ଭୁବନେଶ୍ୱର, ୨୧/୦୫ : ‘ଠିକ୍ରେ ପୁରସ୍କାର ଦିଅ । ଓଡ଼ିଆ ଚଳଚ୍ଚିତ୍ର ଲାଗି ନୀତି ଆଣ । ସର୍ବାଙ୍ଗୀନ ବିକାଶ ପାଇଁ ଆବଶ୍ୟକ ଭିତ୍ତିଭୂମି ସଜାଡ଼ ।’ ଓଡ଼ିଆ ଚଳଚ୍ଚିତ୍ର ଜଗତ ସହିତ ସଂଶ୍ଲିଷ୍ଟ ବିଭିନ୍ନ ପ୍ରସଙ୍ଗକୁ ନେଇ ଓଡ଼ିଆ ଭାଷା, ସାହିତ୍ୟ ଓ ସଂସ୍କୃତି ବିଭାଗ ଆନୁକୂଲ୍ୟରେ ସଂସ୍କୃତି ଭବନ ସମ୍ମିଳନୀ କକ୍ଷରେ ସୋମବାର ବସିଥିଲା ବିକାଶ ବୈଠକ । ଯାହାକୁ ନେଇ ଓଡ଼ିଆ ଚଳଚ୍ଚିତ୍ର ଜଗତର ବିଭିନ୍ନ ମହଲରେ ତୀବ୍ର ପ୍ରତିକ୍ରିୟା ପ୍ରକାଶ ପାଇଛି । କିଏ ପ୍ରଶଂସା କରିଛି ତ କିଏ ଅସନ୍ତୋଷ ଝାଡ଼ିଛି । ସେଭିତରେ ‘ଓଡ଼ିଆ ସିନେମା’ ସଂସ୍କୃତିର ନା’ ଶିଳ୍ପର ବୋଲି ପ୍ରଶ୍ନ ଉଠିଥିଲା ବେଳେ ଏବେ ଗୋଟିଏ କଥାକୁ ନେଇ ସାରା ଇଣ୍ଡଷ୍ଟ୍ରିରେ ଚର୍ଚ୍ଚା । ସବୁଦିନ ପାଇଁ ଓଡ଼ିଆ ଭାଷା, ସାହିତ୍ୟ ଓ ସଂସ୍କୃତି ବିଭାଗ ଅଧୀନକୁ ଚାଲିଯିବ ମନୋରଞ୍ଜନର ପ୍ରମୁଖ ମାଧ୍ୟମ ଓଡ଼ିଆ ସିନେମା । ତା’ର ପ୍ରାଥମିକ ପ୍ରସ୍ତୁତି ଥିଲା ଏହି ବୈଠକ ବୋଲି ଆଲୋଚନା ହେଉଛି । ଯାହାକୁ ନେଇ କିଛି ପ୍ରଯୋଜକ, ନିର୍ଦ୍ଦେଶକ ଓ ବୈଠକରେ ସାମିଲ ନଥିବା ଅନ୍ୟାନ୍ୟ ବ୍ୟକ୍ତିବିଶେଷ ଓ ସିନେମା ସହ ଜଡ଼ିତ ବିଭିନ୍ନ ସଂଘ ପ୍ରଶ୍ନ କରିଛନ୍ତି ।
ବରିଷ୍ଠ ପ୍ରଯୋଜକ ତଥା ପ୍ରଯୋଜକ ସଂଘର ମୁଖ୍ୟ ଅରୁଣ ମହାନ୍ତି କହିଛନ୍ତି, କେତେ ଜଣ କଳାକାର ଯାଇ ସଂସ୍କୃତି ବିଭାଗରେ ବସି ଆଲୋଚନା କରିଛନ୍ତି । ହେଲେ ସେମାନଙ୍କୁ ଯିଏ ତିଆରି କଲେ ସେମାନେ କୁଆଡ଼େ ଗଲେ? ତା’ପରେ ସଂସ୍କୃତି ବିଭାଗ ସହ ବସି ବୈଠକ କଲେ କ’ଣ ହେବ, ଆମର ସବୁ କାମ ତ ଶିଳ୍ପ ବିଭାଗରେ । କାରଣ ୧୯୭୪ ମସିହାରୁ ରାଜ୍ୟ ସରକାର ଓଡ଼ିଆ ସିନେମାକୁ ଶିଳ୍ପର ମାନ୍ୟତା ଦେଇଛନ୍ତି । ୧୯୭୬ ଏପ୍ରିଲ୍ ୨୨ରୁ ଓଡ଼ିଶା ଚଳଚ୍ଚିତ୍ର ଉନ୍ନୟନ ନିଗମ (ଓଏଫ୍ଡିସି) ପ୍ରତିଷ୍ଠା ହୋଇ ଶିଳ୍ପ ବିଭାଗ ଅଧୀନରେ ଓଡ଼ିଆ ସିନେମା ପାଇଁ କାର୍ଯ୍ୟ କରିଆସୁଛି । ୧୯୮୨ରେ କଳିଙ୍ଗ ଷ୍ଟୁଡିଓ ପ୍ରତିଷ୍ଠା ହେଲା । ୨୦୧୯ ଫେବ୍ରୁଆରୀ ୨୬ରେ ‘ଓଡ଼ିଶା ରାଜ୍ୟ ଚଳଚ୍ଚିତ୍ର ନୀତି-୨୦୧୯’ ସରକାର ଆଣିଲେ । ଯାହା କଲେ ତା’ର ଫଳ ତାଙ୍କୁ ଜଣା । ବାକି ସଂସ୍କୃତି ବିଭାଗ ଆନୁକୂଲ୍ୟରେ ତା’ ଅଧୀନ ଓଡ଼ିଶା ସଙ୍ଗୀତ ନାଟକ ଏକାଡେମୀ ଦୀର୍ଘ ବର୍ଷ ଧରି ଓଡ଼ିଶା ରାଜ୍ୟ ଚଳଚ୍ଚିତ୍ର ପୁରସ୍କାର ପ୍ରଦାନ କରିଆସୁଥିଲା ।
କୁନା ତ୍ରିପାଠୀ ଓଏଫ୍ଡିସିର ଅଧ୍ୟକ୍ଷ ହେବା ପରେ ସମ୍ପୂର୍ଣ୍ଣ ପୁରସ୍କାର ବଣ୍ଟନ ବ୍ୟବସ୍ଥାକୁ ସଂସ୍କୃତି ବିଭାଗରୁ ଛଡ଼ାଇ ଆଣିଲେ । ଯାହାର କିଛି ଆବଶ୍ୟକତା ନଥିଲା । ତେଣୁ ଯେଉଁ ବିଭାଗ ସହ ସିନେମାର କୌଣସି ସମ୍ପର୍କ ନାହିଁ, ସେଠି କିଛି କଳାକାର ବସି କାହାକୁ ନଡାକି ନିଜେ ମୁରବୀ ସାଜି ଆଲୋଚନା କରିବା ଅତ୍ୟନ୍ତ ହାସ୍ୟାସ୍ପଦ । ଆବଶ୍ୟକ ପଡ଼ିଲେ ଆମେ କୋର୍ଟକୁ ଯିବୁ । ଏମିତିରେ ଇଣ୍ଡଷ୍ଟ୍ରିର ଯାହା ଅବସ୍ଥା, ସେଠି ମନମାନୀ ହେଲେ ଚଳିବନି । ବରିଷ୍ଠ ସିନେ ସମାଲୋଚକ ଦିଲ୍ଲୀପ ହାଲି କହିଛନ୍ତି, ଯେଉଁ ବିଭାଗକୁ ଗଲେ କ’ଣ ହେବ? ତର୍ଜମା କରନ୍ତୁ ୯୦ ବର୍ଷର ଯାତ୍ରାରେ ଓଡ଼ିଆ ସିନେମା କ’ଣ ପାଇଛି? ଲାଭ କ’ଣ ହେଇଛି? ଖାଲି ନିଷ୍ଫଳ ଆଲୋଚନା, ଫାଙ୍କା ଆୱାଜ ଆଉ ବଡ଼ ବଡ଼ କଥା । ଏମିତି ମାନ୍ୟତା ପାଇଁ ଯାତ୍ରା ବାଲା ବାଡ଼ିଆପିଟା ଲାଗିଛନ୍ତି, କିନ୍ତୁ କାହାର ହେଇପାରୁନାହାନ୍ତି, ଇଏ ମାନ୍ୟତା ପାଇ କାହାର ହେଇପାରୁନାହାନ୍ତି । ଏମିତି ଲଢ଼େଇ କଲେ ମୂଳରୁ ପୋଛି ହେଇଯିବେ । ଜଣେ କଳାକାର କହିଛନ୍ତି, ଭଲ କାମ ପାଇଁ କାହାକୁ ତ ଆଗକୁ ଆସିବାକୁ ପଡ଼ିବ ଏବଂ ନେତୃତ୍ୱ ନେବାକୁ ହେବ । ସରକାରଙ୍କୁ ଜଗେଇବାକୁ ହେବ ଏବଂ ଆମ ଅଧିକାରକୁ ସାବ୍ୟସ୍ଥ ସହ ହକ୍ ମାଗିବାକୁ ପଡ଼ିବ । ନହେଲେ ସମସ୍ତେ ସବୁ ପାଉଥିବେ, ଆମେ ସେମିତି ବସିଥିବା । ଯେଉଁମାନେ ବିରୋଧ କରୁଛନ୍ତି, ସେମାନେ ଭାବନ୍ତୁ ଦୁନିଆ କୁଆଡ଼େ ଯାଉଛି ଆଉ ଆମେ କେଉଁଠି?
