ଜୟପୁର,୧୮/୦୭: ପଦ୍ମଶ୍ରୀ କମଳା ପୂଜାରୀଙ୍କ କିଡ୍ନୀଜନିତ ରୋଗ ସମସ୍ୟା ବଢ଼ିଯାଇଛି । ଅଧିକ ଚିକିତ୍ସା ଲାଗି ପ୍ରଶାସନ ପକ୍ଷରୁ ତାଙ୍କୁ କଟକ ଶ୍ରୀରାମଚନ୍ଦ୍ର ଭଞ୍ଜ ମେଡିକାଲ କଲେଜ୍ ଏବଂ ହସପିଟାଲ୍କୁ ସ୍ଥାନାନ୍ତର କରାଯାଇଛି । ସେଠାରେ ତାଙ୍କର ସିକେଡି (କ୍ରନିକ୍ କିଡନୀ ଡିଜିଜ୍) ସହ ଅନ୍ୟାନ୍ୟ ସ୍ୱାସ୍ଥ୍ୟଗତ ସମସ୍ୟାର ଚିକିତ୍ସା କରିବେ ବିଭିନ୍ନ ବିଭାଗର ସ୍ୱତନ୍ତ୍ର ବିଶେଷଜ୍ଞ ଡାକ୍ତର । ଜିଲ୍ଲା ମେଡ଼ିକାଲ୍ ଅଧିକାରୀ ଡାକ୍ତର ରବୀନ୍ଦ୍ରନାଥ ମିଶ୍ର ଏହି ସୂଚନା ଦେଇଛନ୍ତି ।
ଡାକ୍ତର ମିଶ୍ର କହିଛନ୍ତି, ପଦ୍ମଶ୍ରୀ କମଳା ଆମ ରାଜ୍ୟର ଗର୍ବ । ତାଙ୍କ ଚିକିତ୍ସା ଲାଗି ୭ ଜଣିଆ ଡାକ୍ତର ଟିମ୍ ଗଢ଼ାଯାଇଥିଲା । ପାରାମେଡିକାଲ କର୍ମଚାରୀ ବିଭିନ୍ନ ନମୁନା ସଂଗ୍ରହ କରିଥିଲେ । ପରୀକ୍ଷା ରିପୋର୍ଟ ମିଳିବା ପରେ କମଳାଙ୍କ ଦୀର୍ଘ ଦିନର କିଡ୍ନୀ ରୋଗ ସମସ୍ୟା ବଢ଼ିଯାଇଥିବା ସ୍ପଷ୍ଟ ହୋଇଥିଲା । କ୍ରିଏଟିନିନ୍ ଏବଂ ୟୁରିଆ ପରିମାଣ ଆବଶ୍ୟକତାଠୁ ଅଧିକା ରହିଛି । ଶରୀରରେ ରକ୍ତ ପରିମାଣ କମ୍ ରହିଛି । ଭୋକ ହେଉନଥିବାରୁ ଦୁର୍ବଳ ହୋଇଯାଇଛନ୍ତି । ତୁରନ୍ତ ପ୍ରତିକାର ବ୍ୟବସ୍ଥା ଗ୍ରହଣ କରାଯାଇଥିଲା । ଅଧିକ ଚିକିତ୍ସା ଦରକାର ବୋଲି ଗଢ଼ାଯାଇଥିବା ଟିମ୍ ସଦସ୍ୟ ରିପୋର୍ଟ ଦେଇଥିଲେ । ଏ ସମ୍ପର୍କରେ ଜିଲ୍ଲା ପ୍ରଶାସନକୁ ଜଣାଇ ଦିଆଯାଇଥିଲା । ଅନୁମତି ପରେ କଟକ ବଡ଼ ମେଡ଼ିକାଲ ସ୍ଥାନାନ୍ତର କରାଯାଇଛି । ଆମ୍ବୁଲାନ୍ସରେ ସ୍ୱତନ୍ତ୍ର ତାଲିମପ୍ରାପ୍ତ ଫାର୍ମାସିଷ୍ଟଙ୍କ ସହ କମଳାଙ୍କ ପୁଅ ଟଙ୍କଧର ପୂଜାରୀ ଏବଂ ବୋହୂ ଚଞ୍ଚଳା ପୂଜାରୀ ଯାଇଛନ୍ତି।