ଭୁବନେଶ୍ୱର, ୦୨/୦୪: ସ୍କୁଲକୁ ପିଲାମାନଙ୍କୁ ଆଣୁଥିବା ସମୟରେ ଓଲଟିଲା କରଞ୍ଜିଆ ବିବେକାନନ୍ଦ ପବ୍ଲିକ ସ୍କୁଲର ସ୍କୁଲ ଭ୍ୟାନ୍ । ଭ୍ୟାନ୍ଟି ଓଲଟି ପଡ଼ିବାରୁ ୨ ଶିଶୁ ସମେତ ହେଲପର୍ ଆହତ ହୋଇଛନ୍ତି । ସମସ୍ତ ଆହତଙ୍କୁ କରଞ୍ଜିଆ ମେଡ଼ିକାଲରେ ଭର୍ତ୍ତି କରାଯାଇଛି । କେନ୍ଦୁଝର ଜିଲ୍ଲା କରଞ୍ଜିଆ ଥାନା ଭଅଁରା ଛକ ନିକଟରେ ଏଭଳି ଘଟଣା ଘଟିଛି ।
ସୂଚନା ମୁତାବକ, କରଞ୍ଜିଆ ବିବେକାନନ୍ଦ ପବ୍ଲିକ ସ୍କୁଲର ପିଲାଙ୍କୁ ଗାଡ଼ିରେ ଅସୁରକ୍ଷିତ ଭାବରେ ବସାଇ ବେପରୁଆ ଭାବରେ ଗାଡ଼ି ଚଳାଉଥିଲା ଡ୍ରାଇଭର । କରଞ୍ଜିଆ ଥାନା ଭଅଁରା ଛକ ନିକଟରେ ସ୍କୁଲକୁ ପିଲାମାନଙ୍କୁ ଆଣୁଥିବା ସମୟରେ ସ୍କୁଲ ଭ୍ୟାନ୍ଟି ଓଲଟି ପଡ଼ିଥିଲା । ଫଳରେ ୨ ଜଣ ଶିଶୁ ସହ ହେଲ୍ପର ଆହତ ହୋଇଥିଲେ । ଏହା ଦେଖି ସ୍ଥାନୀୟଲୋକେ ତୁରନ୍ତ ପୋଲିସକୁ ଖବର ଦେଇଥିଲେ । ଖବର ପାଇ କରଞ୍ଜିଆ ପୋଲିସ ଘଟଣା ସ୍ଥଳରେ ପହଞ୍ଚି ସମସ୍ତ ଆହତଙ୍କୁ କରଞ୍ଜିଆ ମେଡ଼ିକାଲରେ ଭର୍ତ୍ତି କରିଛି । ଏହା ସହ ଘଟଣାର ତଦନ୍ତ ଆରମ୍ଭ କରିଛି ପୋଲିସ ।