ଭୁବନେଶ୍ୱର,୨୩/୦୬: ଥାଇଲାଣ୍ଡରେ ଅଗଷ୍ଟ ୧୦ରୁ ତାଇକଣ୍ଡୋ ଇଣ୍ଟରନ୍ୟାସନାଲ ଚାମ୍ପିଅନସିପ୍ ଆରମ୍ଭ ହେବ । ଜଗତସିଂହପୁର ତିର୍ତ୍ତୋଲ ବ୍ଲକର ତାସା ନାୟକ ପ୍ରତିଯୋଗିତାରେ ଭାଗ ନେବେ । ମେ’ ୧୪ରେ ଭୁବନେଶ୍ୱରରେ ପାସ୍ପୋର୍ଟ ପାଇଁ ଆବେଦନ କଲେ ତାସା । ଭେରିଫିକେସନ ପାଇଁ ଜୁନ୍ ୨୬କୁ ସ୍ଲଟ୍ ବୁକିଂ ହୋଇଥିଲା । ଟେକ୍ନିକାଲ ସମସ୍ୟାରୁ ବାତିଲ୍ ହୋଇଗଲା । ପୁନଃ ଆବେଦନ କରିବାରୁ ସେପ୍ଟେମ୍ବର ୬କୁ ସ୍ଲଟ୍ ବୁକିଂ ତାରିଖ ଦର୍ଶାଇଲା । ତାସା ଓ ତାଙ୍କ ବାପା ଦେବପ୍ରସାଦ ନାୟକଙ୍କ ମୁଣ୍ଡ କାମ ଦେଲାନି । ଗତ ୧୦ରେ ଆନ୍ଧ୍ରପ୍ରଦେଶର ଭାଇଜାଗରେ ପାସ୍ପୋର୍ଟ ପାଇଁ ଆବେଦନ କରିଥିଲେ । ସେଠୁ ଭେରିଫିକେସନ ସାରି ଶୁକ୍ରବାର ଘରକୁ ଫେରିଛନ୍ତି ବାପା, ଝିଅ ।
ଭୁବନେଶ୍ୱର ଏମ୍ସ ନଗରରେ ରହୁଥିବା ସିଦ୍ଧାର୍ଥ ପାତ୍ର ଜୁନ୍ ୬ରେ ଭଉଣୀଙ୍କୁ ଦେଖା କରିବାକୁ ଆମେରିକା ଯାଇଥାନ୍ତେ । ତାଙ୍କ ଝିଅ ପାଇଁ ମାସକ ତଳେ ତତ୍କାଳ ପାସ୍ପୋର୍ଟ ଆବେଦନ କରିଥିଲେ । ୩ ଥର ସ୍ଲଟ୍ ବୁକିଂ ବାତିଲ୍ ହେଲା । ବିଦେଶ ଯାତ୍ରା ନୋହିଲା । ନିରୁପାୟ ହୋଇ ଗତ ମାସ ୨୩ରେ ଝାଡ଼ଖଣ୍ଡ ରାଞ୍ଚିରେ ଆବେଦନ କଲେ । ସପ୍ତାହେ ଭିତରେ ହିଁ ପାସ୍ପୋର୍ଟ ମିଳିଗଲା ।
ମେ’ ୨୨ରେ ପାସ୍ପୋର୍ଟ ସ୍ଲଟ୍ ବୁକିଂ ହୋଇଥିଲା । ଭେରିଫିକେସନ ହୋଇପାରିଲାନି । ଆସନ୍ତା ୨୪ ତାରିଖର ବୁକିଂ ଏବେ ବାତିଲ୍ ଦର୍ଶାଉଛି । ଆଞ୍ଚଳିକ ପାସ୍ପୋର୍ଟ ଅଧିକାରୀ (ଆର୍ପିଓ) ବି ନିରୁତ୍ତର । ସଫ୍ଟୱେର୍ ଉପରେ ଦୋଷ ଲଦୁଛନ୍ତି । କ’ଣ କରିବି? ଲଲାଟେନ୍ଦୁ ମହାପାତ୍ର ନାମକ ବ୍ୟକ୍ତି ଏନେଇ ‘ଏକ୍ସ’ରେ କ୍ଷୋଭ ପ୍ରକାଶ କରିଛନ୍ତି । ବୈଦେଶିକ ବ୍ୟାପାର ମନ୍ତ୍ରାଳୟ (ଏମ୍ଇଏ) ଓ ପ୍ରଧାନମନ୍ତ୍ରୀଙ୍କ କାର୍ଯ୍ୟାଳୟ (ପିଏମ୍ଓ)କୁ ଟ୍ୟାଗ୍ କରିଛନ୍ତି ।
