ଇସଲାମାବାଦ: ପାକିସ୍ତାନରେ ବନ୍ୟା ବିତ୍ପାତ । ପ୍ରବଳ ବର୍ଷ ଏବଂ ପ୍ରଳୟଙ୍କରୀ ବନ୍ୟାରେ ଅସ୍ତବ୍ୟସ୍ତ ପାକିସ୍ତାନ । ଏହାରି ମଧ୍ୟରେ ଦେଶରେ ପ୍ରବଳ ବର୍ଷା ହୋଇପାରେ ବୋଲି ରବିବାର ସତର୍କ କରାଇଛି ପାଣିପାଗ ବିଭାଗ । ଅଧିକାରୀଙ୍କ ଅନୁଯାୟୀ, ଦେଶର ଉତ୍ତର ଭାଗରେ ହଠାତ୍ ବନ୍ୟା ଯୋଗୁଁ ମୃତ୍ୟୁ ସଂଖ୍ୟା ୩୨୭ ରେ ପହଞ୍ଚିଛି। ଜୁନ୍ ୨୬ ତାରିଖରେ ପାକିସ୍ତାନରେ ଆରମ୍ଭ ହୋଇଥିବା ମୌସୁମୀ ବର୍ଷା ତାଣ୍ଡବ ସୃଷ୍ଟି କରିଛି । ଏଥିପାଇଁ ଏପର୍ଯ୍ୟନ୍ତ ପ୍ରାୟ ୬୫୦ ଜଣଙ୍କର ମୃତ୍ୟୁ ହୋଇଛି। ପାଣିପାଗ ବିଭାଗ ୧୭ ଅଗଷ୍ଟରୁ ୨୧ ଅଗଷ୍ଟ ପର୍ଯ୍ୟନ୍ତ ସାରା ଦେଶରେ ପ୍ରବଳ ବର୍ଷା ହେବାର ସତର୍କତା ଜାରି କରିଛି । 

ଏହା ସହିତ ଉତ୍ତର-ପଶ୍ଚିମ ଅଞ୍ଚଳର ଲୋକମାନଙ୍କୁ ସତର୍କତା ଅବଲମ୍ବନ କରିବାକୁ କୁହାଯାଇଛି। ଜାତୀୟ ବିପର୍ଯ୍ୟୟ ପରିଚାଳନା କର୍ତ୍ତୃପକ୍ଷ (NDMA) ମଧ୍ୟ ସତର୍କ କରାଇ ଦେଇଛି ଯେ, ଚଳିତ ବର୍ଷ ସ୍ୱାଭାବିକ ଅପେକ୍ଷା ଅଧିକ ବର୍ଷ ହୋଇଛି । ଏହି ବର୍ଷା ଆଗାମୀ ଦୁଇ ସପ୍ତାହ ପର୍ଯ୍ୟନ୍ତ ଅଧିକ ତୀବ୍ରତାର ସହିତ ଜାରି ରହିବ। ଖୈବର ପଖତୁନଖ୍ୱାରେ ପ୍ରବଳ ବର୍ଷା ଏବଂ ବାଦଲ ଫାଟିବା ଯୋଗୁଁ ହୋଇଥିବା ବନ୍ୟା ଯୋଗୁଁ ଅତି କମରେ ୩୨୭ ଜଣଙ୍କର ମୃତ୍ୟୁ ହୋଇଛି । କେବଳ ବୁନେରରେ ୨୦୦ ରୁ ଅଧିକ ଲୋକଙ୍କର ମୃତ୍ୟୁ ହୋଇଛି ।

ଘର ଭାଙ୍ଗିବା ଘଟଣାରେ ପ୍ରାୟ ୧୩୭ ଜଣ ଆହତ ହୋଇଛନ୍ତି ଏବଂ ପାଣିର ପ୍ରବଳ ପ୍ରବାହରେ ଲୋକ, ଗାଈଗୋରୁ ଏବଂ ଯାନବାହନ ଭାସି ଯାଇଛି । ଅଧିକାରୀମାନେ ସତର୍କ କରାଇ ଦେଇଛନ୍ତି ଯେ, ଦୂରଦୂରାନ୍ତ ଗ୍ରାମଗୁଡ଼ିକରେ ଅନେକ ଲୋକ ଭଗ୍ନାବଶେଷ ତଳେ ଫସି ରହିଥିବା ଆଶଙ୍କା କରାଯାଉଛି ଏବଂ ଅନେକ ଲୋକ ନିଖୋଜ ଅଛନ୍ତି। ପ୍ରାୟ ୨ ହଜାର କର୍ମଚାରୀ ଉଦ୍ଧାର କାର୍ଯ୍ୟରେ ନିୟୋଜିତ ଅଛନ୍ତି । କିନ୍ତୁ ସେତୁ ଏବଂ ସଂଯୋଗକାରୀ ରାସ୍ତା ସମେତ ପ୍ରମୁଖ ରାସ୍ତା ନଷ୍ଟ ହେବା ଯୋଗୁଁ ରିଲିଫ୍ କାର୍ଯ୍ୟ ବାଧାପ୍ରାପ୍ତ ହୋଇଛି । 

ଖାଇବର ପଖତୁନଖ୍ୱାର ଉଦ୍ଧାର ସଂସ୍ଥାର ମୁଖପାତ୍ର ବିଲାଲ ଅହମଦ ଫୈଜି କହିଛନ୍ତି ଯେ, ପ୍ରବଳ ବର୍ଷା ଯୋଗୁଁ ଭୂସ୍ଖଳନ ଏବଂ ରାସ୍ତା ଧୋଇଯିବା ଉଦ୍ଧାର କାର୍ଯ୍ୟରେ ବାଧା ସୃଷ୍ଟି କରୁଛି। ବିଶେଷକରି ଭାରୀ ଯନ୍ତ୍ରପାତି ଏବଂ ଆମ୍ବୁଲାନ୍ସ ପ୍ରଭାବିତ ଅଞ୍ଚଳଗୁଡ଼ିକରେ ପହଞ୍ଚିବା କଷ୍ଟକର ହୋଇପଡ଼ିଛି। ପାକିସ୍ତାନୀ ସେନାର 'କର୍ପସ ଅଫ୍ ଇଞ୍ଜିନିୟର୍ସ ଅର୍ବାନ୍ ସର୍ଚ୍ଚ ଆଣ୍ଡ୍ ରେସକ୍ୟୁ' (USAR) ଦଳ ବୁନେର, ଶାଙ୍ଗଲା ଏବଂ ସ୍ୱାତରେ ମଧ୍ୟ ଉଦ୍ଧାର କାର୍ଯ୍ୟ ଆରମ୍ଭ କରିଛି । ଦଳ ଆହତ ଲୋକଙ୍କୁ ଖୋଜିବା ଏବଂ ଭଗ୍ନାବଶେଷରେ ଫସି ରହିଥିବା ମୃତଦେହଗୁଡ଼ିକୁ ବାହାର କରିବା ପାଇଁ ଉନ୍ନତ ଉପକରଣ ବ୍ୟବହାର କରୁଛି।