ଜଟଣୀ,୦୯/୦୭: ମଙ୍ଗଳବାର ଜଟଣୀ ସ୍ଥିତ ନାଇଜରର ୧୩ତମ ସ୍ନାତକ ସମାରୋହରେ ଯୋଗଦେବେ ମହାମହିମ ରାଷ୍ଟ୍ରପତି ଦ୍ରୌପଦୀ । ରାଜ୍ୟପାଳ ରଘୁବର ଦାସ, ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ଓ କେନ୍ଦ୍ର ଶିକ୍ଷାମନ୍ତ୍ରୀ ଧର୍ମେନ୍ଦ୍ର ପ୍ରଧାନ ମଧ୍ୟ ଅତିଥି ଭାବେ ଯୋଗଦେବେ । ନାଇଜର ପରିଚାଳନା କମିଟିର ଅଧ୍ୟକ୍ଷ ଡ. ଅଜିତ ମହାନ୍ତିଙ୍କ ପୌରୋହିତ୍ୟରେ ସମାରୋହ ଅନୁଷ୍ଠିତ ହେବ । ସମାରୋହରେ ୧୫୬ ଜଣଙ୍କୁ ସ୍ନାତକ, ୨୧ ଜଣଙ୍କୁ ଏମ୍ଏସ୍ସି-ପିଏଚ୍ଡି ଓ ୭୦ ଜଣଙ୍କୁ ପିଏଚ୍ଡି ଡିଗ୍ରୀ ଦିଆଯିବ ବୋଲି ନାଇଜର ରେଜିଷ୍ଟ୍ରାର ଡ. ଅଭୟ କୁମାର ନାୟକ କହିଛନ୍ତି । ରସାୟନ ବିଭାଗର ଛାତ୍ର ପ୍ରଣୟ ମହାନ୍ତି ସ୍ୱର୍ଣ୍ଣପଦକ ପାଇବେ । ତତ୍ ସହିତ ୧୧ ଜଣଙ୍କୁ ବିଭିନ୍ନ ପଦକ ପ୍ରଦାନ କରାଯିବ ।
ପ୍ରଥମ ଥର ପାଇଁ ନାଇଜର ଭୁବନେଶ୍ୱରରେ କୌଣସି ରାଷ୍ଟ୍ରପତିଙ୍କ ଆଗମନ ନେଇ କଡ଼ା ସୁରକ୍ଷା ବନ୍ଦୋବସ୍ତ ହୋଇଥିବାବେଳେ ଏ ନେଇ ଖୋର୍ଦ୍ଧା ଅତିରିକ୍ତ ଜିଲ୍ଲାପାଳ ପ୍ରତାପ ବେଉରା ନାଇଜର କର୍ତ୍ତୃପକ୍ଷଙ୍କ ସହ ତଦାରଖ କରିଛନ୍ତି ।