ଖାଲି ଏହି ୩ଜଣ ନୁହେଁ, ରାଜ୍ୟରେ ପ୍ରତିଦିନ ଶହ ଶହ ପାସ୍ପୋର୍ଟ ଆବେଦନକାରୀ ନାକରେ କାନ୍ଦୁଛନ୍ତି । କଣ୍ଟା ସାଜିଛି ନୂଆ ପାସ୍ପୋର୍ଟ ସଫ୍ଟୱେର (ପାସ୍ପୋର୍ଟ ସେବା ପୋଗ୍ରାମ ୨.୦) । ଅନ୍ଲାଇନ୍ ଆବେଦନରେ ଘଣ୍ଟା ଘଣ୍ଟା ବିତିଯାଉଛି । ଯଦିଓ, କୌଣସିମତେ ଆବେଦନ ସରିଗଲା । ତଥାପି ଦୁଃଖ ସରୁନି । ମାସ ମାସ ଧରି ସ୍ଲଟ୍ ବୁକିଂ ଝିନଝଟ୍ ଲାଗି ରହୁଛି । ଯାଞ୍ଚ ପାଇଁ ଧାର୍ଯ୍ୟ ତାରିଖ ଏକାଧିକ ଥର ବାତିଲ୍ ହେଉଛି । ପୁଲିସ ଯାଞ୍ଚ ପ୍ରକ୍ରିୟା, ଅଫିସିଆଲ୍ କାମରେ ବି ଅହେତୁକ ବିଳମ୍ବ । ଯଦି ଆପଣଙ୍କ ଭାଗ୍ୟ ଜୋର୍ ତ, ପାସ୍ପୋର୍ଟ ମିଳିବ । ନହେଲେ, ପାସ୍ପୋର୍ଟ ଅଫିସ୍ ଚକ୍କର କାଟି କାଟି ନୟାନ୍ତ ହେବା ଥୟ ।
ଦିନେ କି ସପ୍ତାହେ ନୁହେଁ, ଗତ ଅଢ଼େଇ ମାସ ଧରି ଭୁବନେଶ୍ୱର ପାସ୍ପୋର୍ଟ ସେବା ଏକରକମର ଭୁଶୁଡି଼ ପଡି଼ଛି । ଦୁର୍ବଳ ସଫ୍ଟୱେର ଚକ୍କରରେ ଫସି ଆବେଦନକାରୀ ହଇରାଣ ହେଉଛନ୍ତି । ଶହଶହ ଛାତ୍ରଛାତ୍ରୀ ଷ୍ଟଡି ଟୁର୍ରେ ବିଦେଶ ଯାଇପାରିନାହାନ୍ତି । ଅନେକ ଚାକିରି ହରାଇଲେଣି । ଭିସା ପାଇଁ ଆବେଦନ ବି ହୋଇପାରୁନି । ବିଦେଶ ଭ୍ରମଣକୁ ସତେ ଯେମିତି ଗ୍ରହଣ ଲାଗିଛି । ଅଧିକାଂଶ ଆବେଦନକାରୀ ଏବେ ପଡ଼ୋଶୀ ରାଜ୍ୟ ପାସ୍ପୋର୍ଟ ଅଫିସ୍ ଭରସାରେ । ତତ୍କାଳ ଆବେଦନ ପାଇଁ ରାଞ୍ଚି, କୋଲକାତା ଓ ଭାଇଜାଗ୍ ଧାଉଁଛନ୍ତି ।
୨ ଦିନ ତଳେ ଜଣେ ଆବେଦନକାରୀ ରସୁଲଗଡ଼ସ୍ଥିତ ପାସ୍ପୋର୍ଟ କାର୍ଯ୍ୟାଳୟରେ ହଙ୍ଗାମା କରିଥିଲେ । କାର୍ଯ୍ୟାଳୟ ସାମ୍ନା ରାସ୍ତାରେ ଶୋଇରହି ଆତ୍ମହତ୍ୟା କରିବେ ବୋଲି ଧମକାଇଥିଲେ । ଅନ୍ୟ ଆବେଦନକାରୀମାନେ ମଧ୍ୟ ହୋ-ହଲ୍ଲା କରିବାକୁ ଲାଗିଲେ । ସ୍ଥିତି ଅଣାୟତ ହୋଇଥିଲା । ପିସିଆର୍ ଭ୍ୟାନ୍ ଘଟଣାସ୍ଥଳରେ ପହଞ୍ଚି ସ୍ଥିତି ସମ୍ଭାଳିଥିଲା ।
