ନୂଆଦିଲ୍ଲୀ: ଜାମ୍ମୁ-କାଶ୍ମୀରର ପୁଞ୍ଚ ଜିଲ୍ଲାରେ ପାକିସ୍ତାନ ସେନା ପୁଣି ଥରେ ଯୁଦ୍ଧବିରତି ଉଲ୍ଲଂଘନ କରିଛି। ଗତ ରାତିରେ ଏହି ଘଟଣା ଘଟିଥିବା ବେଳେ ଗତ ୩ ଦିନ ମଧ୍ୟରେ ଦ୍ୱିତୀୟ ଥର ପାଇଁ ପାକିସ୍ତାନ ସେନା ଭାରତରେ ଅନୁପ୍ରବେଶ କରିବାକୁ ଚେଷ୍ଟା କରିଛି। ପାକିସ୍ତାନୀ ସେନା କୃଷ୍ଣା ଘାଟି ସେକ୍ଟରରେ ଥିବା ନିୟନ୍ତ୍ରଣ ରେଖା(ଏଲଓସି) ନିକଟରେ କାଲି ହଠାତ୍ ଅହେତୁକ ଗୁଳିଚାଳନା କରିଥିଲା। ଯାହାର ଜବାବରେ ଭାରତୀୟ ସେନା କଡା କାର୍ଯ୍ୟାନୁଷ୍ଠାନ ଗ୍ରହଣ କରିଥିଲା ବୋଲି ଜଣାପଡିଛି।
ସୂଚନା ଅନୁସାରେ, ମଙ୍ଗଳବାର ଦିନ ପୁଞ୍ଚରେ ଏଲଓସି ନିକଟରେ ମାଇନ୍ ବିସ୍ଫୋରଣ ପରେ ପାକିସ୍ତାନୀ ସେନା ଅନୁପ୍ରବେଶକାରୀଙ୍କୁ ସୀମା ପାର କରାଇବା ପାଇଁ ଫାଙ୍କା ଗୁଳିଚାଳନା ଆରମ୍ଭ କରିଥିଲା। ଏହାର ଜବାବରେ ଭାରତୀୟ ସେନା ତୁରନ୍ତ କାର୍ଯ୍ୟାନୁଷ୍ଠାନ ନେଇ ସେମାନଙ୍କ ଯୋଜନାକୁ ପଣ୍ଡ କରି ଦେଇଥିଲା। ଗତ ରାତିରେ ପାକିସ୍ଥାନ ସେନା ଅନୁପ୍ରବେଶ ପାଇଁ ସମାନ ଢଙ୍ଗରେ ଗୁଳିଚାଳନାର ଆଶ୍ରୟ ନେଇଥିଲା ବୋଲି ଜଣାପଡିଛି।
ଭାରତୀୟ ସେନା ସୂତ୍ରରୁ ମିଳିଥିବା ଖବର ମୁତାବକ, ଏହି ଗୁଳିଚାଳନା ଏକ ଆଗୁଆ ଯୋଜନାବଦ୍ଧ ଅନୁପ୍ରବେଶ ପ୍ରୟାସ ଥିଲା। ଯାହାକୁ ସେନା ସଫଳତାର ସହ ରୋକି ଦେଇଛି। ଏହି ଘଟଣାରେ ଭାରତୀୟ ସେନାର କୌଣସି କ୍ଷୟକ୍ଷତି ହୋଇ ନଥିବା ଜଣାପଡ଼ିଛି। ତେବେ ପାକିସ୍ତାନ ପକ୍ଷରେ କ୍ଷୟକ୍ଷତି ସମ୍ପର୍କରେ ଏଯାଏ ସ୍ପଷ୍ଟ ସୂଚନା ମିଳିପାରି ନାହିଁ।
ଏହି ଘଟଣା ପରେ ସୀମା ଅଞ୍ଚଳରେ ଉତ୍ତେଜନା ବୃଦ୍ଧି ପାଇଛି। ଭାରତୀୟ ସେନା ସତର୍କ ହେବା ସହ ରାତ୍ରୀ କାଳୀନ ପାଟ୍ରୋଲିଂ ବଢାଇ ଦେଇଛି। ଏହା ପୂର୍ବରୁ ମଧ୍ୟ ପାକିସ୍ତାନ ବାରମ୍ବାର ଯୁଦ୍ଧବିରତି ଉଲ୍ଲଂଘନ କରି ଅନୁପ୍ରବେଶ ପାଇଁ ଚେଷ୍ଟା କରିଆସୁଛି। ଯାହାକୁ ଭାରତୀୟ ସେନା ଦୃଢ଼ତାର ସହ ମୁକାବିଲା କରୁଛି।
