ମସ୍କୋ: ରୁଷର ରୟାଜାନ ଅଞ୍ଚଳରେ ଥିବା ଏକ ଇଲାଷ୍ଟିକ୍ ଫ୍ୟାକ୍ଟ୍ରୀରେ ଶୁକ୍ରବାର ଦିନ ଏକ ବିସ୍ଫୋରଣ ପରେ ଭୟଙ୍କର ଅଗ୍ନିକାଣ୍ଡ ଘଟିଛି। ଯେଉଁଥିରେ ୧୧ ଜଣଙ୍କର ମୃତ୍ୟୁ ହୋଇଛି ଏବଂ ୧୩୦ରୁ ଅଧିକ ଲୋକ ଆହତ ହୋଇଛନ୍ତି। ଏହି ଘଟଣା ଶିଲୋଭସ୍କୀ ଜିଲ୍ଲାରେ ଅବସ୍ଥିତ ଇଲାଷ୍ଟିକ୍ ପ୍ଲାଣ୍ଟରେ ଘଟିଥିଲା। ଯାହା ମସ୍କୋଠାରୁ ପ୍ରାୟ ୨୫୦ କିଲୋମିଟର ଦୂରରେ ଅବସ୍ଥିତ।
ଏନେଇ ରୁଷୀୟ ଅଧିକାରୀମାନେ କହିଛନ୍ତି ଯେ ଫ୍ୟାକ୍ଟ୍ରୀର ଗନପାଉଡର ଓ୍ଵାର୍କସପରେ ଲାଗିଥିବା ନିଆଁ ହିଁ ଏହି ବିସ୍ଫୋରଣର କାରଣ ହୋଇଛି। ଏହି ଦୁର୍ଘଟଣାରେ ଆହତ ୨୯ ଜଣଙ୍କୁ ହସ୍ପିଟାଲରେ ଭର୍ତ୍ତି କରାଯାଇଛି, ଯେଉଁଥିରୁ ୧୩ ଜଣଙ୍କୁ ରୟାଜାନରେ ଏବଂ ୧୬ ଜଣଙ୍କୁ ମସ୍କୋର ମେଡିକାଲ ସେଣ୍ଟରକୁ ସ୍ଥାନାନ୍ତର କରାଯାଇଛି। ରୁଷୀୟ ଜରୁରୀକାଳୀନ ମନ୍ତ୍ରଣାଳୟ ଅନୁଯାୟୀ, ଏହି ଘଟଣାରେ ଉଦ୍ଧାର କାର୍ଯ୍ୟ ଜାରି ରହିଛି ଏବଂ ଶନିବାର ସକାଳ ସୁଦ୍ଧା ମାଟିତଳେ ପୋତି ହୋଇଯାଇଥିବା ଦୁଇଟି ମୃତଦେହ ଉଦ୍ଧାର କରାଯାଇଥିବା ବେଳେ ତିନି ଜଣଙ୍କୁ ମାଟିତଳୁ ଜୀବିତ ଉଦ୍ଧାର କରାଯାଇଛି।
ଏହି ଘଟଣାର ତଦନ୍ତ ଆରମ୍ଭ ହୋଇଛି ଏବଂ ରୟାଜାନ ଅଞ୍ଚଳରେ ସୋମବାରକୁ ଶୋକ ଦିବସ ଘୋଷଣା କରାଯାଇଛି। ଏହି ଦିନ ପତାକା ଅଧା ଝୁଙ୍କି ରହିବ ଏବଂ ସମସ୍ତ ସାଂସ୍କୃତିକ ଓ ମନୋରଞ୍ଜନ କାର୍ଯ୍ୟକ୍ରମ ବାତିଲ ରହିବ। ଉଲ୍ଲେଖଯୋଗ୍ୟ ଯେ, ଏହି ଫ୍ୟାକ୍ଟ୍ରୀରେ ୨୦୨୧ ଅକ୍ଟୋବରରେ ମଧ୍ୟ ଏକ ବଡ଼ ବିସ୍ପୋରଣ ହୋଇଥିଲା। ଯେଉଁଥିରେ ୧୭ ଜଣ ଲୋକଙ୍କର ମୃତ୍ୟୁ ହୋଇଥିଲା।