ଜଣେ ପାସ୍ପୋର୍ଟ କର୍ମଚାରୀ ନାମ ଗୋପନ ରଖିବା ସର୍ତ୍ତରେ କହିଛନ୍ତି, ଏମିତି ଘଟଣା ପ୍ରାୟ ସବୁଦିନ ଦେଖିବାକୁ ମିଳୁଛି । କିଛି ଲୋକ ଅଫିସ୍ରେ ଜବରଦସ୍ତି ତାଲା ପକାଇବାକୁ ବି ଚେଷ୍ଟା କରି ସାରିଲେଣି । ଖାଲି ଆବେଦନକାରୀ ନୁହେଁ, ପାସ୍ପୋର୍ଟ କର୍ମଚାରୀମାନେ ବି ସଫ୍ଟୱେର ଜାଲରେ ଛନ୍ଦି ହୋଇଛନ୍ତି । ସର୍ଭର ସ୍ଲୋ ଯୋଗୁଁ ନାନା କାମରେ ବିଳମ୍ବ ଘଟୁଛି । ପୂର୍ବରୁ ସାଧାରଣତଃ ୧୦-୧୫ ଦିନରେ ପାସ୍ପୋର୍ଟ ମିଳିଯାଉଥିଲା । ୨-୩ ମାସ ବିଳମ୍ବ ହେଲେ, ଆବେଦନକାରୀ ଚିଲ୍ଲାଇବା ସ୍ୱାଭାବିକ ।
ପୂର୍ବରୁ ଆବେଦନ କରିବାକୁ ୧୦ ମିନିଟ୍ ଲାଗୁଥିଲା । ଏବେ ଘଣ୍ଟା ଘଣ୍ଟା ସର୍ଭର ସ୍ଲୋ ଦେଖାଉଛି । ଏପ୍ରିଲ ପହିଲାରୁ ଲାଗୁ ହୋଇଥିବା ନୂଆ ସଫ୍ଟୱେର ହିଁ କାଳ ସାଜିଛି । ତତ୍କାଳ ଆବେଦନକାରୀ ବି ସମଦଶା ଭୋଗୁଛନ୍ତି । ଖାଲି ଯାହା, ସ୍ୱାସ୍ଥ୍ୟଗତ ପ୍ରମାଣପତ୍ର ଦେଖାଉଥିବା ବ୍ୟକ୍ତିଙ୍କୁ ଯଥାଶୀଘ୍ର ପାସ୍ପୋର୍ଟ ମିଳିଯାଉଛି । ଭୁବନେଶ୍ୱର ଆର୍ପିଓ ସୁଧାଂଶୁ ଶେଖର ମିଶ୍ର ସଫ୍ଟୱେର ତ୍ରୁଟିକୁ ମାନିଛନ୍ତି । ସେ କହିଛନ୍ତି, ଟିସିଏସ୍ ସଂସ୍ଥାର ପୁରୁଣା ସଫ୍ଟୱେର (ପାସ୍ପୋର୍ଟ ସେବା ପୋଗ୍ରାମ ୧.୦) ଜରିଆରେ ୨୦୧୪ରୁ ସବୁ କାମ ଠିକ୍ଠାକ୍ ଚାଲିଥିଲା । ଏହି ସଂସ୍ଥା ଗତ ଏପ୍ରିଲରେ ନୂଆ ସଫ୍ଟୱେର ଲଞ୍ଚ କରିଥିଲା ।
ଭୁବନେଶ୍ୱର ସହ ନାଗପୁର ପାସ୍ପୋର୍ଟ ଅଫିସ୍ରେ ପରୀକ୍ଷାମୂଳକ ଭାବେ ଲାଗୁ ହୋଇଥିଲା । ଆଗକୁ ଦେଶ ସାରା ଏହି ସଫ୍ଟୱେର ସଂଯୋଗ କରାଯାଇଥାନ୍ତା । ହେଲେ, ପ୍ରାରମ୍ଭରୁ ସଫ୍ଟୱେର ପୋଗ୍ରାମିଂ ଫେଲ୍ ମାରିଛି । ପୂର୍ବରୁ କେବଳ ଭୁବନେଶ୍ୱର ପାଇଁ ଦୈନିକ ୫୭୦ ସ୍ଲଟ୍ ବୁକିଂ ହେଉଥିଲା । ଅନ୍ୟ ଜିଲ୍ଲାର ପୋଷ୍ଟ ଅଫିସ୍ରେ ବୁକିଂ ସଂଖ୍ୟା ପାଖାପାଖି ୫୦୦ ଛୁଉଁଥିଲା । ଏବେ ଭୁବନେଶ୍ୱର ପାଇଁ କଷ୍ଟେମଷ୍ଟେ ମାତ୍ର ୧୨୦ ସ୍ଲଟ୍ ବୁକିଂ ସମ୍ଭବ ହେଉଛି । ଅନ୍ୟ ଜିଲ୍ଲା ପୋଷ୍ଟ ଅଫିସ୍କୁ ମାତ୍ର ୫ଟି ବୁକିଂ ଦିଆଯାଉଛି ।
