କୋଣାର୍କ,୨୯/୦୩: ପ୍ରତିବର୍ଷ ନଭେମ୍ବର ମାସଠାରୁ ମେ ମାସ ପର୍ଯ୍ୟନ୍ତ ଉପକୂଳ ଓଡ଼ିଶାକୁ ହଜାର ହଜାର ସଂଖ୍ୟାରେ ଅଲିଭ ରିଡଲେ କଇଁଛ ଆସିଥାଆନ୍ତି । କଇଁଛଙ୍କ ଏନ୍ତୁଡ଼ିଶାଳ କୁହାଯାଉଥିବା ପୁରୀଠାରୁ ଅସ୍ତରଙ୍ଗ, କୃଷ୍ଣପ୍ରସାଦ ପର୍ଯ୍ୟନ୍ତ କଇଁଛମାନେ ଅଣ୍ଡାଦାନ କରି ପୁଣି ସମୁଦ୍ର ଗର୍ଭକୁ ଚାଲି ଯାଇଥାନ୍ତି । ପ୍ରଜନନ ଋତୁରେ କଇଁଛଙ୍କ ସୁରକ୍ଷିତ ଅଣ୍ଡାଦାନକୁ ନେଇ ସରକାର ବିଭିନ୍ନ ଯୋଜନା ପ୍ରସ୍ତୁତ କରିଥିଲେ ମଧ୍ୟ ତାହା ବାସ୍ତବରେ ଏହା ସଫଳ ହେଉ ନଥିବା ଦେଖିବାକୁ ମିଳୁଛି। ଅନ୍ୟପଟେ ଡ଼ଙ୍ଗା ଶବ୍ଦରେ ଡ଼ଲଫିନ୍ମାନଙ୍କ ଚଳପ୍ରଚଳରେ ବାଧା ସୃଷ୍ଟି ହୋଇଥାଏ । ଏହା ବ୍ୟତୀତ ଫାଇବର ଜାଲରେ ପଡି ଏହି ସ୍ଥନ୍ୟପାୟୀ ପ୍ରାଣୀଙ୍କର ମୃତ୍ୟୁ ହୋଇଥାଏ । ଯାହାକୁ ନେଇ କୋଣାର୍କ ଥାନା ଅନ୍ତର୍ଗତ ଚନ୍ଦ୍ରଭାଗା ବହୁମୂଖୀ ବାତ୍ୟା ଆଶ୍ରୟସ୍ଥଳୀରେ ପୁରୀ ବନ୍ୟପ୍ରାଣୀ ବନଖଣ୍ଡ ପକ୍ଷରୁ ଏକ ଡଲଫିନ ଓ ଅଲିଭ ରିଡ଼ଲେ ସଚେତନତା କର୍ମଶାଳା ଅନୁଷ୍ଠିତ ହୋଇଯାଇଛି।
ଯେଉଁଥିରେ ଅତିଥି ଭାବେ ପୁରୀ ଡିଏଫଓ ବିବେକ କୁମାର, ଅସ୍ତରଙ୍ଗ ଏଏଫଓ ସତ୍ୟବ୍ରତ ଦାଶ, ଜୀବବିଜ୍ଞାନୀ ଶୁଭଶ୍ରୀ ସ୍ଵାଗତିକା ମହାନ୍ତି ଓ ସମାଜିକ ସଂଗଠନ ଜଙ୍ଗଲ ଫାଉଣ୍ଡେସନର ଅଧ୍ୟକ୍ଷ ଆକାଶ ରଞ୍ଜନ ରଥ ଯୋଗ ଦେଇଥିଲେ। ସମୁଦ୍ର ଭିତରେ ଡଲଫିନ ଓ ଅଲିଭ ରିଡ଼ଲେ ସୁରକ୍ଷିତ ରହିଲେ ଅନ୍ୟ ଜୀବମାନେ ସୁରକ୍ଷିତ ରହିପାରିବେ। ମୌସୁମୀ ଆସିଲେ ଡଲଫିନ ଗର୍ଭଧାରଣ କରିଥାଏ। ଥରକେ ୩ଟି ଛୁଆ ଜନ୍ମ ଦେଇଥାଏ ଡଲଫିନ। ୨ବର୍ଷ ପର୍ଯ୍ୟନ୍ତ ଛୁଆ ଗୁଡିକ ନିଜ ପାଖରେ ରଖିଥାଏ। ପରେ ଛୁଆ ନିଜ ଦାୟିତ୍ଵ ନିଜେ ନିର୍ବାହ କରିଥାନ୍ତି। ଡଲଫିନର ଜୀବନ କାଳ ୩୦ବର୍ଷ। ଏହି ସବୁ ସାମୁଦ୍ରିକ ଜୀବର ସଂରକ୍ଷଣ ପାଇଁ ସମୁଦ୍ରରେ ରିଙ୍ଗ ଜାଲରେ ମାଛ ଧରିବା ଉପରେ କଟକଣା କରାଯାଇଥିବା ଅତିଥିମାନେ ମତବ୍ୟକ୍ତ କରିଥିଲେ। ଏହି କାର୍ଯ୍ୟକ୍ରମକୁ କୋଣାର୍କ ବନ୍ୟପ୍ରାଣୀ ବନାଞ୍ଚଳ କର୍ମଚାରୀ ପରିଚାଳନା କରିଥିଲେ।
