ବ୍ରହ୍ମପୁର, ୩୧/୦୩: ଋଣ କରାଇଦେବା ନାଁରେ ଅଢ଼େଇ ଲକ୍ଷ ଟଙ୍କା ଠକେଇ ଅଭିଯୋଗରେ ବଡ଼ବଜାର ଥାନା ପୁଲିସ ଛତ୍ରପୁରର ଧନଞ୍ଜୟ ପଣ୍ଡା (୫୧)ଙ୍କୁ ଗିରଫ କରିଛି । ସୂଚନା ମୁତାବକ, ବଡ଼ବଜାର ଥାନା ସରସ୍ୱତୀ ନଗର ୨ୟ ଲେନ୍‌ର ସୀମାଞ୍ଚଳ ଚୌଧୁରୀ ୨୦୨୩ ମସିହାରେ ଏକ କ୍ଷୁଦ୍ର ଓ ମଧ୍ୟମ ଉଦ୍ୟୋଗ ସ୍ଥାପନ କରିବାକୁ  ଡିଆଇସିରେ ଆବେଦନ କରିଥିଲେ । ବ୍ୟାଙ୍କରୁ ଋଣ ନେବା ପାଇଁ ମଧ୍ୟ ଯୋଜନା ଆରମ୍ଭ କରିଥିଲେ । ଏହି ସମୟରେ ଧନଞ୍ଜୟଙ୍କ ସହ ସୀମାଞ୍ଚଳଙ୍କ ପରିଚୟ ହୋଇଥିଲା । ବଡ଼ ଧରଣର ଲୋନ ପାଇଁ ଲକ୍ଷାଧିକ ଟଙ୍କା ଖର୍ଚ୍ଚ ହେଉଥିବା ଧନଞ୍ଜୟ କହିଥିଲେ । ଲୋନ୍‌ କରାଇଦେବା ପ୍ରତିଶ୍ରୁତି ଦେଇ ଦୁଇଟି ପର୍ଯ୍ୟାୟରେ ଅଭିଯୁକ୍ତ ୨ ଲକ୍ଷ ୫୦ ହଜାର ଟଙ୍କା ସୀମାଞ୍ଚଳଙ୍କ ଠାରୁ ନେଇଥିଲେ । ବହୁ ମାସ ପର୍ଯ୍ୟନ୍ତ ଲୋନ୍‌ ଆବେଦନ ପାସ୍‌ ହୋଇ ନଥିଲା । ନିରାଶ ହୋଇ ସୀମାଞ୍ଚଳ ଟଙ୍କା ଫେରାଇବାକୁ କହିଥିଲେ । ଧନଞ୍ଜୟ ଟଙ୍କା ଫେରାଇବା ବଦଳରେ ଧମକ ଦେଉଥିବା ସୀମାଞ୍ଚଳ ବଡ଼ବଜାର ଥାନାରେ ଅଭିଯୋଗ କରିଥିଲେ । ପୁଲିସ ଘଟଣାର ତଦନ୍ତ କରି ଅଭିଯୁକ୍ତକୁ ସୋମବାର କୋର୍ଟ ଚାଲାଣ କରିଛନ୍ତି ।