ ପର୍ବ ମାଲ୍ୟବନ୍ତ ପାଇଁ ବୁଧବାର ପଥ ଉତ୍ସବ ଅନୁଷ୍ଠିତ ହୋଇ ଯାଇଛି। ଏହି ଅବସରରେ ଜିଲ୍ଲା ସଦର ମହକୁମାର ବାଲିମେଳା ଛକ ଠାରୁ ଜିଲ୍ଲାପାଳଙ୍କ କାର୍ଯ୍ୟାଳୟ ଯାଏଁ ଏହି ପଥ ଉତ୍ସବର ଆୟୋଜନ କରାଯାଇଥିଲା।
ଏଥିରେ ଜିଲ୍ଲାପାଳ ଆଶିଷ ଇଶ୍ଵର ପାଟିଲ ମୁଖ୍ୟ ଅତିଥି ଭାବେ ଯୋଗଦେଇ ଏହାକୁ ଶୁଭାରମ୍ଭ କରିଥିବା ବେଳେ ମଞ୍ଚରେ ଅନ୍ୟମାନଙ୍କ ମଧ୍ୟରେ ଅତିରିକ୍ତ ଜିଲ୍ଲାପାଳ ବେଦବର ପ୍ରଧାନ, ସୋମନାଥ ପ୍ରଧାନ, ଉପଜିଲ୍ଲାପାଳ ଦୁର୍ଯୋଧନ ଭୋଇ, ଜିଲ୍ଲା ପରିଷଦ ମୁଖ୍ୟ ନିର୍ବାହୀ ଅଧିକାରୀ ନରେଶ ଚନ୍ଦ୍ର ଶବର, ଜିଲ୍ଲା ସୂଚନା ଲୋକ ସମ୍ପର୍କ ଅଧିକାରୀ ପ୍ରମିଳା ମାଝୀ, ଜିଲ୍ଲା ସଂସ୍କୃତି ଅଧିକାରୀ ସନ୍ତ୍ରାସ ନାରାୟଣ ପଣ୍ଡା ପ୍ରମୁଖ ଯୋଗଦେଇଥିଲେ।
ଏହି ଅବସରରେ ଆଓମା ଗୁରୁକୁଳର ଛାତ୍ର ଛାତ୍ରୀମାନେ ଆତ୍ମରକ୍ଷା କୌଶଳ, ନୃତ୍ୟ ସଙ୍ଗୀତ ପରିବେଶଣ କରିଥିଲେ। ଜିଲ୍ଲାର ବିଭିନ୍ନ କୋଣ ଅନୁକୋଣରୁ ଅନେକ ଛାତ୍ର ଛାତ୍ରୀ, ଯୁବ ପିଢୀ ମାନେ ଯୋଗ ଦେଇ ନିଜର କଳାର ପ୍ରଦର୍ଶନ କରିଥିଲେ। ଜାତୀୟ ରାଜପଥରେ ମାଲ୍ୟାବନ୍ତ ମହୋତ୍ସବ ନିମନ୍ତେ ବିଭିନ୍ନ ରଙ୍ଗୋଲିର ଆୟୋଜନ କରାଯାଇଥିବା ବେଳେ କୁସ୍ତି, ମାଲଖମ୍ବ, ସ୍କିଟିଙ୍ଗ, ନାଚ, ଗୀତ ଭଳି ବିଭିନ୍ନ କାର୍ଯ୍ୟକ୍ରମ କରଯାଇଥିଲା। ଏଠାରେ ସ୍ବତନ୍ତ୍ର ଆକର୍ଷଣ ଥିଲା ବିଏସଏଫ ବାଟାଲିୟନ ର ଡଗ୍ ସୋ ପ୍ରଦର୍ଶନୀ। ତେବେ ଜିଲ୍ଲାରେ ମାଲ୍ୟାବନ୍ତ ମହୋତ୍ସବ ପାଇଁ ଚଳଚଞ୍ଚଳ ହୋଇଥିବା ବେଳେ ଆଜିର ଏହି ପଥ ଉତ୍ସବରେ ଜିଲ୍ଲାବାସୀ ଓ ଜିଲ୍ଲାର ପ୍ରଶାସନିକ ଅଧିକାରୀ ମାନେ ବେସ ଖୁଶିର ସହ ନାଚ ଗୀତ ରେ ଝୁମୀ ଉଠିଥିଲେ।
